I. Korinitha 8 - Ṉa Alaofua Falu 1923 1949

¹ Ma sui sulia si do ni foa la na kera faledaki ana god eeta ki: Kulu thaitoomana na thaitoomana la ni isakulua sui. Thaitoomana la ka ilia imole ka faabaita nia i talaana, ma liothau la kai faasukwaia.

² Ma mada sa ta wane manatatoona i talaana ne thaitoomana ta si do, wane eri e ai si thaitoomana u talafana si do ne kokoto kai thaitoomana;

³ Ma mada sa ta wane e liothau atha God, tha God e thaitoomana wane eri.

⁴ Mania sulia ani lana si do ni foa la na kera faledaki naa ana god eeta ki, kulu thaitoomana ne ai ta god eeta si to ana fanua nei iano, me ai lau ta god, talitoona tee God boo.

⁵ Uria na boro so tei do kera to bada na kera alaṉida ana god ki, mado i thalo mado i fanua nei iano; talafana lau boo god oro ki, ma lord oro ki kera to bada;

⁶ Sui ifakulua tee God boo, ṉa Maka, ne futaṉai nia si do ki sui bana, ma ni kulu kuka to ifana; ma tee Lord boo, na tha Jesus Christ, na si do ki sui bana ka ita mai ani nia, ma ni kulu ita lau bomai ani nia.

⁷ Ma kera sui boo e ai na kera thaitoomana si do eri: ma tai wane ki, na kera roṉoa ṉado god eeta eri ka fula asi maṉa eri, kera ania do eri mala do ni foa la na kera falea naa ana god eeta; ma kera faataalia lioda uria ne ai si sukwai.

⁸ Sui faṉa sa ka adomi kulu mai isatha God e ai: uria, mada sa kuki ania bakulua, e ai kusi lea ka tatha uria si do eri; ma mada sa kuka to faisia, e ai ta do si aana faisi kulu lau boo.

⁹ Ma muki beta suli kamulua ada mado e ai sukwaia kamulua eri na ṉa do ni faataofai lana toa na kera maketho.

¹⁰ Sulaania mada sa ta wane ka riki oe no thaitoomana lea maalutana si do ki oki teoreri oki faṉa i lala biu ta god eeta, ta na sa si do eri kai faaseeraraa nia, si maṉa na liona e ai si sukwai, fasi kai ania do ni foa la na kera faledaki naa ana god eeta ki, mado?

¹¹ Mania ana manata lea la oe, wane ne maketho kai sui, doorakulua na tha Christ e mae uri nia?

¹² Ma si maṉa na muki abula taa una eri ana baree wai doorana, ma muki labatania lioda ne ai si sukwai, muki abula taa lau boo atha Christ.

¹³ Mania, mada sa faṉa ka faataofai nia dooraku, nau e ai kwasi ania lau sina see ta do, ka thafalii asi maṉa eri ka oli alaa naa, ada kwa faataofai nia dooraku.