I. Pita 2 - Ṉa Alaofua Falu 1923 1949

¹ Mania muki luka ana abula taa la ni sui bana, ma lole la ni sui bana, ma olodola la ni sui bana, ma uga la ki, ma ṉata taa la ki sui boo,

² Mala kala wela aabu ki, muki thathamia faamau susu na lole la e ai si ni ania, si baea eri neri, fasi ka thare kamulua muka tae uria marukia;

³ Mada sa mulu ilitoona ṉa Lord ne ade lea:

⁴ Na mulu lae mai isana, ne fau maruki, na wane ki kera lalakwatania, ma atha God fau na kera filia, ne inoto,

⁵ Ni kamulua lau boo, mala fau maruki‐ki, keki ofu kamulua muki tae ana biu tha Spirit, fasi muki toa ni foa la abu ki, na muki falea do ni foa la tha Spirit ki, na tha God kai ala fafia atha Jesus Christ.

⁶ Uria na si do ni la kekeda la abu eri neri, Rikia fasi, kwai alua i Saeono gwa fau nai gwauna loko suua, do na kera filia, ne inoto: Ma wane na kai fitoona sa keka faaseenoni nia e ai.

⁷ Mania uri kamulua na mulu fitoo nia inoto: ma uria toa na keka fitala, Fau na toa na kera kasibiu kera lalakwatania, Fau eri lau bana kera alua i gwauna loko suua;

⁸ Ma, Fau na kera taofai kera ania, ma gwa kale ni lakwadora la ania; uria na kera taofai kera asi baea eri, sulaania kera ade faisia: si do na kera alu kera lau boo ania neri.

⁹ Ma ni kamulua ina lana toa na kera filidaki, kiṉa ki na muka toa ni foa la, kulee toa abu, toa ifatha God i talaana, fasi muki fatai nia lea lana ni nia ne aili kamulua mai faisia maerodo ana lalaa lana na kera kwele ania:

¹⁰ Na kamulua tee toa asi maṉa nai nao e ai, ma si maṉa eri kamulua toa tha God: ne ai musi fufulatoona tatakomi la, ma si maṉa eri mulu fulatoona boo.

¹¹ Toa liliothaua nau ki, ku ṉata kwaitakoi, ku soree isamulua mala toa na muka makafa to bamulua ma toa kwaita ki, muki to faisia si thathami la taa ki seena imole, na ka firu bia maṉoka;

¹² Abula lamulua kai faramulua i maalutana Jenetaele ki; fasi, asi do eri boo na kera ṉata taa suli kamulua ania mala sulia toa na kera abula taa, asi ra lea kamulua ki na keki rikia neri, keki faainotoa tha God afa boṉi ana makele lada la.

¹³ Si do ki sui bana na wane ki kera alu gwauwai ania, muki roo sulia inunufana ṉa Lord: mado sulia ṉa kiṉa, mala wane inoto ka tatha;

¹⁴ Mado sulia toa inoto ki, mala wane na nia e arasidaki mai uria duu lana abula taa la kera ki ana toa na kera abula taa, ma uria taṉo lana toa na kera abula lea.

¹⁵ Uria na si do na tha God e thathamia neri, na ana abula lea lamulua muki faabona wane oewanea ki na kesi thaitoomana maalutana si do ki:

¹⁶ Mala toa na muka tonee to, ma to lea la eri musi alua ana do ni thu la fafia abula taa la, muki toa ni ra tha God ki.

¹⁷ Muki fare baita ana wane ki sui boo. Muki liothau ana baree wai doorana eki. Muki mau atha God. Muki fare baita ana ṉa kiṉa.

¹⁸ Toa ni ra ki, muki roo sulia wane inoto kamulua ki ana mau la baita; talitoona bana sulia toa na kera ade lea ma keka abula thathaore e ai, sulia toa eki lau boo na keka abula kekeo.

¹⁹ Sulaania si do na kera ala fafia neri, mada sa ta wane, uria liona na ka fare baita atha God, kai susuu ana taa la ki, si maṉa na kera tona kwae nia mena.

²⁰ Sulaania si ta na keki faabaita kamulua fafia, mada sa, si maṉa na muka abula taa, ma keka kumu kamulua, muki susuu ania ana enenoa? ma mada sa, si maṉa na muki abula lea, ma keka bii kwae kamulua, muki susuu ania ana enenoa, si do na tha God kai ala fafia neri.

²¹ Uria si do na kera aili kamulua mai uria neri: sulaania tha Christ lau boo e to ana taa la uri kulu, ma abula lana e dodoloa fasi kuki lio uria, muki sulea lae lana:

²² Ne ai dodoloa si abula taa, ma kesi fulatoona ta lole la i fokona:

²³ Si maṉa na kera ṉata taa uri nia, ne ai si duua ana ṉata taa la; si maṉa ne to ana taa la, e ai si faamauda; e takofale nia ana Wane ni Kotu na ka ṉata kokoto sulia imole:

²⁴ Ne ṉalia abula taa lakulua ki i talaana i seena i talaana sulia ’ai ba, fasi ni kulu, uria na kulu mae naa ana abula taa la ki, kuka maruki ana kokoto la; ma aliliboa nia ki e faamaruki kamulua.

²⁵ Uria na mulu lalae garo uria aini sifi; ma si maṉa eri mulu oli naa isana Wane na kai fono toi kakalia ma kai Nanao ana maṉomulua.