Jude 1 - Ṉa Alaofua Falu 1923 1949

¹ Jude, wane ni ra tha Jesus Christ, doora tha Jemesi, isana toa eki na kera ailida mai, na kera liothau ani kera atha God na Maka, ma kera beta sulida atha Jesus Christ:

² Tatakomia ma enenoa ma liothau la ka oro ka oli alaa iamulua.

³ Toa liliothaua nau ki, si maṉa nau ku seemabe faamau ana kekeda la kau isamulua sulia marukia eri na kulu maruki ania, ruruuku e thathamia e ai si ei kwai kekeda bokau isamulua, kwai soree isamulua muki seemabe ana firu la uria si do eki na kulu fitoona na kera fale teefau naa ania fasi kai to ṉado ifana toa abu eki.

⁴ Sulaania tei wane kera maladala mai, toa na kera kekeda sulida dini u mai inao na keki kwaeda boo fafia si do eri, wane na kera fare faekwa atha God, na kera bulasi garo ana lea la tha God ana daidei la, ma kera sorea kera dora bada atha Lord God na tee nia boo, ma tha Jesus Christ na Lord kulu.

⁵ Mania boro sa mulu thaitoomana mena si do ki sui teefau naa, ku thathamia kwai faaroṉo kamulua lau muki onotoona, na tha Lord, buriana ne faamarukia ta kulee toa faisia fanua i Ijifita, ka bii labatania toa na kesi fitoo.

⁶ Ma angel ki na kesi to sulia to lada mai inao, na kera akwasia fanua kera i talaada, e kani fafia ana nailii thalo na kai to ladoa ki la maerodo maakwalia kotu baita afa boṉi baita eri.

⁷ ’Uria lau boo Sodomo bia Gomora ma toaa susu ki na ni karaṉia toaa eki, sulaania kera alamatai kera ana oe la talafana lau boo angel eki, ma kera rofe iburiana atona see ta do bana, kera kekeda sulida fasi kuki lio uria, kuki thaitoomana, na kera to ana kwae la i la era na kai to tatha.

⁸ Una ena mena, wane eki lau boo ana moosubole la kera ki kera faataalia seena imole, ma keka fare faekwa ana toa gwauwai ki, ma keka ṉata taa uria toa inoto faamau.

⁹ Ma tha Maekela mena, angel inoto eri, si maṉa ba ne firu bia tha devil ma ka oli susuu fafia seena tha Mosesi, e ai si seeraraa fasi kai ṉata taa uri nia, kai alaṉia asi do ki, e sorea, Tha Lord kai sore oe.

¹⁰ Ma toa eki kera ṉata taa uria si do ki sui bana na kesi thaitoomana: ma si do na kera tala thaitoomadaki, ’uria lau boo do maruki kwasi ki na kesi manata, kera labatai kera asi do eki.

¹¹ Taa la kai thauṉi kera! uria na kera lae sulia tala tha Kena, ma kera fita fofoa uria ade garo la na tha Balama e ade garo ania uria malefo ni foli la, ma kera sui teefau ana oli susuu la ’uria tha Kora.

¹² Toa eki neri ne ’uria gwa mai ne to thaufuni ki ana fafaṉa kamulua ki ana liothau la si maṉa na kera faṉa bi kamulua, ma kesi mau ana thare lada la i talaada; si datha ne ai ta si kafo iei, na thauthau kai taria; ’ai ne ai si fuṉu ki asi maṉa na unii do kai rafo, na ka mae ana ro fa mae la, kera lafu fa lalida;

¹³ Asibobo ana kuburu ki, ne thaasi ana si do na kai faaseenoni kera i talaada; fa bubulu na ka lae garo ki, na kera alua rorodoa baita ka tatha na kai maakwalida toto si sui.

¹⁴ Ma sulia wane eki tha Inoka lau boo, fiuna unii wane ita mai atha Adam, e ṉata mala porofeta, ka una eri, Rikia fasi, ṉa Lord e lae mai bia toa abu nia ki na eta eta ka dora,

¹⁵ Fasi ni nia ṉa Wane ni Kotu, kai ṉata sulia toa eki sui boo, ma kai faaseenonia toa eki sui na kera fare faekwa atha God uria si ra kera ana fare faekwa la atha God na kera ilia ka sui bana asi lio ni fare faekwa la kera eri, ma uria aefara la ni sui bana na toa ana abula taa la na kera fare faekwa atha God kera aefara ania.

¹⁶ Wane na kera uubulu taa ki neri, wane na kera kanabaebae, kera abula sulia si thathami la taa kera ki (ma kera sorea si do roṉo lana ka baita faamau ana fokoda), ma uria na kera thathamia todado la, kera rikia imole ki e ai kesi totoo.

¹⁷ Ma ni kamulua, toa liliothaua nau ki, muki onotoona si baea eki na aposela na Lord kulu tha Jesus Christ ki kera ṉata sulia totonao;

¹⁸ Na kera soree isamulua na ba, Asi maṉa iisi toa ni onioṉa la keki fula, na keki abula sulia si thathami la taa kera ki asi lio ni fare faekwa la atha God.

¹⁹ Wane eki neri na kera lae eeta i talaada, toa mala fanua nei iano, na tha Spirit ka ai faisi kera.

²⁰ Ma ni kamulua, toa liliothaua nau ki, muki faasukwai kamulua, ’uria biu baita, fafia si do abu eki na mulu fitoona, muki foa atha Spirit Abu,

²¹ Ma muka beta suli kamulua fasi muki to i la liothau la tha God, si maṉa na muki maakwalia tatakomia na Lord kulu tha Jesus Christ ana marukia tatha.

²² Ma tei toa iada muki tatakomida; musi ade ’uria sa kera sui kera totoo;

²³ Ma tei toa iada muki mau si maṉa na muki lauda mai faisia era; muki lalakwatania boo tooni kera na seena imole e faabilia.

²⁴ Ma sui nia ne sukwai fasi kai rau iamulua faisia taofai lamulua la, ma kai faatakwe kamulua muki dodoloa inaofana inotoa nia ana fula lana mai, ana seethathala la ne baita ka tatha,

²⁵ Tha God na tee nia boo, ne faamaruki kulu, keki taṉoa inotoa nia, gwauwai la, tooa, ma sukwaia, si maṉa eri, ma toto si sui. Emeni.