I. Korinitha 3 - Ṉa Alaofua Falu 1923 1949

¹ Ma ni nau, doora kera, ku dora ania ṉata la isamulua mala ana toa tha Spirit ki, mala ana toa nei iano ni bana, mala ana wela faekwa ki atha Christ.

² Ku thare kamulua ana susu ni bana, ana faṉa e ai; uria na musi farana: ma si maṉa eri ni mena, e ai musi farana;

³ Uria na mulu ’uria toa nei iano ki ka fula asi maṉa eri: sulaania si maṉa na uga la ma firu la ma oli susuu la ka ni u i maalutamulua, musi ’uria toa nei iano ki, ma musi abula asi abula la imole ki?

⁴ Uria na si maṉa na tee nonii wane ka sorea, Nau wane tha Polo; ma tee wane lau, Ni nau wane tha Apolosi; musi imole ki?

⁵ Ṉa ta ni atha Polo? ma ṉa ta ni atha Apolosi? Wane ni ra ki na kero ilia na mulu fitoo; ta wane iamarea ma ta wane iamarea talafana fale la na tha God e falea ifana.

⁶ Ni nau ku fasia foee do ki, tha Apolosi e kikia ana kafo; ma tha God ana e falea unii do.

⁷ Mania nia na ka fasia e ai si baita, ma nia na ka kikia ana kafo ka ai lau boo; tha God boo na ka falea unii do eri.

⁸ Ma nia na ka fasia ma nia na ka kikia ana kafo mere tee do boo: sui meki ṉalia kwaiara kamarea, ta wane sulia ra nia ma ta wane sulia ra nia.

⁹ Uria ni kamarea toa ni ra ofu la bia tha God: kamulua ṉa oolee do tha God, ma biu tha God.

¹⁰ Sulia lea la tha God na kera falea mai iaku, uria wane inoto ana kasi lana biu na lioku e too, ku alua gwa fau totonao ki; ma tee wane lau ka kasibiu i fafona. Sui toa ni sui boo muki beta suli kamulua, ta wane u boo i talaana ma ta wane u boo i talaana, kasi la na nia kai kasia i fafona.

¹¹ Uria ne ai ta wane si talaana alu lana lau tei gwa fau totonao, talitoona bana si do na kera alua naa, na tha Jesus Christ.

¹² Sui mada sa ta wane ka alua fafia si do totonao eri ta si goloda, ta si silifa, tei fau na kera usi baita ania, ta si ei, ta si lolo, ta si ei ne rere;

¹³ Kamulua sui, ta wane si ei boo, keki fatai nia si ra kamulua: uria na fa boṉi eri kai fatai nia, sulaania keki fatai nia fa boṉi eri ana era; ma era eri i talaana kai ilitoona ra ta wane sa ka lea mado e ai.

¹⁴ Mada sa ra ta wane na nia e thauwai nia fafia do eri kai to bana, nia kai ṉalia kwaiara.

¹⁵ Mada sa era kai akofia ra ta wane, tei si do lea kai aana faisi nia: ma ni nia keki faamaruki nia; ma ’uria wane na keki aba mai faisia era.

¹⁶ Musi thaitoomana na ni kamulua biu baita tha God, ma Spirit tha God ka to ani kamulua?

¹⁷ Mada sa ta wane kai labatania biu tha God, tha God kai labatania wane eri; sulaania biu tha God e abu, ma biu eri na ni kamulua.

¹⁸ Ta wane si tala lole nia i talaana. Mada sa ta wane e manatatoona i talaana na lione too i maalutamulua i kada nei, wane eri kai oewanea, fasi liona kai too mamana boo.

¹⁹ Uria na liotooa i fanua nei iano na ṉa oewanea la inaofatha God. Uria na kera keda, Nia ka ṉalia toa na liode too ki ana aikwai na kera alua i talaada:

²⁰ Ma kera keda lau, Tha Lord e thaitoomana manata lana toa na liode too ki, ne tonee do.

²¹ Mania ta wane si faabaita nia sulia imole ki. Uria na si do ki sui bana na ṉa do kamulua ki;

²² Tha Polo, mado tha Apolosi, mado tha Kifasi, mado fanua nei iano, mado marukia, mado maea, mado si do ni maṉa eri ki, mado si do ni u ki mai; si do ki sui bana na ṉa do kamulua ki;

²³ Ma ni kamulua do tha Christ ki; ma tha Christ Do tha God.