Jone 10 - Ṉa Alaofua Falu 1923 1949

¹ Mamana, mamana, ku soree isamulua, Wane ne ai si kotho mai ana maethaka i la thakali sifi ki, ka raa mai ata kula eeta, nia wane ana bili la ma wane na kai laulau.

² Ma nia na ka kotho mai ana maethaka, nia wane kai fono toi kalia sifi eki.

³ Nia wane ni ifini lana maethaka kai ifi uri nia; ma sifi eki keki roṉoa liṉana ṉata lana: ma nia ’ai thatana sifi nia ki, ka toleda kau.

⁴ Ma si maṉa na nia e arasia do nia ki ni sui i maa, nia tatha inaofada, ma sifi eki keki lae iburiana: uria na kera thaitoomana liṉana ṉata lana.

⁵ Ma ta wane eeta sa keka lae iburiana e ai, keki thaka faisi nia: uria na kesi thaitoomana liṉana ṉata lana toa eeta ki.

⁶ Si tarifula eri tha Jesus e uunu sulia isada: sui kera dora ana maalutana si do ne uunu sulidaki isada.

⁷ Mania tha Jesus e soree lau isada, Mamana, mamana, ku soree isamulua, Nau ṉa maethaka ana sifi ki.

⁸ Toa ni sui na kera lae mai inao kera toa ana bili la ma toa na keki laulau: sui sifi eki e ai kesi roṉoa ṉata lada.

⁹ Nau na ṉa maethaka: mada sa ta wane kai kotho mai ani nau, keki faamaruki nia, ma kai kotho mai ma kai kotho kau, kai fulatoona faṉa nia.

¹⁰ Wane ana bili la e ai si lae mai uria ta do lau, talitoona fasi kai bili, ma kai kwaithauṉi, ma kai labatania: ni nau ku lae mai fasi keki maruki, ma keki sukwai.

¹¹ Ni nau ṉa wane ade lea na ku fono toi kalia sifi ki: wane ade lea eri ka falea maṉona uria sifi eki.

¹² Wane na kera usi nia, wane ni fono toi la kalia sifi e ai neri, wane ṉa sifi nia ki e ai, e rikia koito kwasi kai lae mai, kai akwasia sifi eki, ma ka thaka nana, ma koito kwasi eri ka lauda, ka ilia na keka thaka kwailiu:

¹³ Nia kai thaka uria nia ṉa wane na keki usia bada, ma ka ai si oga nia uria sifi eki.

¹⁴ Ni nau ṉa wane ade lea na ku fono toi kalia sifi ki; ma nau ku thaitoomana si do nau ki, ma si do nau ki kera thaitoomaku,

¹⁵ Talafana lau boo ṉa Maka ka thaitoomaku, ma ni nau ku thaitoomana ṉa Maka; ma nau ku falea maṉoku uria sifi eki.

¹⁶ Ma nau akua tei sifi lau, na kesi to i la thakali nei: kera lau boo kwai tolea mai e ai si ei boo, ma keki roṉoa liṉana ṉata laku; ma toto keki ofu ana tee aini sifi, ma tee wane ni fono toi la kalida.

¹⁷ Na Maka kai liothau iaku uria si kula eri, uria na ku falea maṉoku, fasi toto kwai ṉalia lau bakua.

¹⁸ E ai ta imole si ṉalia faisi nau, nau talani nau ku falea. Sukwaia ni isaku fasi kwa falea, bia fasi kwa ṉalia lau. Si do na Maka nau e faaroṉo nau mania nai nia.

¹⁹ Ma Ju ki thafali lana kera to lau ana ro si lio sulia si baea eki.

²⁰ Ma toa oro iada kera sorea, Spirit taa ni ani nia, ma nia oewanea; uria ta na muki roṉoa ṉata lana?

²¹ Tei toa lau kera sorea, Si ṉata eki ṉata lana wane spirit taa ni ani nia e ai. Spirit taa e thaitoomana ifini lana maana toa maade boko?

²² Ma si maṉa eri fafaṉa ana faaabu lana biu baita tha God i Jerusalema: si maṉa ana unii gwagwaria;

²³ Ma tha Jesus kai liliu i la biu baita eri la taofa tha Solomona.

²⁴ Mania Ju ki kera lae mai kakali nia, keka soree isana, Ta fita fa boṉi oki adea manatamilia kai rurua? Mado so Christ ba, oki faaroṉo fatai ani kamilia.

²⁵ Tha Jesus ka luuda, ka una eri, Ku faaroṉo kamulua naa, sui musi fitoo: ra ba ki na nau ku ilia ana thatana Maka nau, keka faamamane nau.

²⁶ Sui musi fitoo, uria na ni kamulua do ana sifi nau ki e ai; si do nau ku soree isamulua na ba neri.

²⁷ Sifi nau ki kera roṉoa liṉana ṉata laku, ma nau ku thaitoomada, ma kere lae iburiaku:

²⁸ Ma nau ku falea marukia tatha ifada; ma toto kesi sui, me ai ta imole si lauda faisia abaku.

²⁹ Maka nau, ne faleda iaku, e sukwai ka tatha asi do ki sui bana; me ai ta imole si talaana lau lada faisia abana Maka nau.

³⁰ Ni nau ma ṉa Maka, kamarea tee Do boo.

³¹ Mania Ju ki kera ra lau uria fau ki fasi keki ufauna.

³² Tha Jesus e luuda, ka una eri, Ra oro lea ki ne ita ana Maka nau ku fatai nia naa isamulua; nifenia si ra ana ra eki muki ufauku fafia?

³³ Ju ki kera luua, keka una eri, Misi ufaumu uria ta ra lea e ai, uria si ṉata ana fare toliṉi lana tha God; ma uria ni oe, no imole ni bana, oko alaṉi oe ana God.

³⁴ Tha Jesus e luuda, ka una eri, Ta na sa kera keda ana lo kamulua na ba, Nau ku sorea, Kamulua god ki, mado?

³⁵ Mada sa nia alaṉida ana god ki, toa na bae lana tha God e lae mai isada (ma kekeda la abu eri kesi ade faisia),

³⁶ Muki sorea suli nia, na ṉa Maka e faaabua ma ka arasi nia mai la fanua nei iano, O ṉata ana fare toliṉi lana tha God; uria na ku sorea, Nau Kaluwane tha God?

³⁷ Mada se ai kwasi ilia si ra Maka nau, musi fitooku.

³⁸ Sui mada sa ku ilia boo, musi fitooku mena, muki fitoona si ra eki: fasi muki thaitoomana ma muki faamamanea na ṉa Maka ni ani nau, ma ni nau ku ni ani nia.

³⁹ Mania kera rofe lau uria rau lana: ma nia e lae nana faisia abada.

⁴⁰ Me tatha lau uri bali laba i Jodana asi kula na tha Jone e babataesi iei totonao: ma ka to i kula eri.

⁴¹ Ma toa oro kera lae mai isana; ma keka sorea, Tha Jone molo e ai si ilia bana bala ta si do: sui si do ki sui bana na tha Jone e sorea sulia wane nei e mamana.

⁴² Ma toa oro kera fitoona i kula eri.