Jone 11 - Ṉa Alaofua Falu 1923 1949

¹ Ma tee nonii wane e matai, tha Lasarasi i Bethani mai, toaa ni Meri ma doorana na ni Matha.

² Meri eri ba e gwaia ṉa Lord ana gwai ba, ma ka usua aaena ana ifuna, na waiwaena nia na tha Lasarasi e matai.

³ Mania ro wai doorana eki keroa kwaiarasi kau isana, keko una eri, Lord, rikia fasi, wane ba no liothau ani nia e matai.

⁴ Si maṉa na tha Jesus e roṉoa, nia ka sorea, Mataia nei sa ka maelia e ai, do ana inotoa tha God, fasi keki faainotoa Kaluwane tha God ania.

⁵ Ma tha Jesus e liothau ani Matha, bia doorana, ma tha Lasarasi.

⁶ Mania si maṉa nia roṉoa ne matai, nia ka to u sulia ro fa boṉi asi kula na nia toto iei.

⁷ Sui iburiana nia soree isana toa ne toleda, Lae mai, kuki lae si lau uri Judia.

⁸ Toa ne toleda kera soree isana, Rabae ae, e ai si tau u bana na Ju ki kera rofe uria ufaumu la; ma oki lae lau uria si kula eri?

⁹ Tha Jesus e luuda, ka una eri, Ta na sa tee tafulu kadee thato ma ro si kadee thato ni ana fa thato, mado? Mada sa ta wane kai lae i la thato, nia e ai si taofai nia, uria ne rikia ṉa lalaa la i fanua nei iano.

¹⁰ Sui mada sa ta wane ka galo afa rodo, nia taofai nia, sulia ṉa lalaa la e ai si ni ani nia.

¹¹ Si do eki nia sorea: ma sui iburiana nia soree isada, Dooraka na tha Lasarasi kai biṉa ana; sui kwai lae, fasi kwai tharasi nia faisia biṉa la.

¹² Mania toa ne toleda kera sorea, Lord, mada sa nia kai biṉa, nia kai maruki.

¹³ Do tha Jesus e ṉata sulia mae lana: ma ni kera manatada sa nia e ṉata sulia wane kai mamalo i la biṉa.

¹⁴ Mania tha Jesus ka faaroṉo fatai ani kera, ka soree isada, Tha Lasarasi e mae naa.

¹⁵ Me lea iaku ifamulua na nau kwasi toto isana, fasi muka fitoo; una ena mena, kuki lae akulua isana.

¹⁶ Mania tha Tomasi, na kera alaṉi nia atha Didimasi, ka soree isana toa keki tole nia bida, Kuki lae lau boo, fasi kuki mae bi nia.

¹⁷ Mania tha Jesus lalae e fula, ka fulatoona ne to naa i la kwaiṉeia sulia fai fa boṉi.

¹⁸ Ma Bethani e ni karaṉia Jerusalema, karaṉia ta ro maele;

¹⁹ Ma toa oro ana Ju ki kera lae mai sani Matha ma sani Meri, keka faainamaruki keroa sulia waiwaena keroa eri.

²⁰ Mania si maṉa ni Matha e roṉoa tha Jesus kai lae na mai, e lae ka toda ania: ma ni Meri e ono u bana i maafera.

²¹ Mania ni Matha e soree isatha Jesus, Lord, mado so toto i kunei, waiwaena nau sa ka mae e ai.

²² Ma si maṉa eri mena, nau ku thaitoomana na atona bana ta do noki gania atha God, tha God kai falea iamu.

²³ Tha Jesus ka soree isana, Waiwaena oe toto kai tatae lau.

²⁴ Ni Matha ka soree isa na, Nau ku thaitoomana na nia kai tatae lau ana tatae la ba faisia maea afa boṉi iisi.

²⁵ Tha Jesus ka soree isana, Nau ṉa tatae la faisia maea, ma ṉa marukia: wane na kai fitooku, ka mae mena, do kai maruki:

²⁶ Ma ni tei bana ne maruki ma kai fitooku toto sa ka mae e ai, Oki fitoona si do eri?

²⁷ Nia soree isana, Iu, Lord: ku fitoo naa na ni oe Christ ba, Kaluwane tha God, wane na kera maakwali oe oki lae mai i fanua nei iano.

²⁸ Ma buriana ne sorea si do eri, nia ka lae kau, ka aili thaufuni ana doorana na ni Meri, ka una eri, Wane ni Kwaifamanatai be ni kunei, ma kai aili oe mai.

²⁹ Ma ni nia, si maṉa ne roṉoa, e tatae fofoa, ka lae isana.

³⁰ (Ma tha Jesus e ai si fula u mai ana toaa eri, ka to u asi kula na ni Matha e toda ania iei.)

³¹ Mania Ju ki na kera to bi nia i maafera keki faainamaruki nia, si maṉa na kera rikia ni Meri kai tatae fofoa, ka kotho i maa, keka lae iburiana, manatada sa nia ka lae isana kwaiṉeia fasi kai aṉi kula eri.

