Jone 4 - Ṉa Alaofua Falu 1923 1949

¹ Mania si maṉa na ṉa Lord e thaitoomana na Farisi ki kera roṉoa naa na toa na tha Jesus ka toleda ma ka babataesida kera oro ka tatha ana toa tha Jone ki

² (Sui tha Jesus talani nia e ai si babataesi, toa nia ne toleda ana keki ilia),

³ Nia lae faisia Judia, ka tatha lau uri Galili.

⁴ Ma nia kai tatha e ai si ei boo i Sameria.

⁵ Mania nia lalae mai ka fula ana tee toaa susu i Sameria, thatana Saeka, karafia kasi fanua ba na tha Jekofo e falea ifana kaluwane nia na tha Josefa:

⁶ Ma malaui kafo tha Jekofo e ni kula eri. Mania tha Jesus e feda ana laea, ka ono i ninimana malaui kafo eri. Ma si maṉa eri fuliṉana ona si kadee thato.

⁷ Tee kini i Sameria e lae mai kai ufia kafo: tha Jesus ka soree isana, Falea mai, kwai kuu.

⁸ Uria na toa nia ne toleda kera lae ada uri la toaa susu, keki usi ada ta faṉa.

⁹ Mania kini i Sameria eri ka soree isana, Uria ta na ni oe, no Ju, oki gani nau uria kuu la, nau ṉa kini i Sameria? (Uria na Ju ki kesi kwaimani bia toa i Sameria.)

¹⁰ Tha Jesus e luua, ka soree isana, Mado so thaitoomana si do na tha God ka tona falea bana, ma ni tei na kai soree isamu, Falea mai, kwai kuu; ni oe oki gani nia, ma ni nia kai falea si kafo ana marukia iamu.

¹¹ Kini eri ka soree isana, Arai ena ae, oe e ai amua ta do ni ufi lana kafo, ma malaui kafo nei ka sifo ladoa: sui ifei noki ṉalia mai si kafo ana marukia eri iei?

¹² Oki inoto ka tatha ana maka kamilia tha Jekofo, ne falea mai malaui kafo nei iamilia, ma nia ka kuu ania, ma kaluwane nia ki, ma aini sifi nia ki lau boo?

¹³ Tha Jesus e luua, ka soree isana, Ni tei bana na kai kuu ana kafo nei lalae liona kai lalaṉa lau:

¹⁴ Ma ni tei bana na kai kuu ana kafo ni nau kwai falea ifana liona sa ka lalaṉa lau tai si maṉa e ai; kafo eri na nau kwai falea ifana kai ni ruruuna ’uria ta ruka‐mauri kai tae mai ana marukia tatha.

¹⁵ Kini eri ka soree isana, Arai ena ae, falea mai kafo eri iaku, fasi lioku si lalaṉa, kwasi aṉasi ana tala tau kwa ufia kafo i kunei.

¹⁶ Tha Jesus ka soree isana, Lae, oko ailia kwaimu, moki lae mai.

¹⁷ Kini eri e luua, ka sorea, E ai akua ta kwai. Tha Jesus ka soree isana, Si do no sorea e too, ne ai amua ta kwai:

¹⁸ Sulaania o totoowane ana lima nonii wane sui naa; ma nia na ka to isamu si maṉa eri kwaimu e ai: si do mamana no sorea neri.

¹⁹ Kini eri ka soree isana, Arai ena ae, ku riki oe ṉa porofeta.

²⁰ Maka kamilia ki kera fofoa bada i gwauna gwa tolo nei; ma ni kamulua muki sorea, Jerusalema bonaa na si kula sa imole keki foa iei.

²¹ Tha Jesus ka soree isana, Kini ena, oko fitoona bae laku, si kadee maṉa eri e karaṉi na mai, si maṉa na toto musi foa naa ana ṉa Maka i gwauna gwa tolo nei, ma i Jerusalema ka ai lau boo.

²² Kamulua muka foa ana thatana do na mulu dora ania: ni kamilia mika foa ana thatana ni nia na mili thaitoomana naa: uria marukia eri thafalia mai ana Ju ki.

²³ Si kadee maṉa eri karaṉi na mai, ma ka fula naa, si maṉa toa na keki foa mamana keki foa mamana ana ṉa Maka ana spirit kera: uria na ṉa Maka kai rofea toa una eki keki foa ani nia.

²⁴ Tha God na ṉa Spirit: ma toa na keki foa ania keki foa mamana ana spirit kera.

²⁵ Kini eri e soree isana, Nau ku thaitoomana Mesaia toto kai fula (na kera alaṉia ana ṉa Christ): e fula sui, kai bii fatai nia si do ki sui bana isakulua.

²⁶ Tha Jesus ka soree isana, Nau na kwai ṉata isamu, nau ni nia.

²⁷ Asi maṉa eri toa nia ne toleda keka fula; keka kwele na nia ka ṉata bia ta kini; sui e ai ta wane si sorea, Si ta noki rofea? mado, Oki ṉata bi nia uria ta?

