Jone 6 - Ṉa Alaofua Falu 1923 1949

¹ Buriana si do eki tha Jesus e lae nana uri bali laba i amali i Galili, nai Taebiriasi.

² Ma malului wane baita kera lae iburiana, uria na keka rikia naa bala si do ki ne ilia ana toa na kera matai.

³ Ma tha Jesus e tae uria gwauna gwa tolo eri, ka ono i kula eri bia toa nia ne toleda.

⁴ Ma tathafafi la ba, fafaṉa Ju ki, e kwaikaraṉi naa.

⁵ Mania tha Jesus e tafoa maana, kai rikia malului wane baita na kera fula isana, ka soree isatha Filifi, Ifei na kuki usia berede iei, fasi toa nei ki keki faṉa?

⁶ Ma nia ṉata una eri kai kalu nia: uria ne tala thaitoomana si do nia kai ilia.

⁷ Tha Filifi e luua, ka una eri, Berede na keki usia ana ro taleṉee peni e ai si talaada, fasi kera sui keki ania ta kasi do.

⁸ Tee nonii wane ana toa nia ne toleda, tha Adaru, doorana tha Saimona Pita, ka soree isana,

⁹ Tee wela wane ni kunei ana lima fa bisikete ana bale, ma ro gwa ia: sui ka talaana ufita toa oro nei ki?

¹⁰ Ma tha Jesus ka sorea, Soree isana toa eki keki teoreri iano. Ma loua e oro i kula eri. Mania wane eki kera teoreri, adalua fuliṉana lima tooni wane.

¹¹ Ma tha Jesus e ṉalia bisikete eki; e sorea lea sui, ka ukalia faisia toa ne toleda, ma toa ne toleda keka ukalia faisia toa eri na keki teoreri; ka fale una eri lau boo ana gwa ia eki sulia faṉa lada.

¹² Si maṉa na kera abusu naa, nia ka soree isana toa nia ne toleda, Muki gwea oretana bisikete eki ne teo, fasi e ai ta si si molea.

¹³ Mania kera gwea, tee tafulu nanado ma ro nanado ka fuṉu ana oretana lima bisikete ba ki ana bale, asi do ne teo ki naa na kera abusu faisia.

¹⁴ Mania si maṉa na toa eki kera rikia bala si do eri na tha Jesus e ilia, keka sorea, Porofeta ba mamana boo nai nia na kai lae mai uria fanua nei iano.

¹⁵ Mania tha Jesus e thaitoomana karaṉi naa fasi keki lae mai, keki bare nia kai kiṉa, ka lae lau bana uri gwa tolo eri tee nia.

¹⁶ Ma lalae thaulafi naa, toa nia ne toleda kera sifo uri amali;

¹⁷ Ma keka tae i la foorua, keki tatha i matakwa fasi keki lae uri Kapaneama. Ma fanua e rodo naa, ma tha Jesus e ai si fula u mai isada.

¹⁸ Ma amali kai tae na mai sulaania thauthau baita kai tatha.

¹⁹ Mania si maṉa na kera faluta naa sulia fuliṉana ulu fa maela mado fai fa maela, keka rikia tha Jesus ka talau fafona amali, ka idu karaṉia foorua eri: ma keki mau.

²⁰ Ma ni nia ka soree isada, Ni nau bana nania; musi mamau.

²¹ Mania kera thathamii thathagoni nia mai la foorua: ma si maṉa eri u boo foorua eri ka fula i fanua eri na keka lae uria.

²² Fa boṉi iburiana malului wane eri na kera takwe mai bali asi laba kera rikia ne ai lau ta foorua si to i kula eri, talitoona do eri na toa nia ne toleda kera tae i lala, ma kera rikia lau boo na tha Jesus e ai si tae bia toa nia ne toleda i la foorua eri, toa eri kera lae talifili kera

²³ (Una ena mena, tei foorua ita i Taebiriasi ka tatha karaṉia si kula ba na kera ania bisikete ba ki iei buriana na ṉa Lord e sore lea):

²⁴ Mania si maṉa na malului wane eri kera rikia na tha Jesus e ai si ni kula eri, ma toa nia ne toleda ka ai lau boo, kera tae i la foorua eki, keka fula i Kapaneama, keki rofe uria tha Jesus.

