I. Korinitha 5 - Ṉa Alaofua Falu 1923 1949

¹ Kera sorea mena oe la e ni maalutamulua, ma oe la na Jenetaele ki mena e ai kesi oe ania, na tee nonii wane e tolea kwaina maka nia.

² Ma mulu faabaita kamulua, e ai musi liodila ania, fasi keka arasia wane ne abula taa una eri ka lae faisi kamulua e ai.

³ Ma ni nau, boro sa seeku e ai si to mena isamulua, spirit nau ka to bi kamulua, ma ’uria sa nau ku to bakua isamulua, ku ṉata naa mala wane ni kotu sulia wane eri ne ilia si do eri,

⁴ Ana thatana tha Lord Jesus, si maṉa na muki ofu mai, ma spirit nau ni lau boo, ana sukwaia Lord kulu tha Jesus Christ,

⁵ Keki falea wane una eri isatha Satan na kai labatania seena, fasi keki faamarukia spirit nia afa boṉi eri tha Lord Jesus.

⁶ Faabaita lamulua i talaamulua e ai si lea. Musi thaitoomana na ta kasi lefena faekwa kai dolana sui bana kumu eri?

⁷ Mania muki faafalu kamulua faisia lefena nai nao u, fasi kamulua na kumu falu, uria na lefena eri kai ei naa faisi kamulua. Uria na tathafafi la kulu kera thauṉia lau bonaa, na tha Christ:

⁸ Mania kuki faaabua fafaṉa eri, ana lefena u mai inao e ai, ana ṉa lefena asi lio ne taa ma ana abula taa la ka ai lau boo, ana berede ne ai ta lefena si ni iei na si lio ne ai si lole ma mamana la.

⁹ Nau ku kekeda kau isamulua ana leta nau ba ne ai musi to kwaimani bia toa na kera oe;

¹⁰ Sui sa muki to teefau faisia toa nei iano na kera oe, mado kera thathamia si do ta wane, mado kera abula dodora, mado kera foa ana god eeta ki e ai; uria na si do eri e afetai iamulua si maṉa na musi lae teefau faisia fanua nei iano:

¹¹ Ma si maṉa eri ku kekeda kau isamulua, fasi musi to kwaimani bia wane na kera alaṉi nia ana doorakulua, si maṉa nia ka oe, mado ka thathamia si do ta wane, mado ka foa ata god eeta, mado ka ṉata taa, mado ka kukuu ka bula nia, mado ka abula dodora; bia wane una eri, sa muki faṉa mena e ai dodoloa.

¹² Sulaania uria ta na nau kwa oga nau ana ṉata la mala wane ni kotu sulia toa nai thara? Ta na sa toa kamulua na kera to i maalutamulua na muki ṉata mala wane ni kotu sulia,

¹³ Ma toa nai thara tha God ana, na Wane ni Kotu, kai ṉata sulia, mado? Mania muki arasia wane taa kai lae faisi kamulua.