Jemesi 2 - Ṉa Alaofua Falu 1923 1949

¹ Doora kera, si maṉa na muki rau asi do eki na kulu fitoona sulia Lord kulu tha Jesus Christ, ana inotoa, musi rikia imole ki ’uria sa kesi totoo.

² Sulaania mada sa ta wane ka kotho mai ana biu ni ofu la kamulua fafia kome ana goloda, ma fafia tooni seelea, ma ta wane ne ai si rikii do ka lae lau bomai fafia si maku ne lafu taa;

³ Ma muka fare baita ana wane ana tooni seelea eri, muka soree isana, Oko ono kunei asi kula ne lea; ma muka soree isana wane eri ne ai si rikii do, Oko takwe loko, mado oki ono bamua i fara do ni alu lana aaeku i fafona;

⁴ Musi rikia imole ki ’uria sa kesi totoo, ma musi wane ni kotu ki manatamulua ka taa?

⁵ Muki roṉoa fasi, doora liliothaua nau ki; ta na sa tha God e filia toa na kesi rikii do i fanua nei iano, keki rikii do ana fitooa, ma keki fulatoona tooa eri ne alaṉai nia ana toa na keki liothau ani nia, mado?

⁶ Ma ni kamulua mulu fare faekwa ana wane ne ai si rikii do. Musi thaitoomana na toa eki na kera rikii do kera malataa ani kamulua, ma talani kera kera aba kamulua muki lae inaona do ni ono la wane ni kotu ki?

⁷ Kesi ṉata ni faretoliṉi lana thata lea eri na kera alaṉi kamulua ania?

⁸ Mada sa mulu ade sulia ṉa lo ne inoto ka tatha, sulia kekeda la abu eri, Oki liothau ana wane oe ’uria oko liothau ani oe i talaamu, muki abula lea neri:

⁹ Ma mada sa muka rikia imole ki ’uria sa kesi totoo, muki abula taa, ma ṉa lo ka faaseenoni kamulua mala toa na mulu ade faisia.

¹⁰ Uria na ni tei na kai ade sulia lo eri laulau, ma sui kai taofai nia ana tee si kula, nia abula taa bonaa.

¹¹ Sulaania ni nia ne sorea, Osi oee, e sorea lau boo, Osi thathauwane. Sui mada sa osi oe mena, ma sui oko thauwane, oki wane no ade faisia ṉa lo.

¹² Muki ṉata, ma muki abula, mala wane ki na muka too fasi Wane ni Kotu kai ṉata suli kamulua sulia lo na kai adea imole kai tonee to.

¹³ Sulaania Wane ni Kotu kai ei si tatakomia wane eri ne ai ana ta si lio ni kwaitatakomi la: tatakomi la kai lea iana na si nia e tatha fafia sore lana kwae lana imole.

¹⁴ Si ta na kai kwaiadomi, doora kera, mada sa ta wane ka sorea ana fitooa, ma si ra ki ka ai faisi nia? fitooa eri kai sukwai fasi kai faamaruki nia?

¹⁵ Mada sa ta imole ne doorakulua mado waiwaena kulu kai talu bana, me ai si rikia ta si faṉa na nia kai ania sulia boṉi,

¹⁶ Ma ta wane iamulua kai soree isada, Muki lae ana enenoa, keki faaaako kamulua ma keki fale iamulua muki abusu; una ena mena, musi falea si do na kere rofea ana seeda iada; si ta na kai kwaiadomi?

¹⁷ Alafana lau boo ṉa fitooa, mada se ai ana si ra ki, e mae, uria na ka to talifili nia.

¹⁸ Iu, ta wane kai sorea, Amua fitooa, ni nau molo akua si ra ki: oki fatai nia fitooa oe isaku na si ra ki ka ai faisia, ma ni nau ana si ra nau ki kwai fatai nia fitooa nau isamu.

¹⁹ O faamamanea na tee God boo e to bana; o abula lea: spirit taa ki kera faamamanea lau boo, ma keka leleba.

²⁰ Ma sui, tonee wane ae, oko thathamii thaitoomana na ṉa fitooa, si maṉa na si ra ki ka ai faisia, e mae naa?

²¹ Ta na sa kera ala fafia kokoto lana maka kulu na tha Aberahamo maana si ra ki, si maṉa ne falea tha Aesaka, kaluwane nia, ana do ni foa la, i fulii era ni foa la na ba, mado?

²² Osi rikia na ṉa fitooa e ra bia si ra nia ki, ma asi ra ki kera adea fitooa eri e sukwai teefau?

²³ Ma kera faamamanea kekeda la abu eri, be una eri, Ma tha Aberahamo e fitoona tha God, ma kera alua si do eri ifana uria kokoto la; ma kera alaṉi nia ana wane ne ado bia tha God.

²⁴ Mulu rikia na kera ala fafia kokoto lana ta wane maana si ra ki, ma talitoona bana ana fitooa ka ai.

²⁵ Ma talafana lau boo, ta na sa kera ala fafia kokoto lana ni Rehaba na sesele maana si ra ki, si maṉa ne thathagonia mai toa ba ki na kera arasida, ma ka arasida ata tala eeta nana, mado?

²⁶ Sulaania talafana seena imole, spirit e ai faisia, e mae bonaa, alafana lau boo ṉa fitooa, si ra ki e ai faisia, e mae lau boo.