Jone 15 - Ṉa Alaofua Falu 1923 1949

¹ Nau na ṉa faene mamana, ma Maka nau na ṉa wane ni ra ana oolee faene eri.

² Atona bana ta tharee do na ni ani nau ma ka ai si fuṉu ana foee do ki, nia kai ṉalia faisi nau: ma atona bana ta tharee do na ka fuṉu ana foee do ki, nia fuloa, fasi kai fuṉu ana foee do oro ka tatha.

³ Si maṉa eri mulu falu naa sulaania si baea na nau ku soree isamulua.

⁴ Muki to ani nau, ma ni nau ani kamulua. Talafana tharee do eri e ai si tala fuṉu ana foee do ki, mada se ai si ṉado ana faene; alafana lau boo ni kamulua musi fuṉu ana foee do ki, mada se ai musi to ani nau.

⁵ Nau na ṉa faene, kamulua ṉa tharee do ki: wane na kai to ani nau, ma ni nau ani nia, wane eri kai fuṉu ana foee do oro ki: uria ni nau e ai faisi kamulua musi talaana ili lana ta si do.

⁶ Mada sa ta wane e ai si to ṉado ani nau, kera naṉa ani nia ’uria ta tharee do, kai dele bonaa; ma kera ofuda, keki u anida i la era, ma kai akofida.

⁷ Mada sa muki to ṉado ani nau, ma bae laku kai to ṉado ani kamulua, muki gania ta si ta na muki thathamia, ma keki ilia ifamulua.

⁸ Si do na kai faainotoa Maka nau nai nia, na muki fuṉu ana foee do oro ki; fasi ni kamulua toa nau kwai tole kamulua.

⁹ ’Uria lau boo ṉa Maka e liothau ani nau, nau ku liothau ani kamulua: muki to ṉado ana liothau la nau.

¹⁰ Mada sa mulu ade sulia si ṉata fifi nau ki, muki to ṉado ana liothau la nau; ’uria lau boo ni nau ku ade sulia si ṉata fifi Maka nau ki, ma kwai to ṉado ana liothau la nia.

¹¹ Si do eki ku soree isamulua, fasi seethathala la nau kai to ani kamulua, ma muki fuṉu ana seethathala la.

¹² Si ṉata fifi nau nai nia, Muki liothau kwailiu ani kamulua, talafana lau boo ni nau ku liothau iamulua.

¹³ E ai ta wane ana liothau la ne baita ka tatha asi do nei, na ta wane kai falea maṉona uria toa ne ado bida.

¹⁴ Ni kamulua toa na muki ado bi nau, mada sa muki ilia si do eki sui bana na nau ku faaroṉo kamulua ania.

¹⁵ E ai kwasi alaṉi kamulua lau ana wane ni ra ki; uria na wane ni ra e dora asi do na wane inoto nia ka ilia: nau ku alaṉi kamulua ana toa na muki ado bi nau; uria na si do ki sui bana na nau ku roṉoa ana Maka nau nau ku faaroṉo kamulua ania.

¹⁶ Kamulua e ai musi fili nau, nau na ku fili kamulua, ku alu kamulua, fasi muki lae, muki fuṉu ana foee do ki, bia fasi foee do kamulua eki kai to ṉado: fasi atona bana ta si do na muki gania ana ṉa Maka ana thataku, nia kai falea iamulua.

¹⁷ Si do eki ku faaroṉo kamulua, muki liothau kwailiu ani kamulua.

¹⁸ Mada sa fanua nei iano ka riki kamulua ka taa, mulu thaitoomana e riki nau ka taa totonao.

¹⁹ Mada sa ni kamulua do fanua nei iano ki, do fanua nei iano kai liothau asi do nia ki i talaana: sui uria ni kamulua do fanua nei iano ki e ai, ma nau ku fili kamulua faisia fanua nei iano, uria si kula eri fanua nei iano kai riki kamulua ka taa.

²⁰ Muki onotoona si baea ba na nau ku soree isamulua, Wane ni ra e ai si baita si tatha ana wane inoto nia. Mada sa kera tona ilamatai nau, keki tona ilamatai kamulua lau boo; mada sa kera ade sulia bae laku, keki ade lau boo sulia bae lamulua.

²¹ Ma si do eki sui bana lalae keki ilia iamulua inunufana thataku, uria na kesi thaitoomana nia ne arasi nau mai.

²² Mada sa nau e ai kwasi lae mai, kwasi ṉata isada, abula taa la si to fafida: sui si maṉa eri e ai lau ta si do ana suusi lana abula taa la kera.

²³ Wane na kai riki nau ka taa kai rikia Maka nau ka taa lau boo.

²⁴ Mada se ai kwasi ilia ra eki i maalutada na ta wane eeta si ilia, abula taa la si to fafida: sui si maṉa eri ni nau ma Maka nau lau boo, kera riki kamarea naa ma kera riki kamarea ka taa lau boo.

²⁵ Sui si do eri ka mamana, fasi si baea ba kai mamana na kera keda ana lo kera, Kera tona riki nau ka taa.

²⁶ Ma lalae nia na kai faainamaruki kamulua e fula naa, na nau kwai arasia mai isamulua ka ita ana ṉa Maka, na Spirit mamana, na kai ita mai ana ṉa Maka, nia kai faamamanea si do ne thaitoomana suli nau.

²⁷ Ma ni kamulua lau boo muki faamamanea si do na muka thaitoomana, uria na mulu to bi nau ka too mai ana thafali la.