Kolose 1 - Ṉa Alaofua Falu 1923 1949

¹ Polo, aposela tha Jesus Christ sulia si do na tha God e thathamia, ma doorakulua tha Timothiasi,

² Isana toa abu eki ma baree wai doorana mamana eki atha Christ nai Kolose: Lea la iamulua ma enenoa ita atha God na Maka kulu ma tha Lord Jesus Christ.

³ Mili sore lea atha God na Maka Lord kulu tha Jesus Christ, ma mili foa ṉado kau uri kamulua,

⁴ Uria na mili roṉoa fitooa kamulua uria tha Christ Jesus, ma liothau la eri na ni ruruumulua uria toa abu eki sui boo,

⁵ Sulaania si do lea eri na mulu manatatoo ṉado uria na kera alua maakwali kamulua i thalo lo, si do eri na mulu roṉoa mai inao asi baea sulia mamana la eri na si faaroṉoa lea,

⁶ Ne fula isamulua; ’uria lau boo e ni ana fanua nei iano ni sui bana me fuṉu ana foee do, alafana lau boo ani kamulua, ita mai afa boṉi eri na mulu bii roṉoa ma mulu thaitoomana mamana lea la tha God;

⁷ Alafana si do na mulu roṉoa na ba atha Epafarasi wane liliothaua kamilia ma wane ni ra ofu la bi kamilia, na nia wane ni ra fitoo tha Christ uri kamulua,

⁸ Ne faaroṉo kamilia lau boo ana liothau la kamulua eri atha Spirit.

⁹ Sulia si kula eri ni kamilia lau boo, ita mai afa boṉi na mili bii roṉoa si do eri, mili foa uri kamulua ta si maṉa si ei ma mili gani, fasi keki faafuṉu kamulua asi lio ana thaitoomana lana si do ne thathamia ana liotooa ni sui bana ma manata lea la atha Spirit,

¹⁰ Fasi muki abula ana abula la ne farana ṉa Lord asi do ki sui bana na kai faalea nia, muki fuṉu ana foee do asi ra ki sui bana ne lea, ma muki baita alaa ana thaitoomana lana tha God;

¹¹ Keki faasukwai kamulua ana sukwaia faamau, sulia rigita la inoto nia, uria si lio ni susuu ṉado la ma uria si lio ni doanita tatha la bia seethathala la;

¹² Muki sore lea ana ṉa Maka, ne adea kuka farana ṉali Iana ta si asi do toa abu eki keki fulatoona i la lalaa la;

¹³ Nia ne faamaruki kulu faisia sukwaia ana maerodo, me lamatalakulua kuka to ana tooa Kaluwane liliothaua nia;

¹⁴ Wane eri na kulu rikia tae la faisi kulu ni ani nia ana ’abuna, na manata lube lana abula taa la kulu ki.

¹⁵ Nia na nuna tha God ne to bana ma kesi riki nia, nia totonao, sui do eki sui bana na kera thauwai nia;

¹⁶ Sulaania kera thauwai nia si do ki sui bana ani nia, si do nai thalo ki ma i fanua nei iano, si do na kera rikidaki ma si do eki ne to bana ma kesi rikia, do ni ono la ana inotoa ki mado toa gwauwai ki mado toa inoto ki mado toa sukwai ki; kera thauwai nia si do ki sui bana ani nia, ma ifana;

¹⁷ Ma nia e to u inao si maṉa na ta si do si to u, ma si do ki sui bana ka ofu ana tee do ani nia.

¹⁸ Ma nia gwauna seedo eri, na ṉa figua: nia na thafali la, ulunao faisia toa na kera mae; fasi nia kai inoto ka tatha asi do ki sui.

¹⁹ Sulaania ṉa Maka e thathamia na nia kai fuṉu asi do lea ki sui bana;

²⁰ Ma kai alua si do ki sui bana kai kwaimani lau bi nia ana Wane eri, uria ana abu eri ana ’ai rarafolo nia e fofolo naa; si do nai fanua nei iano ki ani nia, ma si do nai thalo ki lau boo.

²¹ Ma ni kamulua, na kera lalakwatai kamulua dini mai inao ma liomulua na si lio ana maalimae ki asi ra taa kamulua ba ki, e alu kamulua muka kwaimani lau bi nia

²² Ana seena i talaana uria maea, fasi kai fatai kamulua muki abu ma muki dodoloa ma kesi rikia ta si do na keki sore kamulua fafia inaofana:

²³ Mada sa muki to ṉado asi do eki na kulu fitoona, ma keka faaṉado kamulua muki takwe ṉado, ma kesi idu kamulua faisia si do eri na kulu manatatoo ṉado uria asi faaroṉoa lea na mulu roṉoa, na kera ṉata sulia isana imole eki sui boo na kera thauwai nia ifara thalo lo; si do na kera alu nau tha Polo nau wane ni ra la ania.

²⁴ Nau na ku seethathala i maalutana taa la eki na nau ku to ania uri kamulua, ma kwai faafuṉua ana seeku si do ne ai si fuṉu u ana taa la eki na tha Christ e to ania uria seena, na ṉa figua;

²⁵ Na kera alu nau nau wane ni ra la ania, sulia si do na tha God e takofale nau ania kwai ra ania uri kamulua, uria faamamane lana bae lana tha God,

²⁶ Si do ne toto thaufuni faisia si maṉa nai nao ki sui bana ma faisia unii wane ki sui boo neri: ma si maṉa eri kera fatai nia naa isana toa abu nia ki,

²⁷ Na tha God e thathamii faaroṉoda keka thaitoomana si do eri ma keki rikii do ania uria faainoto lada la asi do eri ne toto thaufuni i maalutana Jenetaele ki, tha Christ ne ni ani kamulua neri, ne adea muki manatatoo ṉado uria inotoa:

²⁸ Wane na mili faaroṉo ania neri, mili ṉata fifi isana wane eki sui boo ma mili kwaifamanatai isana wane eki sui boo ana liotooa faamau, fasi miki fatai nia wane eki sui boo keki sukwai teefau atha Christ Jesus;

²⁹ Ma ku ulafu lau boo uria si kula eri, si maṉa ku aṉasi sulia ra lana ni nia, ne ra sukwai ani nau.