²⁵ Lalae kera fulatoona ana bali asi laba, keka soree isana, Rabae ai, iaṉita no fula kunei?

²⁶ Tha Jesus e luuda, ka sorea, Mamana, mamana ku soree isamulua, Mulu rofe uri nau, uria na mulu rikia bala si do ki e ai, uria bana na mulu ania sina bisikete ba ki, ma muka abusu.

²⁷ Musi rara uria faṉa na toto kai taa, muki ra uria faṉa na kai to ṉado ana marukia tatha, na Kaluwane imole kai falea iamulua: uria nia God na Maka e safua ana do ni faaṉado lana.

²⁸ Mania kera soree isana, Si ta na miki ilia, fasi miki ra ana ra tha God ki?

²⁹ Tha Jesus e luuda, ka soree isada, Ra tha God nania, muki fitoona wane ne arasia mai.

³⁰ Mania kera soree isana, Sui bala si ta noki ilia, fasi mika rikia, miki fitoomu? ra ta noki ra ania?

³¹ Maka kamilia ki kera ania bada na mana ba i la fanua kwasi; uria na kera keda, Ni e falea mai berede i thalo, keka ania.

³² Mania tha Jesus e soree isada, Mamana, mamana, ku soree isamulua, Tha Mosesi e ai ne falea berede ba i thalo iamulua; ma Maka nau ana kai falea ṉa berede mamana i thalo mai iamulua.

³³ Uria na berede tha God ana na kai sifo mai faisia thalo, ma kai falea marukia ana fanua nei iano.

³⁴ Mania kera soree isana, Lord, oki fale ṉado ana berede nei iamilia.

³⁵ Ma tha Jesus ka soree isada, Nau na berede ana marukia: imole na kai lae mai isaku sa ka thaofa e ai, ma imole na kai fitooku liona sa ka lalaṉa lau e ai.

³⁶ Ma nau ku sorea naa isamulua, na mulu riki nau naa, ma musi fitooku.

³⁷ Si do ki sui bana na ṉa Maka kai falea iaku kai lae mai isaku; ma wane na kai lae mai isaku e ai dodoloa kwai arasi nia.

³⁸ Uria nau ku sifo mai faisia thalo, uria ili lana si do nau ku thathamia i talaaku e ai, uria ili lana si do nia ne arasi nau mai e thathamia.

³⁹ Ma si do na ṉa Maka ne arasi nau mai e thathamia nania, se ai ta do ana do eki sui bana ne falea ifaku si aana faisi nau, kwai tataea boo afa boṉi iisi eri.

⁴⁰ Ma si do na nia ne arasi nau mai e thathamia nania, sa ni tei na kai rikia ṉa Kaluwane, ma kai fitoona, ana marukia tatha; ma nau kwai tataea afa boṉi iisi eri.

⁴¹ Mania Ju ki kera uubulu taa suli nia, uria ne sorea, Nau na berede ne sifo mai faisia thalo.

⁴² Ma kera sorea, Tha Jesus, kaluwane tha Josefa, e ai bana nena, wane na maka nia ma thainana kuki thaitoomana bakulua? sui nifana ade lana nia ka sorea naa, Nau ku sifo mai faisia thalo?

⁴³ Mania tha Jesus e luuda, ka soree isada, Musi uuubulu kwailiu i talaamulua.

⁴⁴ E ai ta wane si sukwai fasi kai lae mai isaku, mada sa ṉa Maka ne arasi nau mai e ai si adea kai lae mai: ma nau kwai tataea wane eri afa boṉi iisi.

⁴⁵ Kera keda ana porofeta ba ki, Ma tha God kai faamanatai kera sui. Mania ni tei ne roṉoa ana ṉa Maka, me thaitoomana naa, kai lae mai isaku.

⁴⁶ Uria na ta wane se rikia naa ṉa Maka e ai, talitoona bana nia ne ita mai atha God, nia e rikia ṉa Maka.

