Jemesi 1 - Ṉa Alaofua Falu 1923 1949

¹ Tha Jemesi, wane ni ra tha God ma tha Lord Jesus Christ, kai aratai lea la ana tee akwala ma ro kulee toa ba ki na kera lae tataka.

² Manatamulua na do muki seethathala faamau ania, doora kera, si maṉa na muki tatha ana ilitooa oro ki;

³ Uria na muki thaitoomana na ilitoona lana mamana lana fitooa kamulua kai ṉalia mai si lio ni susuu la.

⁴ Ma muki alamatania si lio ni susuu la eri kai ra sukwai, fasi muki sukwai teefau ma muki laulau, e ai ta si do si ei faisi kamulua.

⁵ Mada sa ta wane iamulua manata lea la ka ai faisi nia, kai gania atha God, na ka fale baita ifana imole ki sui bana ma ka ai si soreda; ma keki falea ifana.

⁶ Ma nia kai gania ana fitooa, e ai dodoloa si fitala: uria na wane na ka fitala e ’uria asibobo nai la matakwa na thauthau e toea ma ka isua ka toto bana.

⁷ Uria na wane una eri, e ai si lea na manatana sa ṉa Lord kai falea ta si do ifana;

⁸ Wane ana ro si lio, ne ai si ṉado ana abula lana sui bana.

⁹ Doorakulua ne thafee to faekwa kai faabaita nia ana inotoa nia:

¹⁰ Wane rikii do ana uria na kera faafaekwa nia: sulaania ’uria takana lolo nia kai tatha.

¹¹ Uria na ṉa thato e tae mai, kai thatofi faamau, kai adea lolo kai dele; ma takana ka asia, ma si riki la ne lea ka ai naa faisia: talafana lau boo wane rikii do kai sui ana abula lana.

¹² Lea iana, wane na kai susuu ana ilitooa: uria na lalae kera thaitoomana naa kokoto lana, nia kai bii ṉalia do ni eregwau la ana marukia, na ṉa Lord e alaṉai nia ana toa na keka liothau ani nia.

¹³ Ta wane si sorea si maṉa na kera bae aliṉana, Nau tha God e bae aliṉaku: uria tha God kera dora ana bae la aliṉana fasi kai abula taa, ma ni nia e ai si bae aliṉana ta wane:

¹⁴ Atona bana ta wane kera bae aliṉana, si maṉa na thathami la taa nia i talaana ka tole garo ani nia, ma ka gafoa.

¹⁵ Sui thathami la taa eri, si maṉa na e to ana wela, kai kwalafia abula taa la: ma abula taa la eri, lalae e dara, kai kwalafia maea.

¹⁶ Kesi lole kamulua, doora liliothaua nau ki.

¹⁷ Si do lea ki sui bana na keka tona falea, ma si do ki sui bana na keka falea ne sukwai ka tatha, ka too mai ia, ma ka sifo mai ana ṉa Maka ana laafa ki, ne ai dodoloa si tatala, me ai ta nunui do si thu fafi nia uria bulasi lana.

¹⁸ Asi do nia tala thathamia e kwalafi kulu asi baea ana mamana la, fasi kuki ’uria foee do totonao ki asi do ne thauwanidaki.

¹⁹ Mania, doora liliothaua nau ki, ni kamulua sui, ta wane si ei, muki thathai uria roṉo la, ka tau bana muka bii ṉata, ka tau bana muka bii rakeiri:

²⁰ Sulaania rakeiria imole e ai si ra ifana kokoto la tha God.

²¹ Mania muki tanusia si do ki sui na ka faataali kamulua ma si do ki sui bana ne taa, ma muki ṉalia ana abula marabibi la si baea eri na kera fasia, na ka talaana faamaruki lana maṉomulua.

²² Ma kamulua toa na muki ade sulia si baea eri, ma talitoona toa na muki roṉoa ma muki tala lole kamulua ka ai.

²³ Uria na mada sa ta wane kai roṉoa si baea eri, ma ka ai si ade sulia, nia ’uria wane na kai rikia maana i talaana i lala ta ironunu:

²⁴ Sulaania nia riki nia, sui ka lae nana, liona kai dora si maṉa eri u boo ana riki lana, sa ka lea mado e ai.

²⁵ Ma wane na kai lio i la lo ne sukwai teefau, lo eri na ka ilia imole kai tonee to, ma kai to ṉado ania, na wane na ka roṉoi sui ka lio dora ania e ai, wane na ka ade sulia ma ka ra, wane eri kai lea iana fafia ra nia eri.

²⁶ Mada sa ta wane manataia na nia manata baita atha God, si maṉa ne ai si rau fafia meana ma ka tala lolea ruruuna, manata baita la wane eri na ṉa tonee do.

²⁷ Si lio thathaulia ma dodoloa ana manata baita la atha God, inaofana God kulu na Maka kulu nai nia, wane lae kai makelea wela na maka kera e mae ma gwa oru ki maṉa ne taa iada, kai beta suli nia fasi fanua nei iano ka ai si sua nia.