I. Korinitha 7 - Ṉa Alaofua Falu 1923 1949

¹ Ma sulia si do ba na mulu kekeda mai sulidaki: Lea ifana wane ne ai si suana kini.

² Ma sui, sulia oe la ki, wane kai tolea kwaina i talaana, ma kini ana kwaina i talaana lau boo.

³ Wane ila wane kai falea ana ai nia si do ne farana: ma ai ila ai kai falea ana wane nia si do ne farana lau boo.

⁴ Ai ila ai sa ka ana ana seena i talaana e ai, wane nia na kai inoto iana: ma talafana lau boo wane ila wane e ai si ana ana seena i talaana, ma ai nia na kai inoto iana.

⁵ E ai mosi abula dodora iamoroa, talitoona bana ta kasi maṉa faekwa si maṉa na moka to ana tee si lio ania, fasi moki fale kamaroa teefau ana foa la, sui moki to ofu lau, ada tha Satan ka bae aliṉamoroa uria na mosi inoto ana seemoroa.

⁶ Ma ku sorea si do eri mena, ku alamatania bakua, sa kwa faaroṉo kamulua muki ilia e ai.

⁷ Uria nau ku thathamia wane ki sui keka to bada ’uria lau boo ni nau. Una ena mena, kulu sui boo kulu ṉalia si fale la kulu ita mai atha God, tee nonii wane una eri, ma tee wane lau unei.

⁸ Mania nau ku soree isana imole ki na kesi toowane ma isana gwa oru ki, Lea ifada na keki to bada ’uria lau boo ni nau.

⁹ Ma mada se ai kesi inoto ana seeda, keki toowane: uria na toowane la e lea ka tatha ana akofi lada.

¹⁰ Ma nau ku faaroṉoa imole ki na kera toowane naa, ma ni nau e ai, ṉa Lord ana ne sorea, Kini sa ka lae faisia kwaina e ai.

¹¹ (Sui mada sa nia lae nana, kai to tee nia, mado kai kwaimani lau bia kwaina); ma ṉa wane e ai si akwasia ai nia.

¹² Ma isana oroṉana toa ni nau bana ku ṉata, ṉa Lord e ai: Mada sa ta wane ana doorakulua ki ana ta ai ne fitala, ma ai eri e thathamii to isana sa ka akwasi nia e ai.

¹³ Ma kini na kwaine fitala, ma wane eri e thathamii to isana, sa ka akwasia kwaina ka ai lau boo.

¹⁴ Uria na wane ne fitala kera faaabua ana kwaina, ma ai ne fitala kera faaabua ana kwaina: mada se ai kesi faaabu nia una eri, wela kamulua na ṉa do taa ki; ma si maṉa eri kera abu boo.

¹⁵ Una ena mena, mada sa imole ne fitala ka thathamii lae, kai lae bana: doorakulua eri mado waiwaena kulu kesi suuwai nia kai to isana kwaina asi kula eri: tha God e aili kulu ana enenoa.

¹⁶ Uria ni oe, no ai ila ai, nifana ade lana fasi oki thaitoomana sa mado e ai oki faamarukia kwaimu? mado ni oe, no wane ila wane, nifana ade lana fasi oki thaitoomana sa mado e ai oki faamarukia ai oe?

¹⁷ Ma sui wane eki sui boo, talafana ṉa Lord e ukalia iada, talafana tha God e ailida mai, alafana na keki abula. Ma si do nau ku soree isana figua eki sui boo neri.

¹⁸ Kera ailia mai ta wane na kera kwai kali nia inao? sa nia kai ’uria wane na kesi kwai kali nia e ai. Kera ailia mai ta wane ne ai kesi kwai kali nia inao? wane eri sa keka kwai kali nia iburi ka ai lau boo.

¹⁹ Kwai kakali la tonee do ni bana, mada sa kesi ilia do eri, tonee do ni lau boo; keki ade boo sulia si ṉata fifi tha God ki.

²⁰ Kamulua sui muki to sulia to lamulua asi maṉa na kera aili kamulua mai.

²¹ Kera aili oe mai si maṉa no wane na kera suuwai oe oko tona ra bamua? e ai si oga oe boo: sui mada sa kera alamatai oe na toto oki tonee to, oki ra asi do eri.