²⁸ Mania kini eri ka ekwa ana kwadee do ana kafo nia, ka lae nana uri la toaa susu, ka soree isana wane ki,

²⁹ Lae mai, muki rikia wane, ne faaroṉo nau mai asi do ki sui bana na nau ku ilia: Christ be ai bana nena?

³⁰ Mania kera lae kau faisia toaa susu eri, kere lae na mai uria fula la isana.

³¹ Ma si maṉa na kesi fula u mai, toa ne toleda kera ṉata kwaitakoi isana, keka una eri, Rabae ae, oki faṉa.

³² Ma ni nia ka soree isada, Faṉa nau ni ani lana kai to bana na musi thaitoomana.

³³ Mania toa eki keka soetooda kwailiu, Ta wane e ṉalia mai ta si faṉa iana?

³⁴ Tha Jesus ka soree isada, Faṉa nau na ade la sulaania si do ni nia ne arasi nau mai e thathamia, ma ili lana ra nia.

³⁵ Kamulua musi sosorea, Ta fai madami ni u, ma keki kasia unii do rafo? rikia fasi, ku soree isamulua, Tafoa maamulua, muki lio uria oolee do ki, ka kwakwaoa naa uria kasi lana.

³⁶ Ma wane na kai kasia kai ṉalia foli lana, ma kai ofua foee do uria marukia tatha; fasi wane ne fasia ma wane na ka kasia keko ofu mai ana seethathala la.

³⁷ Uria na si ṉata eri e mamana asi kula eri, Ta wane ka fasia, ma ta wane eeta kai kasia.

³⁸ Nau ku arasi kamulua mulu kasia unii do ki na musi ulafu ania: toa eeta kere ululafu, ma kamulua mulu ṉalia si do na kera ulafu ania.

³⁹ Ma toa oro ana toa i Sameria na ni toaa susu eri kera fitoona uria ṉata lana kini eri, ne faamamanea si do ne thaitoomana, ka una eri, Nia e faaroṉo nau mai asi do ki sui bana na nau ku ilia.

⁴⁰ Mania si maṉa na toa i Sameria eki kere fula isana, keka ṉata kwaitakoi, keka sorea sa ka to bida: ma nia e to kula eri sulia ro fa boṉi.

⁴¹ Ma toa oro lau boo kera fitoona sulia bae lana;

⁴² Ma keka soree isana kini eri, Si maṉa eri miki fitoona sui, sulaania bae lamu e ai: uria ni kamilia mili roṉoa bae lana i talaamilia, mika thaitoomana na nia Christ ba mamana boo, Wane na kai faamarukia toa na fanua nei iano.

⁴³ Ma ro fa boṉi eki e sui, nia lae faisia si kula eri, ka tatha i Galili.

⁴⁴ Uria na tha Jesus talani nia e faamamanea si do ne thaitoomana na kesi fare baita ata porofeta i fanua nia.

⁴⁵ Mania si maṉa ne fula i Galili, toa i Galili kera thathagoni nia mai, uria na kera rikia naa si do eki sui bana ne ilia i Jerusalema isana fafaṉa: uria ni kera lau boo keka lae isana fafaṉa eri.

⁴⁶ Mania tha Jesus ka fula lau i Kena, fanua i Galili, asi kula ne sorea kafo ba ka lioe waene. Ma tee wane inoto e to bana, kaluwane nia e matai i Kapaneama.

⁴⁷ Si maṉa na wane eri e roṉoa na tha Jesus e lae faisia Judia, e fula naa i Galili, nia ka lae isana, ka ṉata kwaitakoi isana sa ka sifo mai, kai faamarukia kaluwane nia, uria na wela eri karaṉii mae naa.

⁴⁸ Mania tha Jesus e soree isana, Si maṉa na musi rikia bala si do ki ma do ni kwele la ania, sa muki fitoo e ai.

⁴⁹ Wane inoto eri ka soree isana, Arai ena ae, oki sifo mai si maṉa na wela nau si mae u.

⁵⁰ Tha Jesus e soree isana, Oko lae amua kaluwane oe e maruki naa. Ma wane eri e fitoona si baea na tha Jesus e soree isana, ka lae nana.

⁵¹ Ma si maṉa na nia sifo kau, toa ni ra nia ki kera toda ani nia, keka faaroṉo nia ana kaluwane nia, ne maruki naa.

⁵² Mania nia soetooda si kadee thato ta na nia thafalii akwa. Keka soree isana, I roo ana fiuna si kadee thato si fule eri ka sigi naa faisi nia.

⁵³ Mania maka nia e thaitoomana kadee thato eri na ṉa maṉa na tha Jesus e soree isana, Kaluwane oe e maruki naa: ma ni nia e fitoo, ma toa ni sui na ni maafera nia lau boo.

⁵⁴ Bala ruana si do nai nia na tha Jesus e ilia, si maṉa ne lae nana faisia Judia ka fula i Galili.