Kolose 3 - Ṉa Alaofua Falu 1923 1949

¹ Mada sa kera tatae kamulua naa bia tha Christ neri, muki rofe uria si do nai ia ki, asi kula na tha Christ ni iei, kai ono ibali aba aola tha God.

² Muki alua manatamulua asi do nai ia ki, ma si do nai iano ki ka ai.

³ Sulaania mulu mae naa, ma marukia kamulua kai to thaufuni bia tha Christ ni atha God.

⁴ Lalae asi maṉa na keki fatai nia tha Christ, na ṉa marukia kulu, keki fatai kamulua lau boo bi nia ana inotoa.

⁵ Mania muki faamaea si do na ana seemulua ki na ni fanua nei iano; oe la, manata taa la, si lio ni oea, thathami lana do taa, ma thathami lana si do kera ki, si do eri na ṉa foa la ana god eeta ki;

⁶ Rakeiria tha God kai fulatoona unii wane na kera ade faisia ṉata lana fafia do eki;

⁷ Abula la na mulu abubula mania inao, si maṉa na mulu toto asi do eki.

⁸ Sui keda eri muka tanusia lau boo si do nai ki sui boo faisi kamulua; rakeiria, rakeaṉoṉoa, si lio ne taa, ṉata taa la seena imole, ma daidei la:

⁹ Musi lolole kamulua kwailiu; uria na mulu tanusia naa wane inao bia abula lana,

¹⁰ Ma muka tooni naa ana wane falu, na keki adea kai falu uria thaitoomana la sulia nuna ni nia ne thauwai nia:

¹¹ Kula ne ai ta wane i Girisi ma ka ai ta Ju, e ai ta kwai kakali la ma ka ai ta toa kesi kwai kalida, e ai ta wane ṉata lane eeta, ma ka ai ta Sithiana, e ai ta wane na kai tona ra, ma ka ai ta wane na kai tona to: tha Christ na ṉa do ki sui bana, ma ka ni ana toa eki sui boo.

¹² Mania toa na tha God e fili kamulua, na mulu abu ma kera liothau ani kamulua, muka tooni asi do nai ki, si lio ni tatakomi la, ade lea la, abula seseka la, abula marabibi la, si lio ni doanita tatha la;

¹³ Muki mamasoro kamulua, ma muki manata lube kamulua kwailiu, mada sa ta wane kera abula taa iana ana ta si do; uria na tha Christ e manata lube kamulua naa, muka ade una eri lau boo.

¹⁴ Ma muki tooni ana liothau la fafia do eki sui boo, si do ne faaṉadoa do eki kai too neri.

¹⁵ Ma enenoa tha God kai inoto i la ruruumulua, si do eri lau boo na kera aili kamulua mai uria ana tee seedo; ma muki sore lea.

¹⁶ Bae lana tha Christ kai to kai oro i la ruruumulua ana liotooa ni sui bana; muki kwaifamanatai ma muki faamanatai kamulua ana ṉu ki, ana ṉu ana taṉo la ki ma ṉu tha Spirit ki, muki ṉu ana lea la i la ruruumulua ifana ṉa Lord.

¹⁷ Ma atona bana ta si do na muki ilia, ana bae la mado abula la, muka ilia ka sui ana thatana tha Lord Jesus, muki sore lea talea tha God na Maka ani nia.

¹⁸ Ai ila ai ki, muki roo sulia kwaimulua ki, si kula eri e kokoto ana ṉa Lord.

¹⁹ Toa ila wane ki, muki liothau ana kwaimulua ki, ma musi susubu anida.

²⁰ Kala wela, muka ade sulia ṉata lana maka kamiu ki ma thainamiu ki asi do ki sui bana, uria na si kula eri e lea ana ṉa Lord.

²¹ Wane na mulu welaa ki, musi faaomea wela kamulua, fasi e ai kesi seedadaola.

²² Wane ni ra ki, muki ade sulia ṉata lana wane inoto kamulua ki ana see imole asi do ki sui bana; ana si maṉa eri bana na keki rikia ra lamulua, sa muki ade mala toa na kera thathamia faalea lana imole ka ai, muki ilia ana tee si lio i ruruumulua, muka mau atha God:

²³ Atona bana ta si do muki ilia, muki ra seemabe uria, ’uria sa muki ilia ifana ṉa Lord, ifana imole e ai;

²⁴ Uria na muki thaitoomana toto muki ṉalia kwaiara ba, si do eri na ṉa Lord kai falea fani kamulua na muka inamaruki ani nia: do muki ra ifana ṉa Lord tha Christ.

²⁵ Ma wane na kai abula garo toto kai ṉalia lau si do sulia abula garo la ne ilia: ma do kera rikia imole ka totoo bana.