Jone 17 - Ṉa Alaofua Falu 1923 1949

¹ Si do eki tha Jesus e sorea; sui ka tafoa maana uria ṉa thalo, ka sorea, Maka ae, si kadee maṉa e fula naa; oki faainotoa Kaluwane oe, fasi Kaluwane oe kai faainoto oe lau boo:

² ’Uria lau boo o alu nia kai inoto ana imole ni sui bana, fasi toa eki sui boo no falea naa iana, nia kai falea marukia tatha ifada.

³ Ma marukia tatha eri nai nia, na keki thaitoomamu God na talitoomu o mamana, bia keki thaitoomana tha Jesus Christ, no arasi nia mai.

⁴ Nau ku faainoto oe i fanua nei iano, ku faasuia naa ra no falea ifaku kwai ilia.

⁵ Ma si maṉa eri, Maka ae, oki faainoto nau ani oe i talaamu ana inotoa ba na ku rikia bi oe si maṉa na fanua nei iano e ai si to u bana.

⁶ Nau ku fatai nia thatamu isana wane ba ki no falea mai iaku faisia fanua nei iano: wane oe ki na ni kera, mo fale kera ifaku; ma kera ade sulia bae lamu.

⁷ Si maṉa eri kera thaitoomana na si do ki sui bana no falea ifaku ka ita mai ani oe:

⁸ Uria na si baea ba ki no falea mai iaku ni nau ku falea iada; ma kera ṉalia, kera thaitoomana mamana boo na nau ku lae mai ku ita ani oe, ma kera fitoo no arasi nau mai.

⁹ Nau ku gani ifada: e ai kwasi gani ifana fanua nei iano, ifana toa no falea ifaku; uria ni kera toa oe ki:

¹⁰ Ma do nau ki ni sui bana do oe ki, ma do oe ki do nau ki: ma kera faainoto nau ani kera.

¹¹ Ma nau e ai kwasi to lau i fanua nei iano, sui toa nei ki keki to bada i fanua nei iano, ma nau kwai lae kau isamu. Maka Abu ae, oko beta suli kera ana thatamu no alaṉi nau ania, fasi ni kera tee do boo, ka ’uri koro.

¹² Si maṉa ni nau ku to isada i fanua nei iano, ku beta sulida ana thatamu no alaṉi nau ania: ma nau ku fono toi kalida, me ai ta wane iada si aana, talitoona boo wane eri na kera tooa kai sui; fasi kekeda la abu ba kai mamana.

¹³ Ma si maṉa eri ku lae kau isamu; ma si do nei ki nau ku sorea i fanua nei iano, fasi ruruuda kai fuṉu ana seethathala la nau.

¹⁴ Nau ku falea bae lamu iada; ma fanua nei iano e rikida ka taa, sulaania ni kera do fanua nei iano e ai, ’uria lau boo ni nau ṉa do fanua nei iano e ai.

¹⁵ Nau e ai kwasi gani oe oki ṉalida faisia fanua nei iano, ku gani oe oki beta sulida faisi nia ne taa.

¹⁶ Ni kera do fanua nei iano e ai, ’uria lau boo ni nau ṉa do fanua nei iano e ai.

¹⁷ Oki faaabu kera ana mamana la: bae lamu na ṉa mamana la eri.

¹⁸ Talafana o arasi nau mai ana fanua nei iano, talafana lau boo ni nau ku arasida kau ana fanua nei iano.

¹⁹ Ma ifadalua ku faaabu nau i talaaku, fasi ni kera lau boo keki faaabuda ana mamana la eri.

²⁰ Ma nau e ai kwasi gani uria toa nei ki talifili kera, uria toa eki lau boo na lalae keki fitooku sulia ṉata lada;

²¹ Fasi kera sui keki tee do boo; talafana ni oe, Maka, o to ani nau, ma ni nau ani oe, fasi ni kera lau boo keki to ani koro: fasi fanua nei iano kai fitoo no arasi nau mai.

²² Ma inotoa ba no falea ifaku ni nau ku falea ifada; fasi ni kera tee do boo, ka ’uri koro;

²³ Ni nau ani kera, ma ni oe ani nau, fasi keki ofuda ana tee do; ma fasi fanua nei iano kai thaitoomana no arasi nau mai, mo liothau ani kera, ’uria lau boo o liothau ani nau.

²⁴ Maka ae, toa no falea ifaku, nau ku thathamia, si kula na nau kwai to iei, ni kera lau boo keki to bi nau; fasi keki rikia inotoa nau, no falea ifaku: uria no liothau ani nau si maṉa na kesi boa u fanua nei iano.

²⁵ Maka kokoto ae, fanua nei iano e ai si thaitoomamu; nau ku thaitoomamu; ma toa nei ki kera thaitoomana no arasi nau mai;

²⁶ Ma nau ku fafaaroṉo kera ana thatamu, ma kwai faaroṉo kera ania; fasi liothau la eri no liothau iaku kai to ani kera, ma ni nau ani kera.