I. Pita 5 - Ṉa Alaofua Falu 1923 1949

¹ Wane ulunao ki i maalutamulua ku soree isada, ni nau wane ana ulunao la ni lau boo bi kera, na ku faamamanea si do nau ku rikia naa ana taa la tha Christ e toto ania, ma kwai ṉalia lau boo ta si ana inotoa eri na toto keki fatai nia:

² Muki tharea aini sifi tha God na ni maalutamulua, muki fono toi kakalida, ’uria sa keka suuwai nia iamulua e ai, ma liomulua na kai ilia; uria malefo ne faataali kia e ai, muki fifarao uria ana manatamulua;

³ Sa ka ’uria si do kamulua ki na muki too ania i talaamulua e ai, abula lamulua kai dodoloa fasi aini sifi eki keki lio uria.

⁴ Ma sui lalae kera fatai nia naa Wane Inoto ni toi la kalia aini sifi, muki ṉalia do ni eregwau la ana inotoa na ka ai si dele.

⁵ Una eri lau boo, toa bii baita ki, muki roo sulia toa na kera arai ki naa. Iu, ni kamulua sui boo muki ali kamulua ana thafee to faekwa la, fasi muki ra kwailiu ifamulua: uria na tha God e maalimae ana toa na kera fafakao kera, ma kai falea lea la ifana toa na kera thafee to faekwa.

⁶ Mania muki thafee to faekwa ifara aba sukwai tha God, fasi nia kai faabaita kamulua asi maṉa ne kokoto ania;

⁷ Muki naṉa asi do ki sui bana ne oga kamulua kai to fafi nia, uria nia oga nia uri kamulua.

⁸ Muki inoto ana seemulua, muki tharai: sulaania maalimae kamulua tha devil, ’uria laeona na ka gagafu, ka liu, fasi kai rofe uria imole na nia kai dudumeme ania:

⁹ Do na muki suusia neri, muki takwe ṉado ana fitooa kamulua, uria na mulu thaitoomana na kera alua taa la eki boo uria dooramulua ki na ni fanua nei iano.

¹⁰ Ma tha God ana lea la ni sui bana, ne aili kamulua mai atha Christ Jesus uria inotoa nia ne to tatha, buriana na mulu toto ana taa la ana kasi maṉa seseka, talani nia kai faasukwai teefau ani kamulua, kai faatakwe kamulua, kai faaṉado kamulua

¹¹ Keki fare inoto ani nia ma keki taṉoa tooa nia toto si sui. Emeni.

¹² Atha Silafenasi, doora mamana kamulua (manataku neri), ku kekeda ṉuṉuru kau isamulua, ku soree isamulua, ma ku faamamanea si do na nau ku thaitoomana, na lea la mamana tha God neri: muki takwe ṉado ania.

¹³ Kini ba i Babilone, na kera filia bi kamulua, e thathamia kwai ṉata isamulua ’uria sa ni nia kai ṉata; ma kaluwane nau na tha Makasi lau boo.

¹⁴ Muki ṉata kwailiu isamulua ’uria sa ni nau ku ṉata, ana nonoi la ana liothau la. Lea la kai to bi kamulua sui na mulu ni atha Christ Jesus. Emeni.