I. Pita 1 - Ṉa Alaofua Falu 1923 1949

¹ Tha Pita, aposela tha Jesus Christ, isana toa na mulu lae tataka muka makafa to i Podasi, i Galesia, i Kapadosia, i Asia, ma i Bithinia,

² Na kera fili kamulua sulia si do na tha God na Maka e thaitoomana totonao, ana faaabu lamulua la atha Spirit, uria ade la sulia ṉata lana ma uria taṉasi lamulua la ana abuna tha Jesus Christ: Lea la ma enenoa kai oro alaa iamulua.

³ Taṉo nia ne God na Lord kulu tha Jesus Christ ma Maka nia, na sulia tatakomia baita nia e kwalafi kulu lau uria manatatoo ṉado la ne maruki, ana tatae lana tha Jesus Christ faisia toa mae ki,

⁴ Maakwalia si do na kuki fulatoona ne toto si taa, na kesi faataalia, ma ka ai si sui, na keka beta i thalo maakwali kamulua,

⁵ Toa na sukwaia tha God ka fono toi kakali kamulua sulia fitooa uria marukia na ka thathai fasi keki fatai nia asi maṉa iisi eri.

⁶ Si do na mulu seethathala faamau ania, boro sa asi maṉa eri keka faaliodila kamulua mena (mada sa do e ai si ei keki ilia boo iamulua neri), ana ilitooa oro eeta ki,

⁷ Fasi fitooa kamulua, uria ne inoto ka tatha ana goloda na toto kai sui boro sa kera fatai nia mena mamana lana ana era, keki fatai nia mamana lana ana taṉo la ma fare baita la ma inotoa ana fatai lana tha Jesus Christ:

⁸ Wane na musi rikia u ma muka liothau ani nia; na, boro sa musi rikia u mena, mulu fitoona, ma sui mulu seethathala faamau ania ana seethathala la na kesi talaana ṉata la sulia, na ka fuṉu ana inotoa:

⁹ Si maṉa na mulu ṉalia gwauna fitooa kamulua, na ṉa faamaruki lana maṉomulua.

¹⁰ Ma sulia marukia eri porofeta ba ki kera sosoetoona ma keka rorofe fufuli uria, toa na kera ṉata sulia lea la eri uri kamulua:

¹¹ Kera rofea si ta mado si maṉa ta na Spirit tha Christ ne ni ani kera e fatai nia si maṉa ne faamamanea totonao si do ne thaitoomana sulia to lana tha Christ ana taa la ki, ma sulia inotoa na kai fula mai iburi.

¹² Toa na kera fatai nia si kula eri isada, na fani kera e ai, fani kamulua fetei, na kera ra asi do eki, na toa na kilu ṉata sulia si faaroṉoa lea isamulua atha Spirit Abu na kera arasia mai thalo kilu faaroṉo kamulua ania; si do na aini angel ki keka thathamii lio i lala.

¹³ Mania muki alia manatamulua, muki inoto ana seemulua ma muki manatatoo ṉado sukwai uria lea la eri na toto keki ṉalia mai ifamulua ana fatai lana tha Jesus Christ;

¹⁴ Mala kala wela na kera thathamii ade sulia si ṉata, musi ade ’uria si thathami la taa totonao kamulua ki asi maṉa ne ai musi thaitoomana si do ki:

¹⁵ Ma ’uria lau boo ni nia ne aili kamulua mai e abu, ni kamulua lau boo muki abu ana abula lamulua ni sui bana;

¹⁶ Sulaania kera keda, Kamulua muki abu; uria ni nau ku abu.

¹⁷ Ma mada sa muka alaṉia ana Maka kamulua, Wane ni Kotu na ka rikia imole ki ka totoo ma ka ṉata sulida, ta wane sulia ra nia, ma ta wane sulia ra nia, muki to ana mau la si maṉa na muki makafa to bamulua:

¹⁸ Uria na mulu thaitoomana na kera tae fasi kamulua, asi do toto kai taa ki, uria silifa bia goloda, e ai, faisia abula lamulua ne ai si kwaiadomi ne ita mai ana maka kamulua nai nao ki;

¹⁹ Kera tae fasi kamulua ana ’abu inoto tha Christ, ’uria lau boo ṉa lama seena ka dodoloa me ai ta si karu si ni seena.

²⁰ Wane na kera thaitoomana boo totonao si maṉa na kesi boa u fanua nei iano, ma sui kera fatai nia ana susui lana si maṉa eki uri kamulua,

²¹ Na mulu fitoona ani nia tha God, ne tatae nia faisia toa mae ki, me falea inotoa ifana; fasi fitooa kamulua ma si do na muka manatatoo ṉado uria kai to atha God.

²² Uria na mulu faafalua maṉomulua si maṉa na mulu ade sulia mamana la eri atha Spirit ana liothau la na kesi lole ania uria baree wai doorana eki, ruruumulua kai seemabe ana liothau kwailiu la iamulua:

²³ Sulaania kera kwalafi kamulua lau iburi, asi migee do na toto kai fufuraa e ai, asi migee do na toto si fufuraa, bae lana tha God ana, do maruki na kai to ladoa.

²⁴ Sulaania, Imole ki sui boo ka ’uria lolo, Ma inotoa kera ni sui bana ka ’uria takana lolo. Lolo eri kai dele, ma takana kai asia:

²⁵ Ma bae lana tha Lord kai toto si sui. Ma si baea asi faaroṉoa lea na kera ṉata sulia isamulua neri.