²² Uria ni nia na kera ailia mai ana ṉa Lord, si maṉa e wane na kera suuwai nia ne tona ra bana, ṉa Lord e ilia na nia ka tonee to: talafana lau boo, nia na kera ailia mai si maṉa e wane ne tonee to bana, kera suuwai nia kai tona ra ifatha Christ.

²³ Kera usi kamulua sui naa; musi usi iamulua fasi keki suuwai kamulua muki tonee ra ifana imole ki.

²⁴ Doora kera, to la na wane e toto ania si maṉa kera ailia mai, to la eri boo kai to mania bia tha God.

²⁵ Ma sui sulia thari ki e ai akua ta si ṉata fifi ita mai ana ṉa Lord: sui kwai faaroṉo ana manataku, mala wane na Lord e faasukwai nau mai ana tatakomia nia, ku mamana.

²⁶ Mania nau ku manataia na si do nai kai lea maana unii taa la si maṉa eri, lea ifana wane kai to sulia to lana asi maṉa eri.

²⁷ O wane ila wane sui naa? osi thathamii lukasia kwaimu. O wane ne ai amua ta kwai? osi rofea ta kwai.

²⁸ Ma mada soki tole kini, e ai osi abula taa; ma mada sa ta thari kai toowane, nia e ai si abula taa. Sui toa na keki ade una eri keki rikia taa la i seena imole: ma nau ku thathamii suusia faisi kamulua.

²⁹ Ma tee si do nau ku sorea, doora kera, kera lofoṉurusia si maṉa eri, fasi ita asi maṉa eri kai lae alaa, wane ila wane ki keki ’uria wane ki ne ai kesi tole kini;

³⁰ Ma toa na kera aṉi, ’uria se ai kesi aṉi; ma toa na kera seethathala, ’uria se ai kesi seethathala; ma toa na kera usia si do ki, ’uria se ai kesi rikii do;

³¹ Ma toa na kera ṉalia fanua nei iano ana do ni ra kera, ’uria se ai si ooga kera faamau: sulaania si do na kera rikia i fanua nei iano toto kai tatha.

³² Ma nau ku thathamia na muki tonee to faisia si do ki na ka oga kamulua. Wane ne ai ana ta kwai ka oga nia asi do ṉa Lord ki, fasi kai faalea ṉa Lord:

³³ Wane ila wane ni ana ka oga nia asi do ana fanua nei iano ki, fasi kai faalea ai nia.

³⁴ Ma ai ila ai ka eeta lau boo faisia thari. Ai ne thari ka oga nia asi do ṉa Lord ki, fasi kai abu, seena bia spirit nia lau boo: ma ai ne toowane naa ka oga nia asi do ana fanua nei iano ki, fasi kai faalea wane nia.

³⁵ Ma si do eri nau ku sorea fasi kwai adomi kamulua; fasi kwai u ana manutori fafi kamulua e ai, ma uria si do ne faramulua, ma fasi muki thathai asi do na tha God kai thathamia, e ai amulua ta do fasi muka oga ania.

³⁶ Ma mada sa ta wane manataia i talaana ne ai si abula kokoto uria thari nia, mada sa thari eri kai ’uria fufuri otota ne sui kai rafo naa, ma si do eri e kokoto, kai ilia boo si do nia thathamia; e ai si abula taa; keki toowane.

³⁷ Ma ni nia na ka alua manatana ana tee si lio, ne ai kesi suuwai nia, ne sukwai fafia si do nia thathamia, ne sorea naa i ruruuna na nia kai beta sulia thari nia kai thari ṉado, wane eri kai abula lea.

³⁸ Mania wane na kai falea thari nia fasi kai toowane kai abula lea; ma wane ne ai si falea fasi kai toowane kai abula lea ka tatha.

³⁹ Ai ila ai kai to ṉado isana kwaina si maṉa na wane eri kai maruki bana; sui mada sa kwaina ka mae, nia tona to fasi kai toowane bia ni tei ne thathamia; ma ana ṉa Lord na kai ilia.

⁴⁰ Sui kai lea ka tatha iana mada sa nia kai to kai oru ṉado; manataku neri: ma nau ku manataia na Spirit tha God kai to bana isaku lau boo.