Jone 20 - Ṉa Alaofua Falu 1923 1949

¹ Afa boṉi totonao ana uiki ni Meri Makadaline e lae mai la si makafukafua, ka fula isana kwaiṉeia eri, ka rikia gwa fau na kera idua naa faisia.

² Mania nia fita, ka fula isatha Saimona Pita, bia wane ba na tha Jesus e tole nia, ma ka liothau ania, ka soree isadaroa, Kera ṉalia naa ṉa Lord faisia kwaiṉeia, ma ni kamilia mili dora asi kula na kera alu nia iei.

³ Mania tha Pita e lae kau, ma ruana wane eri lau boo, keko lae kau uria kwaiṉeia eri.

⁴ Ma kero fita ofu nadaroa: sui ruana wane eri ka talua tha Pita, ka fula totonao isana kwaiṉeia;

⁵ Me agwaoro ma ka lio i lala, ka rikia si maku kwakwaoa ki kai teo bana; ma sui e ai si kotho iei.

⁶ Mania tha Saimona Pita ka fula lau bomai iburiana, ka kotho i la kwaiṉeia; ma nia lio ka rikia si maku kwakwaoa ba ki ka teo,

⁷ Ma maku faekwa, na kera afua ana gwauna, ne ai si teo isana maku kwakwaoa ki, ka teo tee nia ata kula eeta.

⁸ Mania ruana wane eri na tha Jesus e tole nia, ne fula totonao isana kwaiṉeia, e kotho lau bokau, ma nia rikia, ma ka fitoo.

⁹ Uria na kesi thaitoomana u kekeda la abu eri, na nia kai tatae lau faisia toa mae ki.

¹⁰ Mania wane eki na tha Jesus e toledaroa keko oli naa uri biu keroa.

¹¹ Sui ni Meri e takwe i thara isana kwaiṉeia, kai aṉi: mania, si maṉa nia aṉi, ka agwaoro, ka lio i la kwaiṉeia;

¹² Ka rikia ro angel ana tooni kwakwaoa ki keko ono badaroa, ta do isana gwauna, ta do isana aena, asi kula na seena tha Jesus e teo iei.

¹³ Ma keko soree isana, Kini ena ae, uria ta noki aṉi? Ni nia e soree isadaroa, Uria na kera ṉalia Lord nau, ma nau ku dora asi kula na kera alu nia iei.

¹⁴ Buriana ne ṉata una eri e sui, nia akele buri, ka rikia tha Jesus kai takwe, sui e ai si thaitoomana na nia tha Jesus.

¹⁵ Tha Jesus ka soree isana, Kini ena ae, uria ta noki aṉi? ni tei noki rofea? Nia, manatana e sorea sa wane ana beta lana ra eri, ka soree isana, Arai ena ae, mado so ṉali nia faisia si kula eri, oko faaroṉo nau mai asi kula no alu nia iei, ma nau kwai ṉalia faisia.

¹⁶ Tha Jesus ka soree isana, Meri. Nia akele, ka soree isana, Rabonae; ma toolaṉai lana si ṉata eri, na Wane ni Kwaifamanatai.

¹⁷ Tha Jesus ka soree isana, Osi sua nau; uria ni nau e ai kwasi tae u isana Maka nau: oko lae isana dooraku kera, oko faaroṉo kera, Nau kwai tae kau isana Maka nau ma Maka kamulua, isana God nau ma God kamulua.

¹⁸ Ni Meri Makadaline ka fula, ka faaroṉoa toa na tha Jesus e toleda, Nau ku rikia ṉa Lord; ma ka faaroṉo kera na nia sorea si do eki isana.

¹⁹ Mania lalae e thaulafia naa, afa boṉi eri, fa boṉi totonao ana uiki, asi maṉa na kera fonoa naa maa asi kula na toa eki na tha Jesus e toleda kera to iei, uria na kera mau ana Ju ki, tha Jesus e lae mai, ka takwe i maalutada, ka soree isada, Enenoa kai to ani kamulua.

²⁰ Buriana ne ṉata una eri, ka fatai nia ro aba nia ki ma ninimana rakena isada. Mania toa ne toleda kera seethathala, si maṉa na kera rikia ṉa Lord.

²¹ Mania tha Jesus ka sorea lau isada, Enenoa kai to ani kamulua; talafana ṉa Maka e arasi nau mai, alafana lau boo kwai arasi kamulua.

²² Buriana ne sorea si do eri, nia ufu fafi kera, ka soree isada, Muki ṉalia tha Spirit Abu:

²³ Ni tei bana na kamulua muki doanita ana abula taa la nia ki, kera doanita bonaa ani nia; ni tei bana na muki sorea abula taa la nia ki kai to fafi nia, kai to bonaa fafia.

²⁴ Ma tha Tomasi, tee nonii wane ana akwala ma ro wane ba ki, na kera alaṉia atha Didimasi, e ai si ni isada si maṉa na tha Jesus e fula.

²⁵ Mania toa eri ne toleda keka soree isana, Kamilia mili rikia ṉa Lord. Sui ni nia e soree isada, Mada sa nau e ai kwasi rikia fuila neila i ro aba nia ki, ma kwasi rete sulia fuila neila eki ana kukuku, ma kwasi rete sulia ninimana rakena ana abaku, nau sa kwa fitoo e ai.

²⁶ Ma kwalu fa boṉi e sui, toa nia ne toleda kera to lau i la biu, ma tha Tomasi ka ni bida. Tha Jesus e fula mai, si maṉa na kera fonoa naa maa, ka takwe i maalutada, ka sorea, Enenoa kai to ani kamulua.

²⁷ Sui nia soree isatha Tomasi, Falea mai kukumu, oki rikia ro aba nau ki; ma oko falea mai abamu, oki rete ania i ninimana rakeku: ma osi fitala, oki fitoo.

²⁸ Ma tha Tomasi e luua, ka soree isana, Lord nau ma God nau.

²⁹ Tha Jesus ka soree isana, Tomasi, uria no riki nau bamua, oko fitoo: lea iada, toa na kesi rikia, ma sui kera fitoo.

³⁰ Mania bala si do oro ki lau tha Jesus e ilia isana toa nia ne toleda, na kesi keda ana buka nei:

³¹ Ma si do nei ki kera keda, fasi muki fitoona tha Jesus ṉa Christ, Kaluwane tha God; ma uria na mulu fitoo, muki maruki ana thatana.