⁴⁷ Mamana, mamana, ku soree isamulua, Wane ne fitooku, ana marukia tatha.

⁴⁸ Nau berede ana marukia.

⁴⁹ Maka kamulua ki kera ania mana ba i la fanua kwasi, sui kera mae naa.

⁵⁰ Berede ne sifo mai faisia thalo nania, fasi ta wane kai ania ta si ania, ma ka ai si mae.

⁵¹ Nau na berede maruki na ku sifo mai faisia thalo: mada sa ta wane kai ania ta si ana berede nei, nia kai maruki toto si sui: ma berede na nau kwai falea na ṉa seeku, na nau kwai falea ifana marukia toa na fanua nei iano.

⁵² Mania Ju ki kera firu ni ṉata bi kera i talaada, keka una eri, Wane nei kai fale ufita ana seena ifakulua, kuki ania?

⁵³ Mania tha Jesus e soree isada, Mamana, mamana, ku soree isamulua, Mada se ai musi ania seena Kaluwane imole ma musi kuufia abuna, marukia e ai si ni ani kamulua.

⁵⁴ Ni tei bana na kai ania seeku ma kai kuufia abuku ana marukia tatha; ma nau kwai tataea afa boṉi iisi.

⁵⁵ Sulaania seeku na ṉa faṉa mamana boo, ma abuku do ni kuu mamana boo.

⁵⁶ Imole na kai ania seeku ma kai kuufia abuku ka to ani nau, ma ni nau kwa to ani nia.

⁵⁷ Talafana ṉa Maka ne maruki e arasi nau mai, ma nau ku maruki sulia ṉa Maka; alafana lau boo imole na kai ani nau, nia kai maruki lau boo suli nau.

⁵⁸ Berede ne sifo mai faisia thalo nania: ’uria maka kamulua ba ki kera ania mana, sui kera mae, e ai: imole na kai ania berede nei kai maruki toto si sui.

⁵⁹ Si do eki nia sorea i la biu ni ofu la, si maṉa no kwaifamanatai i Kapaneama.

⁶⁰ Mania toa oro ana toa nia ne toleda kera roṉoa, keka sorea, Si ṉata afetai nania; ni tei na kai roṉoa kai thaitoomana?

⁶¹ Ma sui tha Jesus, uria ne thaitoomana i talaana na toa nia ne toleda kera uubulu asi do eri, ka soree isada, Do eri kai faataofai kamulua?

⁶² Sui ka ufita mada sa muka rikia Kaluwane imole kai tae lau uria si kula ne toto iei inao?

⁶³ Na spirit ana kai faamarukia ta do; seena e ai si ilia boo ta do ania: si baea ba ki na ku soree isamulua, kera na spirit, ma marukia.

⁶⁴ Sui tei toa iamulua musi fitoo. Uria tha Jesus e thaitoomana u bomai ana thafali la ni tei kera na kesi fitoo, ma ni tei na toto kai faaalamai nia.

⁶⁵ Ma nia sorea, Uria si kula eri ku sorea naa isamulua, na ta wane si sukwai fasi kai lae mai isaku, mada sa ṉa Maka e ai si faasukwai nia mai.

⁶⁶ Ma si maṉa eri boo toa oro ana toa nia ne toleda keka oli nada, kesi lae lau bi nia.

⁶⁷ Mania tha Jesus ka soree isana akwala ma ro wane ba ki, Ma ni kamulua lau boo muki thathamii lae kau?

⁶⁸ Tha Saimona Pita e luua, ka una eri, Lord, miki lae sani tei lau? oe si baea ni marukia tatha ni isamu.

⁶⁹ Ma kamilia mili fitoo ma mili thaitoomana ni oe Christ ba, Kaluwane ṉa God ne maruki.

⁷⁰ Tha Jesus e luuda, ka una eri, Ta na sa nau ku talisi kamulua tee akwala eri ma ro nonii wane, ma tee wane iamulua na ṉa spirit taa!

⁷¹ Nia ka ṉata sulia tha Judasi neri kaluwane tha Saimona Isikarioto, uria nia wane na toto kai faaalamai nia, wane ana akwala ma ro wane ba ki.