I. Korinitha 9 - Ṉa Alaofua Falu 1923 1949

¹ Nau aposela e ai? nau kwasi tonee to? kwasi rikia tha Jesus Christ na Lord kulu? ni kamulua ṉa ra nau ana ṉa Lord e ai?

² Mada sa tei toa lau kesi alaṉi nau ana aposela, ni kamulua mulu alaṉi nau boo ania: uria na ni kamulua ṉa do ni faaṉado la na ka faaṉadoa thata eri iaku ana ṉa Lord.

³ Si do nau ku duua ana toa na kera ilitooku nai nia.

⁴ Kamarea mesi sukwai uria faṉa la ma kuu la?

⁵ Kamarea mesi sukwai meka tolea kini ana waiwaena kulu ki na kai liliu bi kamarea, talafana lau boo oroṉana aposela ki, ma baree wai doorana ṉa Lord, ma tha Kifasi?

⁶ Mado kamarea tha Banabasi, talifili kamarea na sukwaia si to isamarea meki ekwa ana ra?

⁷ Ni tei ana wane ana firua ki na kai firu ma kai beta suli nia i talaana? ni tei na kai fasia oolee faene, me ai si ania ta foee do ana foana? mado ni tei na kai tharea aini buloka, me ai si kuufia ta si ana susuna aini buloka eki?

⁸ Ku ṉata una eri ana ṉata lana wane ki? mado ṉa lo e ai si sorea lau boo?

⁹ Uria na kera keda ana lo tha Mosesi, Osi obia fokona buloka si maṉa na ka uruefoa aialo ana aaena. Tha God ka oga nia uria buloka eki,

¹⁰ Mado talitoona uri kulu ne ṉata una eri? Iu, uri kulu na kera keda: sulaania e kokoto na nia na kai nia theegano kai nia maakwalia si do ne lea, ma nia na kai ṉedea aialo, kai ṉedea maakwalia si maṉa na nia kai ania ta si ania.

¹¹ Mada sa mili fasia do tha Spirit ki ifamulua, do baita mado e ai na miki gwea tei si asi do kamulua ki i fanua nei iano?

¹² Mada sa tei wane ki lau kera sukwai fafi kamulua asi do eri, ni kamarea misi sukwai ka tatha? Ma sui kamarea e ai mesi ilia si do eri na mere sukwai ania; mere doanita asi do eki sui, fasi e ai mesi suusia si faaroṉoa lea tha Christ.

¹³ Musi thaitoomana na toa na kera ra asi do abu ba ki kera ania bada tei si asi do biu baita tha God ki, ma toa na kera ra ṉado ana fulii era ni foa la kera ania sina do ni foa la na kera narea iei?

¹⁴ Talafana lau boo ṉa Lord e sorea na toa na kera ṉata sulia si faaroṉoa lea, keki fale ifada maana si faaroṉoa lea eri.

¹⁵ Ma ni nau e ai kwasi ilia ta si do asi do una eki: ma nau e ai kwasi keda si do eki fasi keki ili una eri ifaku: sulaania mada sa ku mae, kai lea ka tatha ana alamatai lana wane na sa kai faaaia si do nau ku faabaita nau ania.

¹⁶ Sulaania ku ṉata mena sulia si faaroṉoa lea, sa kwa faabaita nau sulia si kula eri e ai; uria na kera suuwai nau mania; uria na taa la kai to fafi nau, mada se ai kwasi ṉata sulia si faaroṉoa lea eri.

¹⁷ Sulaania mada sa ni nau talani nau na ku thathamii ilia, kwaiara nau kai to bana ifaku: sui mada sa ni nau e ai na ku tala thathamia, ra kera na kera takofale nau ania neri.

¹⁸ Ma kwaiara nau na ṉa ta? Nia nei, na si maṉa na nau ku ṉata sulia si faaroṉoa lea, nau kwai ilia na kwai tona falea si faaroṉoa lea tha Christ, adedea sukwaia nau eri asi faaroṉoa lea e ai si ooga nau faamau.

¹⁹ Uria na ku tonee to mena faisi kera sui boo, nau ku adea na ku tonee ra ifada sui, fasi kwa tolea mai tei wane oro lau.

²⁰ Ma isana Ju ki nau ku ’uria Ju, fasi kwa tolea mai tei Ju ki; isana toa na kera roo sulia ṉa lo, ’uria sa ku roo sulia ṉa lo, fasi nau kwa tolea mai toa na kera roo sulia lo eri;

²¹ Isana toa ne ai ada ta lo, ’uria se ai akua ta lo (sui e ai kwasi to i thara mai faisia lo tha God ku roo bakua sulia lo tha Christ), fasi kwa tolea mai toa ne ai ada ta lo.

²² Isana toa na kera maketho ku wane maketho, fasi kwa tolea mai toa na kera maketho: nau ku ’uria si do ki sui bana isana wane ki sui boo, fasi asi do eki sui bana kwai faamarukia tei imole iada.

²³ Ma nau ku ilia si do ki sui boo inunufana si faaroṉoa lea eri, fasi kwai toliṉia.

²⁴ Musi thaitoomana sulia toa na kera ili uria fita fofoa la, na kera sui kera fita, sui talifilia tee nonii wane ka ṉalia kwaiara eri? Talafana lau boo muki fita, fasi muki fulatoona.

²⁵ Ma ni tei na kai susuu fasi si nia kai tatha i la lalaba la ki kai inoto ana seena asi do ki sui bana. Ma toa eki kera ilia fasi keki ṉalia do ni eregwau la na toto kai taa; ni kulu molo fasi kuki ṉalia do ne toto si taa.

²⁶ Mania nau ku fita, mala wane na ka to ana ro si lio e ai; sa kwa kumu mala wane na ka kwaea mamatalea, ka ai lau boo:

²⁷ Ku kumua seeku, ku suuwai nia ka do ni ra nau: ada mado e ai, buriana na nau ku ṉata isana tei toa lau, kesi ala fafi nau i talaaku.