Kolose 2 - Ṉa Alaofua Falu 1923 1949

¹ Uria nau ku thathamia muki thaitoomana aṉasi la na nau ku aṉasi faamau ania uri kamulua, ma uria toa nai Laodisia, ma uria toa eki sui boo na kesi rikia maaku i seena imole;

² Fasi keka faainamarukia ruruuda, uria na kera lado kera keka rao ana liothau la, ma keka rikii do faamau asi do na kera thaitoomana lea maalutana mamana lana, fasi keka thaitoomana si do tha God na Maka ne toto thaufuni, tha Christ neri,

³ Wane na kera alua ogogonia eri sui bana ana liotooa ma manata lea la ka to thaufuni ani nia.

⁴ Ku sorea si do eri, fasi ta wane si lole kamulua ana ṉata gwagwari la nia.

⁵ Sulaania ku to mena i thara faisi kamulua ana seena imole, spirit nau ni isamulua, ku seethathala, ku rikia abula kokoto la kamulua, ma fitooa kamulua ne ṉado atha Christ.

⁶ Mania talafana na mulu ṉalia Christ Jesus ṉa Lord, alafana na muki abula ani nia,

⁷ Lalimulua kai ṉado ani nia ma keka faasukwai kamulua ani nia lau boo, muki takwe ṉado asi do eki na kulu fitoona, ’uria lau boo kera tooa isamulua, ma muki sore lea faamau.

⁸ Beta suli kamulua ada mado e ai ta wane kai bili kamulua asi thathami la nia uria manata lea la ma kaura la ne fakoka, sulia si do imole kai sorea, sulia si do totonao ba ana fanua nei iano ki, ma sulia tha Christ e ai:

⁹ Sulaania si do eki sui bana na ni atha God e to ana seena Wane eri,

¹⁰ Ma kera faafuṉu kamulua ani nia, na gwauna toa inoto eki sui bana ma toa sukwai eki:

¹¹ Ma kera kwai kali kamulua lau boo ani nia ana kwai kakali la na kesi kwaia ana abee imole, ana tanusi lana seemulua mala fanua nei iano, ana kwai kakali la tha Christ.

¹² Uria na kera kwaiṉei kamulua bi nia ana babataesi la eri, si kula na kera tatae kamulua lau boo bi nia uria fitooa kamulua eri ana ra lana tha God, ne tatae nia faisia toa mae ki.

¹³ Ma ni kamulua, na mulu mae naa uria ade garo la kamulua ba ki ma uria seemulua na kesi kwai kakalia, e faamaruki kamulua ofu bi nia, uria ne doanita iamulua ana ade garo la kamulua ki sui bana;

¹⁴ Uria ne usua kekeda la eri asi ṉata ne maalimae iakulua, ne sorea kwae lakulua: me idua faisi kulu, uria ne fota fafia ana ’ai rarafolo;

¹⁵ Ma uria ne tanusia inotoa toa inoto eki ma toa sukwai eki faisida, e fatai kera fasi toa na fanua kai bubu, si nia e tatha iada sulaania ’ai rarafolo eri.

¹⁶ Mania musi alamatania ta wane si ṉata suli kamulua mala wane ni kotu sulia do ni faṉa la, mado do ni kuu la, mado sulia fa boṉi ana adeedoa mado fa boṉi ana madami falu mado fa boṉi ni mamaloa:

¹⁷ Nuna si do ni u ki mai neri; ma seena do eki ni atha Christ.

¹⁸ Musi alamatania ta wane si laua kwaiara kamulua faisi kamulua ana ili lana si do nia tala thathamia ana abula seseka la ma faabaita lana angel ki, uria ne onotoona si do ne ai si rikia, ma manatana i talaana ka tona faabaita nia,

¹⁹ Me ai si rau ana ṉa Gwau, na seedo eri sui boo, na lado la eki ma si lalali eki ka faasukwaia ma ka ladoa ka rao, kai baita alaa ani nia ana baita la ne ita mai atha God.

²⁰ Mania mada sa mulu mae naa bia tha Christ faisia si do totonao fanua nei iano ki, uria ta na mulu ’uria imole ne maruki u ana fanua nei iano, mulu roo sulia si ṉata fifi ki,

²¹ Musi raua, ma musi anitoona, ma musi suana

²² (Si do eki sui boo na kera tooa kai sui u bomai si maṉa na kera rara mai ania), sulia ṉata lana imole ma kwaifamanatai lana?

²³ Ma riki lana si do eki fetei na kai ’uria si do ana liotooa sulia thathami lana foa la, ma abula seseka la, ma fare taa la ana see imole; sui sa ka talaana firu la bia si do na seena imole thathamii ilia e ai.