³² Mania ni Meri, si maṉa nia fula asi kula na tha Jesus ni iei, ma ka riki nia, ka asi nia iano isana aaena, ka una eri isana, Lord, mado so toto i kunei, waiwaena nau sa ka mae e ai.

³³ Mania si maṉa na tha Jesus e riki nia kai tatao, ma Ju eki lau boo keki tatao na kera lae mai bi nia, nia kwai baita i ruruuna, ma liona ka dila,

³⁴ Ka sorea, Mulu alu nia ifei? Kera soree isana, Lord, lae mai, oki rikia.

³⁵ Tha Jesus ka aṉi.

³⁶ Mania Ju ki kera sorea, Rikia fasi liothau la ne liothau ani nia!

³⁷ Sui tei toa iada kera sorea, Wane nei, ne ifinia maana wane ba na maane boko, e ai si talaana sa kai adea sa wane nei lau boo ka ai si mae?

³⁸ Mania tha Jesus e kwai baita lau nana, ka lae mai isana kwaiṉeia. Ma kwaiṉeia eri na ṉa maufi, ma tee gwa fau e teo isana.

³⁹ Tha Jesus ka sorea. Muki idua gwa fau ena. Ni Matha, waiwaena wane eri ne mae, ka soree isana, Lord, si maṉa eri nia makwa taa naa: uria na fai fa boṉi e sui naa ani nia na nia e mae.

⁴⁰ Tha Jesus ka soree isana, Ta na ba ku soree isamu, na mada sa oko fitoo, do oki rikia inotoa tha God?

⁴¹ Mania keka idua gwa fau eri faisia si kula na kera alua wane eri ne mae. Ma tha Jesus e lio alaa, ka sorea, Maka ae, ku sore lea iamu uria no roṉoa ṉata laku.

⁴² Ma nau ku thaitoomana noki roṉoa ṉado bamua: sui sulaania malului wane nei na keki takwe kakali ku sorea, fasi keki faamamanea no arasi nau mai.

⁴³ Ma nia ṉata una eri e sui, ka ’ai ana ’ai la baita, Lasarasi, oki kotho mai i maa.

⁴⁴ Ma nia ne mae ka kotho mai i maa, na kera kani fafia abana ma aena ana maku ni afu lana wane mae; ma kera afua maana ana maku faekwa. Tha Jesus ka soree isada, Luke nia, muki alamatania kai lae.

⁴⁵ Mania toa oro ana Ju ki, na kera lae mai sani Meri ma kera rikia si do na tha Jesus e ilia, keki fitoona.

⁴⁶ Sui tei toa iada kera lae kau isana Farisi ki, keka faaroṉoda asi do na tha Jesus e ilidaki.

⁴⁷ Mania wane inoto ni foa ki ma Farisi ki kera ofua mai tee ofu la, ma keka sorea, Ta neri na kuki ilia? uria na wane eri ka ilia bala si do oro ki.

⁴⁸ Mada sa kuki to faisi nia una eri, imole ni sui keki fitoona: ma toa i Roma toto keki lae mai, keki ṉalia fanua kulu ma kulee toa kulu lau boo faisi kulu.

⁴⁹ Ma sui tee wane iada, tha Kaiafasi, uria nia aofia ni foa afa ṉali eri, ka soree isada, E ai dodoloa musi thaitoomana ta si do,

⁵⁰ Ma musi filoa na do e lea ifakulua sa ta tee nonii wane kai mae uria toa eki, ada kulee toa eri sui boo ka sui teefau.

⁵¹ Ma si do eri nia e ai si sorea i talaana: uria nia aofia ni foa afa ṉali eri, ka ṉata mala porofeta, ka sorea na tha Jesus toto kai mae uria kulee toa eri;

⁵² Ma talitoona uria kulee toa eri e ai, fasi kai ofua lau boo ana tee si do wela tha God ki na kera foatata anida.

⁵³ Mania ita afa boṉi eri ka lae alaa keki furia ṉata suli nia si ade la na keki ilia fasi keka thauṉi nia.

⁵⁴ Mania tha Jesus e ai si lae fatai lau i maalutana Ju ki, ka lae faisia si kula eri uria fanua na ni karaṉia na fanua kwasi, uri la toaa susu thatana Ifiremu; ma nia to iei bia toa nia ne toleda.

⁵⁵ Ma tathafafi la ba ana Ju ki e kwaikaraṉi naa: ma toa oro kera lae faisia fanua kakali ki mai, kera tae uri Jerusalema si maṉa na tathafafi la e ai si fula u mai, fasi keki faafalu kera.

⁵⁶ Mania kera rofe uria tha Jesus, ma keka ṉata kwailiu, si maṉa na kera takwe i la biu baita tha God, keka una eri, Nifana manatamulua? Sa nia ka ai si fula isana fafaṉa?

⁵⁷ Ma wane inoto ni foa ki ma Farisi ki kera sorea naa, sa mada sa ta wane e thaitoomana si kula ne ni iei, kai faatai nia, fasi keki rau nia.