I. Korinitha 4 - Ṉa Alaofua Falu 1923 1949

¹ Ta wane kai alaṉi kamilia ana toa ni ra tha Christ, ma toa na kera takofale kamilia asi do tha God ki ne toto thaufuni.

² Ma sui lau boo, si maṉa na kera takofalea ta wane ana ta si do, keki rofea wane ne mamana.

³ Ma ni nau si do eri e faekwa bana iaku sa ni kamulua muki ṉata mala wane ni kotu suli nau, mado imole ka ṉata una eri: iu, ma ni nau e ai kwasi ṉata mala wane ni kotu suli nau i talaaku.

⁴ Uria ni nau e ai kwasi rikia ta si do kekeo i ruruuku; sui kesi ala fafi nau uria si do eri: Wane ni Kotu na kai ṉata suli nau na ṉa Lord.

⁵ Mania musi ṉata mala wane ni kotu sulia atona bana ta si do, si maṉa ana ili lana e ai u; to si amulua maakwalia ṉa Lord kai fula, na kai fatai lalaa asi do thaufuni ki ana maerodo, ma kai fatai nia si manata la ne toto i rurui imole ki; ma asi maṉa eri tha God kai taṉo kulu, ta wane, sui ta wane.

⁶ Ma si do eki, doora kera, ku sorea suli nau ma tha Apolosi ana tarifula uri kamulua; fasi ani kamarea muki too uria thaitoomana lana ne ai si lea na muki ilia ka tatha asi do na kera keda sulia; fasi e ai ta wane iamulua si faabaita nia ifana ta wane fasi si nia kai tatha ata wane lau.

⁷ Sulaania ni tei ne faabaita oe lau ana tei wane? ma ṉa ta asi do no rikidaki na kesi falea iamu? sui mada sa kera falea iamu, uria ta no faabaita oe i talaamu, uria sa kesi falea?

⁸ Si maṉa eri mulu abusu naa, si maṉa eri mulu rikii do naa, mulu inoto, ni kamilia e ai faisi kamulua: iu ma nau ku thathamia sa mulu inoto mamana boo, fasi ni kamilia lau boo mika inoto bi kamulua.

⁹ Sulaania nau ku manataia na tha God e fatai kamilia aposela ki iburi bonaa, mala wane ki na kera sorea mae lada: uria na kera alu kamilia fasi fanua nei iano kai bubu, ma aini angel ki, ma imole ki.

¹⁰ Kamilia mili oewanea inunufatha Christ, ma ni kamulua liomulua e too ni atha Christ; kamilia mili feda, ma ni kamulua mulu sukwai; inotoa ni iamulua, ma fare faekwa la iamilia.

¹¹ Ka fula asi kadee maṉa eri mena mili thaofa, liomilia e lalaṉa, e ai amilia ta maku, kera kumu kamilia, me ai amilia ta si kula ni to ṉado;

¹² Ma mili ulafu, mili ra ana abamilia i talaamilia: kera ṉata taa uri kamilia, ma mili ṉata lea; kera tona ilamatai kamilia, ma mili susuu ania;

¹³ Kera ṉata ana faretoliṉi lamilia la, ma mili ṉata marabibi isada: kera alu kamilia mili ’uria si do ne gweroa ne makwa i fanua nei iano, ma ’uria lolo na kera kaofia, ka fula asi maṉa eri mena.

¹⁴ Nau e ai kwasi kekeda kau si do nei ki fasi kwa faaseenoni kamulua e ai, fasi kwa faamanatai kamulua mala wela liliothaua nau ki.

¹⁵ Uria na amulua tee akwalee tooni wane ni kwaifamanatai atha Christ ki mena, maka kamulua ki e ai kesi oro: sulaania atha Christ Jesus ni nau ku kwalafi kamulua asi faaroṉoa lea eri.

¹⁶ Mania ku ṉata kwaitakoi, ku soree isamulua, muki ade ’uria si ade la na mulu rikia ani nau.

¹⁷ Uria si kula eri ku arasia kau tha Timothiasi isamulua, ne wela liliothaua ma mamana nau ana ṉa Lord, na kai faaroṉo kamulua lau ani nau muki onotoona abula laku na ni atha Christ, talafana si do ni nau ku kwaifamanatai sulia ana figua eki sui boo ta fanua si ei.

¹⁸ Ma tei toa kera faabaita kera i talaada, ’uria sa nau e ai kwasi lae kau isamulua.

¹⁹ Sui nau kwai makee lae bokau isamulua, mada sa ṉa Lord e thathamia; ma nau sa kwa thaitoomana bae lana toa eri na kera faabaita kera i talaada e ai, kwai thaitoomana sukwaia kera.

²⁰ Uria na tooa tha God asi baea e ai ana sukwaia ni ana.

²¹ Ta si ta na muki thathamia? kwai fula kau isamulua fafia si ’ei ni kwaikwae, mado ana liothau la ma ana spirit ana abula marabibi la?