Jone 7 - Ṉa Alaofua Falu 1923 1949

¹ Buriana si do eki tha Jesus e lae i Galili: uria na nia lalakwa lae i Judia, sulaania Ju ki kera rofea si ade la na keki ilia fasi keki thauṉi nia.

² Sui fafaṉa ba ana Ju ki, fafaṉa i la ooba ki, e kwaikaraṉi naa.

³ Mania doorana kera kera soree isana. Oki lae kau, oko lae uri Judia, fasi toa oe noki toleda keki rikia lau boo ra oe ki noki ilia.

⁴ Uria ne ai ta wane si ili thaufuni ata do, ma ka thathamia keki thaitoomana lalaa ani nia i talaana. Mado so ilia do nei ki, oki fatai oe isana toa na fanua.

⁵ Uria na doorana kera mena e ai kesi fitoona.

⁶ Mania tha Jesus ka soree isada, Si maṉa nau e ai si fula u mai; ma si maṉa kamulua molo ka kwaimaakwali ka toto bana.

⁷ Fanua nei iano sa ka riki kamulua ka taa e ai; nau ana ka riki nau ka taa, uria na nau ku faamamanea si do nau ku thaitoomana sulia, na ra nia ki e taa.

⁸ Kamulua muki tae isana fafaṉa: nau kwasi tae u isana fafaṉa eri; uria na si maṉa nau e ai si mamana u.

⁹ E sorea si do eki isada e sui, ka to lau bana i Galili.

¹⁰ Ma sui buriana na doorana kera kera tae naa isana fafaṉa eri, nia ka tae lau bokau, sui e ai si lae fatai, ma ’uria sa kai thaufuni.

¹¹ Mania Ju ki kera rofe uri nia isana fafaṉa, keka sorea, Nifei nia?

¹² Ma malului wane eki kera uubulu faamau suli nia: tei toa kera sorea, Nia wane kokoto; tei toa lau kera sorea, E ai lau; nia kai tole garo ana malului wane nei.

¹³ Ma sui e ai ta wane si ṉata lalaa suli nia uria na kera mau ana Ju ki.

¹⁴ Ma si maṉa na fa boṉi tolibobola ana fafaṉa eri e fula naa, tha Jesus e tae uri biu baita tha God, ka kwaifamanatai.

¹⁵ Mania Ju ki kera kwele, keka una eri, Nifana ade lana wane nei ka thaitoomana inifita lana si do ki, si do ne ai si too uria?

¹⁶ Tha Jesus e luuda, ka sorea, Kwaifamanataia nau do nau e ai, kwaifamanataia nia ne arasi nau mai.

¹⁷ Mada sa ta wane e susuu uria ili lana si do ni nia e thathamia, nia kai thaitoomana kwaifamanataia eri, mada sa si do tha God neri, mado kwai ṉata bakua i talaaku.

¹⁸ Wane na kai ṉata i talaana kai rofe uria faainoto lana i talaana: ma wane na kai rofe kai faainoto nia ne arasi nia mai, wane eri e mamana, me ai ta do kekeo si ni ani nia.

¹⁹ Ta na sa tha Mosesi e falea ṉa lo ifamulua, me ai ta wane iamulua si ade sulia lo eri, mado? Uria ta na muki rofe uria thauṉi laku?

²⁰ Malului wane eki kera luua, keka una eri, Spirit taa ni ani oe: ni tei na kai rofe uria thauṉi lamu?

²¹ Tha Jesus e luuda, ka soree isada, Nau ku ilia naa tee ra, ma kamulua sui muka kwele.

²² Sulia si kula eri tha Mosesi e falea kwai kakali la iamulua (sui do tha Mosesi e ai, do maka nai nao ki); ma muka kwai kalia ta wane afa boṉi mamaloa.

²³ Mada sa ta wane keki kwai kakali ania afa boṉi mamaloa, fasi e ai kesi ade faisia lo tha Mosesi; rakemulua ka aṉofi nau, uria na ku faamaruki teefau ana wane afa boṉi mamaloa?

²⁴ Musi ṉata mala wane ni kotu sulia ta wane sulaania bana si do mulu rikia, muki ṉata mala wane ni kotu ne kokoto.

²⁵ Mania tei toa ana toa i Jerusalema kera sorea, Wane ba na kera rofe uria thauṉi lana e ai bana nania?

²⁶ Ma lio fasi, nia ṉata lalaa bana, me ai kesi sorea boo ta si isana. Sui toa gwauwai ki kera thaitoomana boo na Christ ba nania, mado ka ai?

