I. Korinitha 16 - Ṉa Alaofua Falu 1923 1949

¹ Ma sulia ofumalefo la ifana toa abu eki, talafana nau ku soree isana figua ba ki i Galesia, alafana lau boo ni kamulua muki ilia.

² Sulia fa boṉi totonao ana uiki kamulua sui, ta wane u boo i talaana, ma ta wane u boo i talaana, kai alua si ana ana wai malefo, sulia todado lana, fasi e ai ta ofumalefo la si maṉa ni nau kwai fula.

³ Ma lalae ku fula, ni tei bana na muki ala fafia ana leta ki, toa eki kwai arasida keki ṉalia si do na muki tona falea uri Jerusalema:

⁴ Ma mada sa kai kokoto na nau kwai lae lau boo, keki lae bi nau.

⁵ Ma nau kwai fula isamulua, si maṉa na kwai tatha totonao i Masedonia; uria nau kwai tatha boo i Masedonia;

⁶ Sui kwai to si akua bi kamulua too, mado kwai to sulia unii gwagwaria ni mena, fasi muki adomi nau ana lae laku kau uria atona bana ta si kula na nau kwai lae uri iei.

⁷ Uria nau kwasi thathamii riki kamulua si maṉa eri na kwai tatha; sulaania do ku manatatoo ṉado uria na nau kwai to ka suka tau bi kamulua, mada sa ṉa Lord kai alamatai nau.

⁸ Ma nau kwai to si akua i Efesasi maakwalia Taṉafula‐limana‐tafulu fa boṉi eri;

⁹ Uria na maethaka baita ana ra sukwai kera ifinia ifaku, ma maalimae ki kera oro.

¹⁰ Ma mada sa tha Timothiasi kai lae isamulua, beta suli kamulua fasi kai tonee to bi kamulua, mau la ka ai faisia; uria ni nia ka ra ana ra ṉa Lord, ’uria lau boo ni nau:

¹¹ Mania ta wane si fare faekwa ani nia. Muki adomia kau sulia laea nia ana enenoa, fasi kai lae mai isaku: uria ni nau ku maakwali nia bia baree wai doorana eki.

¹² Ma sulia doorakulua eri na tha Apolosi, ku ṉata kwaitakoi isana sa ka lae isamulua bia baree wai doorana eki: ma nia e ai dodoloa si thathamii lae si maṉa eri; sui nia kai lae bokau si maṉa seena e thathala.

¹³ Muki tharai, muki takwe ṉado asi do eki na kulu fitoona, muki abula mala wane, muki sukwai.

¹⁴ Si do ki sui bana na muki ilia muki ilia ana liothau la.

¹⁵ Nau ku ṉata kwaitakoi, ku soree isamulua, doora kera (mulu thaitoomana toa i maafera tha Sitefanasi, na kera foee do totonao ki i Akaia, ma kera alua manatada ana tee si lio keka ra ṉado ifana toa na kera abu),

¹⁶ Muki roo sulia toa una eki, ma sulia ni tei na kai kwaiadomi ana ra eri ma kai ulafu ania.

¹⁷ Ma nau ku seethathala ana fula lana tha Sitefanasi ma tha Fotiunatasi ma tha Akaikasi: uria si do ni kamulua musi ilia ifaku, kera ilia naa.

¹⁸ Uria na kera faasukwaia spirit nau ma spirit kamulua ki kuka to lea lau bakulua: mania muki ala fafia toa na kera ade una eri.

¹⁹ Figua nai Asia ki kera thathamia kwai ṉata isamulua ’uria sa ni kera kera ṉata. Tha Akwila ma ni Pirisila kero thathamia kwai ṉata faamau isamulua ’uria sa ni keroa kero ṉata ana ṉa Lord, bia figua nai maafera keroa.

²⁰ Baree wai doorana eri sui boo kera thathamia kwai ṉata isamulua ’uria sa ni kera kera ṉata. Muki ṉata isamulua kwailiu ’uria sa ni nau ku ṉata ana nonoi la abu.

²¹ Ṉata laku tha Polo ana abaku i talaaku.

²² Mada sa ta wane ka ai si liothau bana atha Lord Jesus Christ, keki alua taa la fafi nia. Ṉa Lord kulu ni karaṉi mai.

²³ Lea la tha Lord Jesus Christ kai to bi kamulua.

²⁴ Liothau la nau kai to bi kamulua sui boo atha Christ Jesus. Emeni.