Jone 2 - Ṉa Alaofua Falu 1923 1949

¹ Ma ula fa boṉi tee nonii wane e tolekini i Kena, fanua i Galili; ma thainana tha Jesus e ni kula eri:

² Ma keki laetia tha Jesus lau boo, bia toa nia ne toleda, ka lae mai isana lumaa eri.

³ Ma si maṉa na waene ka sui, thainana tha Jesus e soree isana, E ai ada ta waene.

⁴ Tha Jesus ka soree isana, Kini ena, si ra oe neri, mado si ra nau? si kadee maṉa nau e ai u.

⁵ Thainana ka soree isana toa ni ra ki, Atona bana ta si do nia kai soree isamulua, muki ilia.

⁶ Ma kera takwelaṉania ono kwadee do ana kafo kula eri, na kera thauwai nia ana fau, do ana kafo ni sisiu la, uria biraṉana Ju ki, ka farana too ro audatha baita ki mado too ulu audatha baita ki.

⁷ Tha Jesus ka soree isada, Muki lula kwadee do nei ki ana kafo, kai fuṉu. Ma kera lula ka fuṉu makisi.

⁸ Ma nia soree isada, Muki iṉoa ta si si maṉa eri, muki ṉalia isana wane ne inoto ana fafaṉa. Ma kera ṉalia.

⁹ Ma si, maṉa na wane eri ne inoto ana fafaṉa e kuutoona kafo eri ne lioe waene, ma ka dora ana maṉo lana mai (sui toa ni ra ki na kera iṉoa kafo eri keka thaitoomana), wane eri ne inoto ana fafaṉa ka ailia mai wane falu eri,

¹⁰ Ma ka soree isana, Toa ni sui keki alu totonao asi waene ne lea; ma buriana na kera kukuu baita naa, keki bii alua si do ne ai si lea faamau: ma ni oe o alua si waene ne lea uria maṉa eri.

¹¹ Do nei, thafali lana bala si do nia ki, tha Jesus e ilia i Kena, fanua i Galili, ka fatai nia inotoa nia; ma toa ni ne toleda keka fitoona.

¹² Buriana si do eri e sifo uri Kapaneama, nia, ma thainana, ma doorana kera, bia toa nia ne toleda: ma keka to iei sulia aṉee fa boṉi.

¹³ Ma tathafafi la ba, fafaṉa Ju ki, e kwaikaraṉi naa, ma tha Jesus e tae uri Jerusalema.

¹⁴ Ma i la biu baita tha God nia fulatoona toa na kera usi ana buloka ki ma sifi ki ma bola ki, ma toa na kera tatala ana malefo keka ono bada iei:

¹⁵ Ma nia e nailia naili ana si kwao, ka tarida sui faisia biu baita eri, sifi ki ma buloka ki lau boo; ma ka kikira malefo toa eki na keki tatala ana malefo, ka kefua tatafe kera ki;

¹⁶ Ma nia soree isana toa na kera usi ana bola ki, Muki ṉalia kau do nei ki; musi adea na biu Maka nau ana biu ni usi la.

¹⁷ Ma toa nia ne toleda keka onotoona na kera keda, Biu oe kai oga nau, kai to fifi iaku.

¹⁸ Mania Ju ki kera luua, keka soree isana, Bala si do ta oki fatai nia isamilia, uria noko ilia si do nei ki?

¹⁹ Tha Jesus e luuda, ka soree isada, Muki ogea biu tha God nania, ma nau kwai kasia lau ana ulu fa boṉi.

²⁰ Mania Ju ki keka sorea, Kera ra sulia fai tafulu fa ṉali ma ono fa ṉali, keka kasia biu baita nei, ma ni oe oki kasia ana ulu fa boṉi?

²¹ Ma nia e ṉata sulia seena na ṉa biu tha God.

²² Mania si maṉa na kera tataea naa faisia toa mae ki, toa nia ne toleda kera onotoona na nia e sorea si do eri isada; ma keka fitoona kekeda la eri, ma si baea eri na tha Jesus e sorea.

²³ Ma si maṉa nia e ni Jerusalema ana tathafafi la ba, si maṉa ana fafaṉa eri, toa oro kera fitoona thatana, uria na kera rikia bala si do ne ilidaki,

²⁴ Sui tha Jesus e ai si takofale nia iada, uria ne thaitoomana wane ki sui bana,

²⁵ Ma uria nia ai si rofe sa ta wane kai faamamanea ta si do sulia imole; sulaania talani nia e thaitoomana si do na ni ruruuna imole.