I. Timothi 5 - Ṉa Alaofua Falu 1923 1949

¹ Osi sosorea ta wane ulunao, oki ṉata isana ’uria sa nia maka oe; kala wane ki ’uria dooramu kera:

² Gwaulii ei ki ’uria thainamu kera; ai bii baita ki ’uria waiwaena oe ki, asi lio thathaulia.

³ Fare baita ana gwa oru ki na kera oru mamana boo.

⁴ Ma mada sa ta gwa oru e welaa mado ana wela wela nia ki, keki too totonao uria fatai lana lea la isana toa kera ki, ma keki duua ifana maka kera ki ma thainada ki: uria na si do na tha God e rikia ka lea ma ka ala fafia neri.

⁵ Sui ai ne oru mamana boo, ne mutaia iana, kai manatatoo ṉado uria tha God, ma kai to ṉado ana ṉata fifi la isana ana foa la ma ana foa la ki ana fa rodo ma fa thato.

⁶ Ma ai ne to ni manatai lana bana nau ni lea la e mae naa, boro ka maruki mena.

⁷ Oki faaroṉoda lau boo asi do eki, fasi keki dodoloa.

⁸ Ma mada sa ta wane e ai si beta sulia toa nia ki, ma toa ana maafera nia u boo, wane eri e sorea e dora bana asi do eki na kulu fitoona, ma ka taa ka tatha ana wane ne fitala bana.

⁹ Kesi alua thatana ta ai i maalutana gwa oru eki si maṉa na ono tafulu fa ṉali ki si sui u iana, kwaina tee wane u bana,

¹⁰ Keki ala fafi nia sulia si ra lea ki; mada sa nia e thai sulia wela ki, mada sa nia e beta toa kwaita ki, mada sa nia e taua aaena toa abu ki, mada sa nia e adomia toa ne taa iada ki, mada sa nia e seemabe asi ra ki sui bana ne lea.

¹¹ Ma oko tofe faisia oru tharii ki: sulaania si maṉa na kera lalakwatania tha Christ, keki bii toowane;

¹² Ai na kera sorea kwae lada, uria na keka lukatania si do na kera alaṉai nia totonao.

¹³ Ma sui lau boo keka too uria lalakwa busu la, keki liliu ada, keki makelea maafera oro ki; ma talitoona lalakwa busu la e ai, keki ṉata gaugau lau boo ma keki nao ania, keki ṉata sulia do ne ai si kokoto.

¹⁴ Mania ku thathamia oru tharii ki keki toowane, keki tharewela, keki ana asi do nai maafera ki, kesi lukatania si maṉa na maalimae eri kai ṉata taa:

¹⁵ Uria na tei toa kera akele garo naa buriatha Satan.

¹⁶ Mada sa ta wane mado ta kini ne fitoo ana tei gwa oru, kai adomi kera, figua si oga ania; fasi figua eri kai adomia ai na kera oru mamana boo.

¹⁷ Muki fare baita faamau ana toa ulunao na kera ana lea ana ra tha God, ma toa eki u boo na kera ra asi baea eri ma ana kwaifamanataia.

¹⁸ Uria na kekeda la abu eri e sorea, Osi obia fokona buloka si maṉa na ka uruefoa ’ai alo eri ana aaena. Ma, Wane ni ra e farana keki folia.

¹⁹ Mada sa kera alaṉia wane ulunao ana ta si do iamu, osi roṉoa si maṉa na ta ro imole mado ta ulu ei kesi faamamanea u.

²⁰ Toa na kera abula taa oko ṉata fifi iada inaofana toa eki sui boo, fasi kera lau boo keka mau.

²¹ Nau ku faaroṉo oe inaofatha God, ma tha Lord Jesus Christ, ma angel eki na kera filida oki ade sulia si do eki, si do na manatamu e toea i talaamu ka ai faisia, osi ilia boo ta si do uria bana o rikia ta wane ka lea.

²² Osi alu fofoa ana abamu fafia ta wane, osi adomia lau boo toa ki ana abula taa la kera: beta suli oe oki thathaulia.

²³ Osi kukuufia lau talitoona kafo, oki ṉalia lau boo ta kasi waene faekwa, do kai adomi oe ana rakemu ma do ba ki no maketho ṉado ania.

²⁴ Abula taa la tei wane ki ka to fatai, ka tatha inao ana kwae la; ma do tei wane ki lau ka lae iburiada.

²⁵ Una eri lau boo tei ra lea ki kai to fatai; ma do ne ai si to fatai mena sa ka thaufuni e ai.