²⁷ Sui kulu thaitoomana wane nei ifei ne maṉo mai iei: ma si maṉa na Christ ba kai fula, e ai ta imole si thaitoomana si kula na kai maṉo mai iei.

²⁸ Mania tha Jesus ka ’ai la biu baita tha God, ka kwaifamanatai, ka una eri, Mulu thaitoomaku, ma mulu thaitoomana lau boo si kula ni nau ku maṉo mai iei; ma nau kwasi lae mai i talaaku, nia ne arasi nau mai e mamana, nia na mulu dora ania.

²⁹ Ni nau ku thaitoomana bakua; sulaania ku ita mai ani nia, ma nia arasi nau mai.

³⁰ Mania kera rofe uria si ade la na keki ilia fasi keki rau nia: me ai ta wane si alua abana ani nia, uria na kadee maṉa nia e ai si fula u.

³¹ Sui ana malului wane eki imole oro ki kera fitoona; ma keka sorea, Si maṉa na Christ ba kai fula mai, nia kai ilia bala si do ki kai oro ka tatha asi do eki na wane nei e ilia?

³² Farisi ki kera roṉoa malului wane eki kera uubulutai nia; ma Farisi eki ma wane inoto ni foa ki kera arasia mai toa ni ilido ki sa keki rau nia.

³³ Mania tha Jesus e soree isada, Ta kasi maṉa faekwa u nau kwai to bi kamulua, sui nau kwai lae sani nia ne arasi nau mai.

³⁴ Kamulua do toto muki rofe uri nau, ma musi rofetooku: ma asi kula na nau kwai to iei, kamulua muka dora ana fula la iei.

³⁵ Mania Ju ki kera ṉata kwailiu uri kera, keka una eri, Ma ṉa wane nei kai lae urifei fasi kulu kusi rofetoona? kai lae isana toa na kera lae tataka i maalutana Jenetaele ki, kai kwaifamanatai isana Jenetaele ki?

³⁶ Si baea ta na nia e sorea, Kamulua do toto muki rofe uri nau, ma musi rofetooku: ma asi kula na nau kwai to iei, kamulua muka dora ana fula la iei?

³⁷ Ma afa boṉi iisi, fa boṉi baita ana fafaṉa eri, tha Jesus e takwe, ka ’ai, ka una eri, Mada sa ta wane lione lalaṉa, kai lae mai isaku, kai kuu ana.

³⁸ Wane na kai fitooku, talafana si do kekeda la abu ba e sorea, si kafo maruki ki kai igwa araara mai faisia rakena wane eri.

³⁹ Ma nia ṉata una eri sulia tha Spirit, na toa na kera fitoona toto keki ṉalia: uria na kesi falea u tha Spirit Abu; sulaania na tha Jesus kesi faainotoa u.

⁴⁰ Mania tei toa ana malului wane eki, kera roṉoa si baea eki, keka sorea, Porofeta ba mamana boo nai nia.

⁴¹ Tei toa lau keka sorea, Christ ba nai nia. Sui tei toa lau kera sorea, Nea, ma Christ ba kai maṉo mai i Galili?

⁴² Ta na sa kekeda la abu ba e sorea na Christ kai maṉo mai ana kwalafa tha Defeta, ma i Bethelihemo, toaa na tha Defeta e toto iei, mado?

⁴³ Mania malului wane eki thafali lana kera to ana ro si lio suli nia.

⁴⁴ Ma tei toa iada kera thathamia sa keka rau nia; sui e ai ta wane si alua abana ania.

⁴⁵ Mania toa ni ilido ki kera oli isana wane inoto ni foa ki ma Farisi ki; ma ni kera keka soree isada, Uria ta na musi tole nia mai?

⁴⁶ Toa ni ilido ki kera luuda, keka una eri, E ai ta wane si ṉata u una eri.

⁴⁷ Mania Farisi ki kera luuda, keka una eri, Kera talai garo ani kamulua lau boo?

⁴⁸ Ta wane ana toa gwauwai ki e fitoona, mado ta wane ana Farisi ki?

⁴⁹ Sui malului wane nei na kera dora ana ṉa lo kera alua taa la fafida.

⁵⁰ Tha Nikodimasi ka soree isada (nia ne fula isatha Jesus afa rodo na ba, na wane iada lau boo),

⁵¹ Lo kia ka sorea si do na kai uria imole, mada se ai si roṉoa u inao ana wane eri talaania ma ka thaitoomana si do nia ilia?

⁵² Kera luua, keka soree isana, Ma ni oe wane i Galili lau boo? Oko rofe, ma oki rikia ne ai ta porofeta si maṉo i Galili mai. [

⁵³ Ma kera sui boo keka lae uria biu kera ki: