I. Pita 3 - Ṉa Alaofua Falu 1923 1949

¹ Una eri lau boo, ai ila ai ki, muki roo sulia kwaimulua i talaamulua; fasi, mada sa tei wane iada kesi ade mena sulia si baea eri, abula lana kwaida kai toleda mai, si baea ka ai faisida;

² Uria na keka rikia abula lamulua ne dodoloa bia mau lamulua.

³ Ma lauṉia kamulua ki si do fafia seemulua, naili lana ifumulua, ma alu lana lauṉia na kera thauwai nia ana goloda, mado tooni lamulua la ana tooni ki, e ai;

⁴ Wane ne to thaufuni ana i ruruumulua na muki lauṉia, ana lauṉia na toto si fufuraa na ṉa spirit kamulua ne abula marabibi ma ka eno, si do na kera usi baita ania inaofatha God.

⁵ Sulaania dini u mai inao, kini abu eki lau boo, na kera manatatoo ṉado uria tha God, kera lauṉi una eri lau boo, ma kera roo sulia kwaida i talaada:

⁶ Uria ni Sera e ade sulia ṉata lana tha Aberahamo, ka alaṉi nia ana lord: ma baree wela nia ki na ni kamulua si maṉa eri, mada sa muki abula lea, ma kesi faamau kamulua ana ta si do ni kwaifamaui.

⁷ Ma talafana lau boo, ni kamulua toa ila wane ki, muki to bia kwaimulua sulia si do na mulu thaitoomana, muki fare baita ana kini eri, ’uria ana do ni taiṉei la ne ai si sukwai ’uri oe, ma uria lau boo ni kamaroa moro fulatoona ofu lea la eri na ṉa marukia; fasi e ai kesi suusia foa la kamaroa ki.

⁸ Si do iisi, kamulua sui muki to ana tee si lio, muki tatakomi kamulua, muki liothau kwailiu ani kamulua ’uria tee baree wai doorana, si lio kamulua ana mamasoro la, ana abula seseka la:

⁹ Musi duduua taa la ana taa la, mado ṉata taa la ana ṉata taa la; muki duua amulua ana lea la; uria na kera aili kamulua mai uria si kula eri, fasi muki fulatoona lea la.

¹⁰ Sulaania, Wane na ka thathamia kai lea iana uria to lana, Ma kai thathamii rikia fa boṉi ne lea ki, Wane eri kai rau fafia meana faisia si do taa, Ma fafia ṉiduna fasi e ai si ṉata ni lole la:

¹¹ Ma kia akele faisia si do taa, kai ilia si do ne lea; Kai rofe uria enenoa, ma kai tari buriana.

¹² Uria maana tha Lord ka lio uria toa kokoto ki, Ma aliṉana ka maakwalia ṉata fifi la kera ana foa la: Ma maana tha Lord ka firu bia toa na kera ilia si do ne taa.

¹³ Ma ni tei na kai labatai kamulua, mada sa muki seemabe asi do ne lea?

¹⁴ Ma mada sa muka to ana taa la uria kokoto la, kai lea iamulua: ma musi mamau ana mau lada, mado i la ruruumulua si tataa;

¹⁵ Muki faaabua tha Lord God i ruruumulua: ma muki fifarao ṉado uria luu lana atona bana ta wane na kai soetoomulua uria maalutana manatatoo ṉado la na ni ani kamulua, sui muki luua ana abula marabibi la ma ana mau la:

¹⁶ Liomulua kai lea; fasi, asi do eri boo na kera ṉata taa suli kamulua ania, keki faaseenonia toa eki na kera tamani taa sulia to lamulua ne lea atha Christ.

¹⁷ Sulaania e lea ka tatha, mada sa si do na tha God e thathamia e una eri, na muka to ana taa la uria abula lea la, ma uria abula taa la ka ai.

¹⁸ Uria na tha Christ lau boo ana tee fa to la ana taa la uria abula taa la ki, Wane kokoto uria toa na kesi kokoto, fasi nia kai tole kulu isatha God; uria na kera thauṉia seena, ma sui kera faamaruki nia atha Spirit;

¹⁹ Ma ana Spirit eri lau boo e lae ka ṉata isana spirit eki i la lokafu,

²⁰ Na kera adede faisia ṉata lana dini u mai inao, si maṉa na liona tha God ni doanita tatha la e mamaakwalida na ba si maṉa na tha Noa e to u bana, ma kera ra ana thauwai lana aka ba, ma kera faamarukia ṉadee imole i lala, na ṉa kwalu imole boo, faisia kafo:

²¹ Ma kafo eri ana tarifula mamana kai faamaruki kamulua si maṉa eri lau boo, na babataesi la neri, tau lana seena imole faisia si do na ka faataalia e ai, ṉa rofe la uria si lio ne lea uria tha God, ana tatae lana tha Jesus Christ;

²² Ne fula naa i thalo, ma ka to bana ana aba aola tha God; ma kera alua aini angel ki ma toa gwauwai ki ma toa sukwai ki keka roo suli nia.