I. Timothi 4 - Ṉa Alaofua Falu 1923 1949

¹ Ma sui tha Spirit ka ṉata fifi, ka sorea, asi maṉa na ni ki u tei toa keki lae garo faisia si do eki na kulu fitoona, keki ade sulia spirit ki na kera gafoda ma kwaifamanataia spirit taa ki,

² Sulia olodola lana wane na kera lole ki, na lioda ka fofonola ’uria sa kera akofia ana ta si thalo aako fasi kai ṉilo;

³ Keki lufia ta wane si tolekini, ma keki sorea kai abu ana tei faṉa, na tha God e thauwanidaki fasi toa na keki fitoona ma keki thaitoomana mamana la eri keki ṉalia asi sore lea la.

⁴ Uria na si do ki sui bana na tha God e thauwai nia e lea, ma nia e ai si sorea na keki lalakwatania ta do, mada sa keki ṉalia asi sore lea la:

⁵ Sulaania bae lana tha God ma foa la kai faawaluda do eri.

⁶ Mada so faaroṉoa doorakulua ki lau fasi keki onotoona si do eki, oki wane ni ra lea tha Jesus Christ, na kera thare oe asi baea ba ki asi do eki na kulu fitoona, ma ana kwaifamanataia lea eri no ade ṉado sulia:

⁷ Ma oki lalakwatania uunu eeta la ki faisia tha God na kukue ki keki uunu sulia. Ma oki seemabe asi lio ni fare baita la atha God:

⁸ Uria na seemabea asi do seena imole e suka lea; ma si lio ni fare baita la atha God e lea asi do ki sui, kai alaṉai nia marukia si maṉa eri, ma asi maṉa na ni u.

⁹ Si ṉata eri e mamana, me farana keki faamamanea ṉado.

¹⁰ Kulu ulafu ma kuki aṉasi, uria na kuki manatatoo ṉado uria ṉa God maruki, nia na ka faamarukia toa na fanua ni sui, ma toa na kera fitoo e faamarukida mamana boo.

¹¹ Si do eki oko faaroṉoda ania ma oki kwaifamanatai sulia.

¹² Osi alamatania ta wane si fare faekwa iamu uria no wane o bii baita; abula lamu kai dodoloa fasi toa na kera fitoo keki lio uria, ana ṉata lamu, ana abula lamu, ana liothau la, atha Spirit, ana fitoo lamu, ana manatamu kai thathaulia.

¹³ Maakwali nau kwa fula, oki seemabe ana teemai la, ana ṉata la isada, ana kwaifamanataia.

¹⁴ Osi seedadaola asi do ba na ni ruruumu, na kera tona falea iamu na ba ana ṉata lana porofeta ki, si maṉa na toa ulunao eki kera alua abada fafi oe.

¹⁵ Oki seemabe asi do eki; oki alua liomu ana tee si lio ania; fasi si do noki fulatoona kai to fatai ana toa eki sui.

¹⁶ Oki beta suli oe, ma sulia kwaifamanatai lamu. Oki ra ṉado asi do eki; uria na si maṉa oki ade una eri oki faamaruki oe i talaamu bia toa na kera roṉoa ṉata lamu lau boo.