Jemesi 4 - Ṉa Alaofua Falu 1923 1949

¹ Firu la ki ma kwaithauṉi la ki i maalutamulua ita mai ifei? Ta na sa i kunei, asi do mulu thathamidaki fasi ka faalea kamulua, si do na ka firu ana si do na ana seemulua ki, mado?

² Mulu thathamia si do ki, ma musi rikia: mulu thauwane, ma mulu thathamia faamau, ma musi talaana fulatoona lana: mulu kwaithauṉi ma mulu firu; una ena mena, musi rikia, uria ne ai musi gania.

³ Mulu gania, ma musi ṉalia, uria na mulu gani garo ania, fasi muka arua asi do na kai faalea kamulua i talaamulua.

⁴ Kamulua wane ma kini ni oe la ki, musi thaitoomana na ado la bia fanua nei iano na ṉa firu la bia tha God?

⁵ Mado mulu manataia na kekeda la abu eri ṉa tonee ṉata? Tha Spirit ne to ani kulu kai thathamia si do ki ka fula ana uga la?

⁶ Ma nia falea lea la ka oro ka tatha. Mania e sorea, Tha God ka suusia toa na kera fafakao kera, ma ka falea lea la ifana toa na kera thafee to faekwa.

⁷ Mania muki roo sulia tha God; muki suusia tha devil, ma nia kai thaka faisi kamulua.

⁸ Muki idu karaṉia tha God, ma ni nia kai idu karaṉi kamulua. Faafalua ro aba kamulua ki, toa na mulu abula taa; ma faathathaulia ruruumulua, kamulua toa amulua ro si lio.

⁹ Kai taa iamulua, muki tatao, ma muki eṉi: waela la kamulua kai lioe tatao la, ma seethathala la kamulua kai lioe kulua la.

¹⁰ Muki abula seseka inaofatha Lord, ma ni nia kai faabaita kamulua.

¹¹ Musi ṉata taa kwailiu i seemulua, doora kera. Wane na ka ṉata taa i seena doorana, mado ka ṉata mala wane ni kotu sulia doorana, ka ṉata taa sulia ṉa lo, ma ka ṉata mala wane ni kotu ana ṉa lo: ma sui mada sa oki ṉata mala wane ni kotu ana ṉa lo, oe wane osi ade sulia ṉa lo, oe wane ni kotu ania.

¹² Tee nia boo ka alua ṉa lo ma ka Wane ni Kotu, ni nia ne sukwai fasi kai kwaifaamaruki ma ka kwailabatai: ma ni oe ni tei fasi oki ṉata mala wane ni kotu sulia wane oe?

¹³ Lae si mai si maṉa eri, kamulua na mulu sorea, Itaraena mado usuwadi kuki lae nakulua uria toaa susu loko, kuki to sulia tee fa ṉali i kula eri, kuki usia do ni todado kulu ki, kuki toda tei malefo;

¹⁴ Si maṉa na muka dora ania si do na kai fula mai usuwadi. Ṉa ta ni ana to lamulua? Sulaania ni kamulua si datha, na ka to fatai mai sulia ta kasi maṉa seseka bana, ma sui ka aana.

¹⁵ Uria ne kokoto na muka sorea, Mada sa ṉa Lord ka thathamia, kuka maruki bakulua, ma kuki ilia lau boo si do nei mado si do eri.

¹⁶ Ma si maṉa eri mulu seethathala ana uunaona la kamulua eki: seethathala la una eri ni sui bana na ṉa do taa.

¹⁷ Mania wane na ka thaitoomana ili lana lea la, ma sui ka ai si ilia, abula taa la nia ni bana.