I. Timothi 6 - Ṉa Alaofua Falu 1923 1949

¹ Toa na kera suuwanida keka tona ra bada keki fare baita faamau ana wane inoto kera ki i talaada, ada kera ṉata ni faretoliṉi lana thata tha God ma kwaifamanataia eri.

² Ma toa na wane inoto kera ki keka fitoo, kesi fare faekwa iada, sulaania kera tee baree wai doorana; ra la ana keki ra ifada, uria na toa na keka faalea ana ra kera keki fitoo lau boo ma toa liliothaua kera ki. Si do eki oki tooa ma oki faaroṉo kera ania.

³ Mada sa ta wane ka kwaifamanatai ata kwaifamanatai eeta, me ai si ala fafia si baea taliṉei, bae lana na Lord kulu tha Jesus Christ, ma kwaifamanataia eri ne sulia si lio ni fare baita la atha God;

⁴ Wane eri e tala faabaita nia i talaana, e ai si thaitoomana boo ta do, kai matai ana soetoona la ki ma oli susuua ki, si do ne ṉalia mai uga la, firu la, ṉata taa la ki, si lio ne taa ki,

⁵ Firua si sui wane liode taa ki ma mamana la eri e ai naa faisida, manatade soso na gwauna si lio ni fare baita la atha God ana todado la: oki lae faisia toa una eki.

⁶ Ma si lio ni fare baita la atha God ma to seeeno la ṉa todado la faamau:

⁷ Uria na kusi ṉalia mai ta si do uria fanua nei iano, ma toto sa kuka ṉalia ta si do faisia e ai;

⁸ Mania si maṉa kulu rikia bakulua ta faṉa ma ta si maku ana alu lana ana seekulua, kuki seeeno ania.

⁹ Ma toa na keki thathamii rikii do keki asi kera ana bae aliṉa la ma aikwai ma ana thathami lana do oro ne oewanea ma ka faataali kera, si do na kai ilia wane ki keki lola asi do na kai labatai teefau anida ma kai faaaana maṉoda.

¹⁰ Sulaania thathami lana malefo na ṉa laila si do ki sui bana ne taa: na tei toa na keka tekwasia abada sa keki ra uria kera tala faisia si do eki na kulu fitoona, ma keki tala thaukwadaṉia seeda i talaada ana taa la oro ki.

¹¹ Ma ni oe, no wane tha God, oko thaka faisia do eki; ma oko tari buriana kokoto la, si lio ni fare baita la atha God, fitooa, liothau la, si lio ni susuu la, abula marabibi la.

¹² Oko firu ana firua lea eri asi do eki na kulu fitoona, oki rau ana marukia tatha eri, do na kera aili oe uria, no faamamanea lea inaofana toa oro na kera riki oe.

¹³ Nau ku soree isamu inaofatha God, ne faamarukia si do ki sui bana, ma inaofatha Christ Jesus, ne faamamanea lea isatha Podiasi Paelate si do nia thaitoomana e mamana;

¹⁴ Oki rau asi ṉata fifi eri, oki dodoloa, kesi sorea si do taa suli oe, maakwalia fatai lana Lord kulu tha Jesus Christ:

¹⁵ Fatai la na ni nia kai fatai nia ania asi maṉa nia ki, nia na kera taṉoa, ne Gwauwai tee nia, Kiṉa Inoto ka tatha ana kiṉa ki, ma Lord Inoto ka tatha ana lord ki;

¹⁶ Na tee nia ṉa marukia tatha ka ni ania, kai to ana lalaa la na kesi talaana idu la karaṉia; nia ne ai ta wane si rikia u, me ai ta wane si talaana riki lana: keki fare baita ani nia ma keki taṉoa sukwaia nia toto si sui. Emeni.

¹⁷ Oki faaroṉoa toa na kera rikii do i kada nei, kesi fare baita ani kera i talaada, me kesi lio uria do na keka rikidaki ne ai si to ṉado isada, keki manatatoo ṉado uria ṉa God maruki, na kai fale baita iakulua asi do ki sui bana fasi kuki seethathala ania;

¹⁸ Oki faaroṉoda keki ilia si do ne lea, keki rikii do asi ra lea ki, keki thathai ana ukali lana si do kera ki, keki thathamii tona fale la;

¹⁹ Keki alua ta do lea ana takwe la ifafona maakwali kera uria si maṉa na ni u, fasi keki rau ana marukia ne mamana boo.

²⁰ Timothi ae, oko fono toi kakalia si do na keka takofale oe ania, oki keto faisia ṉata la ne fakoka ne eeta faisia tha God bia kwaisuusi la ana ṉa manata lea la na kera alaṉi garo ania;

²¹ Ma tei toa na kera sorea manatade lea una eri keka garo naa faisia si do eki na kulu fitoona. Lea la kai to bi kamulua. Emeni.