Jone 14 - Ṉa Alaofua Falu 1923 1949

¹ I la ruruumulua si tataa: mulu fitoona tha God, fitooku lau boo.

² I la biu Maka nau kadee biu oro ki ni iei; mada se ai, do ku faaroṉo kamulua naa. Nau kwai lae uria beta lana fanua maakwali kamulua.

³ Ma sui uria na nau kwai lae ma kwai beta fanua maakwali kamulua, nau kwai oli lau mai, kwai thathagoni kamulua mai isaku; fasi si kula na nau kwai to iei, muki to lau boo iei.

⁴ Ma si kula na nau kwai lae uria, mulu thaitoomana bamulua tala eri.

⁵ Tha Tomasi ka soree isana, Lord, kamilia mili dora asi kula noki lae uria; ma mika thaitoomana ufita tala eri?

⁶ Tha Jesus ka soree isana, Nau na ṉa tala, ma ṉa mamana la, ma ṉa marukia: e ai ta imole si lae mai isana ṉa Maka ata tala eeta, talitoona ani nau.

⁷ Mada sa mulu thaitoomaku, mulu thaitoomana Maka nau lau boo: ma ita asi maṉa eri ka lae alaa muka thaitoomana, ma mulu rikia naa.

⁸ Tha Filifi ka soree isana, Lord, oko fatai nia ṉa Maka isamilia, ma si do faamau bonaa iamilia neri.

⁹ Tha Jesus ka soree isana, Nau ku toto isamulua ka tau naa, osi thaitoomaku u Filifi? Wane ne riki nau e rikia ṉa Maka; nifana ade lana noko sorea, Oko fatai nia ṉa Maka isamilia?

¹⁰ Osi fitoo na nau ku ni ana ṉa Maka, ma ṉa Maka ni ani nau? si baea eki na nau ku soree isamulua kwasi sorea i talaaku: ṉa Maka ana na ni ani nau kai ilia ra nia ki.

¹¹ Muki fitooku na nau ku ni ana ṉa Maka, ma ṉa Maka ni ani nau: mado muki fitooku inunufana ra eki.

¹² Mamana, mamana, ku soree isamulua, Wane na kai fitooku, ra ni nau kwai ilidaki nia toto kai ilia lau boo; ma ra ne baita ka tatha ana do eki nia kai ilia; uria ni nau kwai lae isana Maka nau.

¹³ Ma atona bana ta si do na muki gania ana thataku, si do eri kwai ilia, fasi keki faainotoa ṉa Maka ana ṉa Kaluwane.

¹⁴ Mada sa muki gani nau uria atona bana ta si do ana thataku, si do eri kwai ilia.

¹⁵ Mada sa mulu liothau iaku, do muki ade sulia si ṉata fifi nau ki.

¹⁶ Ma nau kwai gania ana ṉa Maka, ma nia kai falea ta Wane lau iamulua na kai faainamaruki kamulua, fasi nia kai to bi kamulua toto si sui;

¹⁷ Nia na ṉa Spirit mamana: na fanua nei iano ka dora ana thathagoni lana; uria ne ai si riki nia, ma ka ai si thaitoomana lau boo: ni kamulua mulu thaitoomana; uria nia kai to bana isamulua, ma toto kai ni ani kamulua.

¹⁸ Nau sa kwa akwasi kamulua muka inamae e ai: kwai lae mai isamulua.

¹⁹ Ta kasi maṉa faekwa ni u, sui fanua nei iano ka ai si riki nau lau; ma ni kamulua muki riki nau: uria ni nau ku maruki, muki maruki lau boo.

²⁰ Lalae afa boṉi eri muki thaitoomana boo na nau ku ni ana Maka nau, ma ni kamulua mulu ni ani nau, ma ni nau ani kamulua.

²¹ Wane ana si ṉata fifi nau ki, ma ka ade sulia, nia na wane na kai liothau iaku: ma wane ne liothau iaku Maka nau kai liothau ani nia, ma nau kwai liothau ani nia, ma kwai fatai nau isana.

²² Tha Judasi (Isikarioto e ai) ka soree isana, Lord, si ta ne fula na ni oe toto oki fatai oe isamilia, ma isana fanua nei iano ka ai?

²³ Tha Jesus e luua, ka soree isana, Mada sa ta wane ka liothau iaku, nia kai ade sulia bae laku: ma Maka nau kai liothau ani nia, ma kamarea meki lae kau, meki to ana kadee biu kamarea isana.

²⁴ Wane ne ai si liothau ani nau e ai si ade sulia bae laku: ma si baea na muki roṉoa do nau e ai, do ṉa Maka ne arasi nau mai.

²⁵ Si do eki ku soree isamulua, si maṉa ku ni u isamulua.

²⁶ Ma Nia na kai faainamaruki kamulua, tha Spirit Abu, na ṉa Maka toto kai arasia mai ana thataku, nia kai tooa si do ki sui bana isamulua, ma kai faaroṉo kamulua lau asi do eki sui boo na nau ku soree isamulua, muki onotoona.

²⁷ Enenoa ku akwasia isamulua; enenoa nau, kwai falea iamulua: ’uria fale lana fanua nei iano e ai, kwai falea iamulua. I la ruruumulua si tataa, ma ka ai si mamaula.

²⁸ Kamulua mulu roṉoa ba nau ku soree isamulua, Nau kwai lae nakua, sui kwai lae mai isamulua. Mada sa mulu liothau iaku, mulu seethathala, uria ni nau kwai lae isana ṉa Maka: uria na Maka nau e baita ka tatha ani nau.

²⁹ Ma sui ku faaroṉo kamulua naa ania si maṉa ne ai si mamana u, fasi lalae e mamana naa, muki fitoo.

³⁰ Nau e ai kwasi ṉata oro lau bi kamulua, uria na nia ne inoto ana fanua nei iano toto kai lae mai: me ai ta do si ni ifana ani nau;

³¹ Ma sui fasi fanua nei iano kai thaitoomana na nau ku liothau ana ṉa Maka, ma talafana si do na ṉa Maka e faaroṉo nau mania, si do eri nau ku ilia. Tatae, kuki lae nakulua.