I. Timothi 1 - Ṉa Alaofua Falu 1923 1949

¹ Polo, Aposela tha Jesus Christ sulia si ṉata fifi tha God ne faamaruki kulu, ma tha Lord Jesus Christ na kulu manatatoo ṉado uria;

² Isatha Timothi, wela mamana nau ana fitooa: Lea la, tatakomia, enenoa, ita atha God na Maka kulu ma tha Jesus Christ na Lord kulu.

³ ’Uria ku faaroṉo oe oki to i Efesasi, si maṉa ba ku lae uri Masedonia, fasi oki ṉata fifi isana tei wane kesi totooa lau ta kwaifamanataia eeta,

⁴ Bia fasi e ai kesi fale kera uria manatatoona lana uunu ki ma talisibara ladoa la ki, na kai faaṉata kera keki oli susuu, e ai si faasukwai kera atha God ana fitooa; si do eki kwai sorea lau.

⁵ Ma gwauna si ṉata fifi eri na ṉa loithau la ne ita ana rurui imole ne thathaulia ma asi lio ne lea ma fitooa na kesi lole ania:

⁶ Si do na tei toa kera lae garo naa faisia, keka akele kekeo uria ṉata fakoka;

⁷ Kera thathamia sa ni kera toa ni kwaifamanatai ana ṉa lo, boro sa kesi thaitoomana mena si do eri na keki sorea, mado si do na keki ṉata seeraraa sulia.

⁸ Ma kulu thaitoomana ṉa lo e lea, mada sa wane ka ra kokoto ania,

⁹ Uria na kulu thaitoomana si kula eri, na ṉa lo e ai kesi alua ifana wane kokoto, do ifana toa na keka ilia si do na kera lufidaki ma toa na kesi ade sulia si ṉata, ifana toa na keki fare faekwa atha God ma toa na keki abula taa, ifana toa taa ki ma toa kera eeta faisia tha God, ifana toa keka thauṉia maka kera ki ma toa keka thauṉia thainada, ifana toa keka thauwane,

¹⁰ Ifana wane na kera oe ki, ifana wane ki na kera oe lau bada uri kera i talaada, ifana wane lauwane ki, ifana toa na kera sorea si do ne ai si mamana, toa na kera othi ni lole la ki, ma atona bana ta si do lau ne ai si talaana kwaifamanataia taliṉei eri;

¹¹ Sulaania si faaroṉoa lea eri ana inotoa ṉa God na kera taṉoa, faaroṉoa lea na kera takofalea iaku.

¹² Ma nau ku sore lea atha Christ Jesus na Lord kulu, ne faasukwai nau mai, uria nia e takofale nau ku mamana, me alu nau ana ra nia;

¹³ Nau wane ku fafaretoliṉia mena tha God totonao, ku tona ililamatai nia toa ki, ku thathasi naunau: ma sui kera doanita iaku, sulaania si maṉa na ku fitala u kwasi thaitoomana maalutana si do nau ku ilia;

¹⁴ Ma lea la Lord kulu e oro ka tatha bia fitooa ma liothau la na ni atha Christ Jesus.

¹⁵ Si ṉata mamana neri, me farana na keki faamamanea ṉado, na tha Christ Jesus e lae mai uria fanua nei iano uria faamaruki lana toa na kera abula taa; ma ni nau wane ku abula taa ka tatha ani kera sui:

¹⁶ Sui kera doanita ani nau uria si kula eri neri, na tha Jesus Christ kai fatai nia si lio nia ni doanita tatha la ani nau wane ku abula taa ka tatha, fasi toa na toto keki fitoona uria marukia tatha keki rikia, keki thaitoomana.

¹⁷ Ma Kiṉa eri ne to ladoa ne toto si fufuraa, ne to bana ma kesi riki nia, tha God na tee nia boo, keki fare baita ma keki fare inoto ani nia toto si sui. Emeni.

¹⁸ Si faaroṉoa nei ku takofalea iamu, Timothi wela nau, sulaania si ṉata la ba ki na porofeta ki kera ṉata ania totonao suli oe, fasi ana ṉata la eki oki firu ana firu la ne lea;

¹⁹ Si maṉa noki rau ana fitooa ma si lio ne lea; do tei toa kera usutania faisida, keka katu, mala faka ne dekwe, faisia si do eki na kulu fitoona:

²⁰ Ro wane iada na tha Haeminiasi ma tha Alikisada; na ku alamatanida atha Satan, fasi keki tooa si kula eri isada ne ai kesi faretoliṉia tha God.