I. Timothi 2 - Ṉa Alaofua Falu 1923 1949

¹ Mania, si do totonao ku sorea, na keki ṉata fifi isatha God ana foa la, keki foa, keki lae isatha God, keki sore lea iana, uria imole ki sui;

² Uria kiṉa ki ma toa gwauwai ki sui boo; fasi to lakulua kai aroro ma kai eno asi lio ni fare baita la atha God asi do ki sui bana, ma kuki to taiṉei.

³ Si do ne lea, na tha God ne faamaruki kulu ka ala fafia neri;

⁴ Sulia nia thathamia sa imole ni sui keki maruki, ma keki fulatoona thaitoomana lana mamana la eri.

⁵ Sulaania tee God, ma tee wane lau boo ni fofolo la i maalutana God ma ṉa imole, tha Christ Jesus, ne imole boo,

⁶ Ne fale nia ana tae la faisia toa ni sui; si do na toa na kera thaitoomana keki ṉata sulia asi maṉa nia bonaa;

⁷ Sulia si do eri kera alu nau nau wane ni ṉaliṉata ma aposela (Nau ku ṉata mamana atha Christ, nau kwasi lole), wane ku kwaifamanatai isana Jenetaele ki ana fitooa ma mamana la.

⁸ Mania ku thathamia wane ki keki foa ta kula si ei, keki tafoa abada ka dodoloa, rakeiria ma oli susuu la ki kei ei faisida.

⁹ Una eri lau boo, kini ki keki lauṉi ana tooni kelaafea ki, ana seenonia, ma seeda si inoto iada; ana ifuda na kera nailia e ai, ana goloda mado pala ki mado tooni na kera usi faamau anidaki ka ai lau boo;

¹⁰ Keki lauṉi asi ra lea ki (si do ne farana kini ki na keki sorea kera fare baita atha God).

¹¹ Kini kai ili uria si do kera tooa isana ana enenoa, kai to ni kelaafea la.

¹² Sui kwasi alamatania ta kini si faamanataia ta wane, mado si inoto ana wane, kai to ana enenoa.

¹³ Uria tha Adam kera thauwai nia totonao, sui ni Eve;

¹⁴ Ma tha Adam e ai kesi malaoea, kini eri kera malaoe nia, sui e asi nia ana abula garo la.

¹⁵ Ma keki faamaruki nia si maṉa kai tharewela, mada sa keko to ana fitooa ma ana liothau la ma ana faaabu lada la, ma seedaroa si inoto ani keroa.