Jone 13 - Ṉa Alaofua Falu 1923 1949

¹ Ma si maṉa na fafaṉa ba ana tathafafi la e ai u, tha Jesus e thaitoomana kadee maṉa nia ne fula naa na nia kai lae faisia fanua nei iano, kai lae isana ṉa Maka, e liothau ana toa nia ki na ni fanua nei iano, me liothau faamau iada.

² Ma si maṉa na kera ni ana fafaṉa i thaulafia, ma tha devil e ṉata naa i ruruuna tha Judasi Isikarioto, kaluwane tha Saimona, fasi ka faaalamai nia,

³ Tha Jesus, ne thaitoomana na ṉa Maka e falea si do ki sui bana i abana, ma nia e lae mai ka ita atha God, ma kai oli lau isatha God,

⁴ Ka tatae faisia faṉa la, ka tanusia tooni nia ki, ka alua kau; ka ṉalia si thala ana usu lana seena imole, ka afisi nia ania.

⁵ Sui nia kikia ta si kafo i la do ni sisiu, ka thafalia ka taua aaena toa ne toleda, ma ka usua ana thala eri na nia e afisi nia ania.

⁶ Me lae mai ka fula atha Saimona Pita. Ma tha Pita ka soree isana, Lord, ni oe, oki taua aaeku?

⁷ Tha Jesus e luua, ka soree isana, Si do kwai ilia osi thaitoomana si maṉa eri; sui do toto oki thaitoomana bamua.

⁸ Tha Pita ka soree isana, E ai dodoloa oki taua aaeku. Tha Jesus e luua, ka una eri, Mada sa kwasi taufi oe, oe ṉa do nau e ai.

⁹ Tha Saimona Pita ka soree isana, Lord, talitoona aaeku e ai, ro aba nau ki lau boo ma gwauku.

¹⁰ Tha Jesus ka soree isana, Wane ne sisiu naa e ai si thathamia lau tau lana, aaena bana kai taua, nia falu teefau: ma ni kamulua mulu falu, una ena kamulua sui e ai.

¹¹ Uria ne thaitoomana wane na kai faaalamai nia; mania nia ka sorea, Musi falu si sui.

¹² Ma buriana ne taua aaeda e sui, ma ka ṉalia tooni nia ki, ma ka teoreri lau, nia ka soree isada, Muki thaitoomana maalutana si do nau ku ilia ani kamulua?

¹³ Muki alaṉi nau ana Wane Inoto, ma, Lord: ma mulu ṉata ka too; uria ni nau do eri mamana boo.

¹⁴ Mania mada sa ni nau, ṉa Lord ma ṉa Wane Inoto, ku taua aaemulua, kula sa muki ilia lau boo na muki taua aaemulua kwailiu.

¹⁵ Uria nau ku ilia si do nei fasi muki lio sulia, muki ade lau boo ’uria ade la na nau ku ilia iamulua.

¹⁶ Mamana, mamana, ku soree isamulua, Wane ni ra e ai si baita si tatha ana wane inoto nia; ma wane na kera arasia mai e baita si tatha ani nia ne arasi nia mai.

¹⁷ Mada sa mulu thaitoomana si do eki, kai lea iamulua mada sa muki ilia.

¹⁸ Nau kwasi ṉata suli kamulua sui: ku thaitoomana toa na nau ku filida naa: sui fasi kekeda la abu ba kai mamana, Wane na ka ania berede nau e taka ani nau ana bora aaena.

¹⁹ Too asi maṉa eri ku faaroṉo kamulua ania si maṉa ne ai si mamana u, fasi, lalae kai mamana naa, muki fitoo na nau ku to bakua.

²⁰ Mamana, mamana, ku soree isamulua, Wane na kai thathagonia ni tei bana na nau kwai arasia isana, kai thathagoni nau; ma wane na kai thathagoni nau kai thathagoni nia ne arasi nau mai.

²¹ Buriana na tha Jesus e ṉata una eri e sui, liona ka dila faamau, ka faamamanea si do ne thaitoomana, ka sorea, Mamana, mamana, ku soree isamulua, Tee nonii wane iamulua kai faaalamai nau.

²² Mania toa ne toleda kera lio kwailiu uri kera, manatade rurua sulia ni tei ne ṉata sulia.

²³ Tee nonii wane ana toa nia ne toleda e to isana tatafe, ka teoreri i ruruuna tha Jesus, wane na tha Jesus e liothau ania.

²⁴ Mania tha Saimona Pita ka fafuilala uria wane eri, ’uria sa ka soree isana, Oko faaroṉo kamilia ana wane na nia kai ṉata sulia.

²⁵ Ni nia e bosuli ana ruruuna tha Jesus, ka soree isana, Lord, ni tei neri?

²⁶ Mania tha Jesus e luua, ka una eri, Nia neri, na nau kwai tonia si faṉa ifana, ma kwai falea. Ma nia tonia si faṉa eri e sui, ka falea ifatha Judasi, kaluwane tha Saimona Isikarioto.

²⁷ Ma buriana si faṉa eri, tha Satan ka kotho i ruruuna. Mania tha Jesus e soree isana, Si do noki ilia, ili fofoa ania.

²⁸ Me ai ta wane isana tatafe eri si thaitoomana si do ne ṉata una eri isana uria.

²⁹ Uria na tei toa manatade una eri, sa uria na tha Judasi wai malefo eri ni isana, na tha Jesus e soree isana, Oki usia si do na kuki rofedaki ana fafaṉa; mado, kai falea ta si do ana toa na kesi rikii do ki.

³⁰ Ma nia e ṉalia si faṉa eri, ka kotho u boo i maa: ma fanua e rodo naa.

³¹ Mania buriana ne lae naa, tha Jesus ka sorea, Si maṉa eri kera faainotoa Kaluwane imole, ma keka faainotoa tha God ani nia;

³² Lalae kera faainotoa tha God ani nia, tha God lau boo kai faainotoa Kaluwane imole eri ani nia i talaana, ma si maṉa eri u boo na nia kai faainoto nia.

³³ Kala wela ki, ta kasi maṉa faekwa kwai to u isamulua. Toto muki rofe uri nau: ma talafana lau boo na nau ku sorea naa isana Ju ki, Si kula na nau kwai lae uria, kamulua muka dora ana fula la iei; ku ṉata una eri isamulua lau boo si maṉa eri.

³⁴ Si ṉata fifi falu nau ku falea iamulua, Sa muki liothau kwailiu ani kamulua; talafana lau boo ni nau ku liothau iamulua, muki liothau kwailiu ani kamulua lau boo.

³⁵ Asi do eri toa ni sui bana keki thaitoomana na ni kamulua toa nau ku tole kamulua, mada sa muki liothau kwailiu ani kamulua.

³⁶ Tha Saimona Pita ka soree isana, Lord, ifei noki lae uria? Tha Jesus e luua, ka una eri, Si kula na nau kwai lae uria, o dora ana fula la iei iburiaku si maṉa eri; sui do toto oki lae lau boo iburi.

³⁷ Tha Pita ka soree isana, Lord, uria ta na kwai dora ana lae la iburiamu si maṉa eri boo? Nau kwai falea maṉoku uri oe.

³⁸ Tha Jesus e luua, ka una eri, Oki falea maṉomu uri nau? Mamana, mamana, ku soree isamu, Si maṉa na kukua e ai si ’ei u, ni oe ulu fa sore lana oki sorea o dora bamu iaku.