I. Korinitha 15 - Ṉa Alaofua Falu 1923 1949

¹ Sui nau kwai faaroṉo kamulua, doora kera, asi faaroṉoa lea eri na nau ku ṉata sulia isamulua, na mulu ṉalia lau boo, na muka takwe lau bamulua ania,

² Si do na kera faamaruki kamulua lau boo ania, mada sa muki rau ṉado asi ṉata eri na nau ku faaroṉo kamulua ania, mada se ai musi tonee fitoo.

³ Uria nau ku falea kau iamulua totonao si do ni nau ku ṉalia lau boo, na tha Christ e mae uria abula taa laka ki sulia kekeda la abu eki;

⁴ Ma kera alua i la kwaiṉeia; ma kera tataea ana ula fa boṉi sulia kekeda la abu eki;

⁵ Me fatai nia isatha Kifasi; sui isana akwala ma ro nonii wane eki;

⁶ Sui e fatai nia isana ofu la ana lima taleṉee wane ma ka ta ana doorakulua ki, ma baita lana wane eki kera to bada si maṉa eri, sui tei toa iada kera biṉa naa;

⁷ Sui e fatai nia isatha Jemesi; sui isana aposela eki sui boo;

⁸ Ma buriana bonaa, ’uria isana wela bibina, nia e fatai nia lau boo isaku.

⁹ Uria ni nau wane nai buri bonaa ana aposela ki, ne ai kwasi farana keki alaṉi nau ana aposela, sulaania nau ku tona ililamatai nia figua tha God.

¹⁰ Sui ana lea la tha God nau ku fula asi do nau ku fulatoona: ma lea la nia ne falea mai iaku na ṉa tonee do e ai; nau ku ulafu ana ra ne oro ka tatha ani kera sui boo: ni nau e ai neri, lea la tha God bana na ni isaku.

¹¹ Mania mado ni nau na ku ilia mado ni kera, si do na mili ṉata sulia neri, ma si do na mulu fitoona.

¹² Sui mada sa kera faaroṉo atha Christ na kera tataea naa faisia toa mae ki, ka ufita na tei toa iamulua kera sorea ne ai bana ta tatae la ana toa mae ki?

¹³ Mada se ai bana ta tatae la ana toa mae ki, tha Christ lau boo kesi tataea:

¹⁴ Sui mada se ai kesi tataea tha Christ, ṉata lamilia ṉa tonee do, ma fitooa kamulua ṉa tonee do ni lau boo.

¹⁵ Iu, ma kera fulatoomilia na mili lole fafia tha God; uria na mili faamamanea si do na mili thaitoomana sulia tha God na nia e tataea tha Christ: Wane ne ai si tataea bana, mada se ai kesi tataea toa mae ki.

¹⁶ Sulaania mada se ai kesi tataea toa mae ki, tha Christ lau boo kesi tataea:

¹⁷ Ma mada se ai kesi tataea tha Christ, fitooa kamulua na tonee do; ka fula asi maṉa eri mulu to u bamulua ana abula taa la kamulua ki.

¹⁸ Ma ni kera lau boo na kera biṉa naa atha Christ kera sui bonaa.

¹⁹ Mada sa ana talitoona to lakulua i fanua nei iano kulu manatatoo ṉado uria si do lea ki atha Christ, do na kera tatakomi kulu ka tatha ana imole ki sui bana.

²⁰ Ma si maṉa eri kera tataea boo tha Christ faisia toa mae ki, na foee do totonao ana toa na kera biṉa naa.

²¹ Sulaania ’uria lau boo ṉa maea e thafali mai ana wane, ṉa tatae la ana toa mae ki e ita lau bomai ana wane.

²² Uria na talafana atha Adam keru sui boo kera mae, alafana lau boo atha Christ keki faamaruki kera sui boo.

²³ Ma wane eki sui boo keki lae too ṉado: Christ na foee do totonao; sui toa na keki do tha Christ ki, ana fula lana mai.

²⁴ Sui toto gwauna si do ki, si maṉa na nia kai falea ṉa tooa isatha God na Maka; buriana na nia kai faaaia totonao inotoa ni sui bana ma gwauwai la ni sui bana ma sukwaia ni sui bana.

²⁵ Uria ni nia kai inoto e ai si ei boo, maakwalia si maṉa na nia toto kai alua maalimae nia ki ka sui bana keki roo suli nia ifara aaena.

²⁶ Maalimae iisi na nia toto kai faaaia na maea.

²⁷ Sulaania, Ni nia e alua si do ki sui bana kai roo sulia ifara aaena. Ma si maṉa nia sorea, Kera alua si do ki sui bana kai roo sulia, do fatai na ni nia e ai faisida ne alua do eki sui bana kai roo sulia.

²⁸ Ma si maṉa na toto keki alua naa si do eki sui bana kai roo sulia, sui ṉa Kaluwane lau boo i talaana kai roo suli nia ne alua si do eki sui bana ka roo sulia, fasia tha God kai inoto ani kera sui boo.

²⁹ Mado si ta na keki ilia, toa na kera babataesida ifana toa mae ki? Mada se ai dodoloa kesi tataea toa mae, uria ta lau na kera babataesi kera ifada?

³⁰ Ma ni kamilia lau boo, uria ta na mili to karaṉia maea tee si kadee maṉa si ei?

³¹ Iu, ’uria lau boo ku faabaita nau ani kamulua, atha Christ Jesus na Lord kulu, ku mae sulia boṉi.

³² Ku firu mena, mala wane ki, bia do aala kwasi ki i Efesasi, ka ufita fasi do eri ka adomi nau mada se ai kesi tataea toa mae ki? kuki faṉa nakulua ma kuki kuu, uria na i usuwadi kuki mae naa.

³³ Musi lolole kamulua: Ado la bia toa taa ki toto kai faataalia wane to lana e kokoto.

³⁴ Muki tharai ana kokoto la, ma musi abula taa; uria na tei toa kesi thaitoomana tha God: ku ṉata una eri fasi kwa faaseenoni kamulua.

³⁵ Ma ta wane kai sorea, Keki tatae ufita ana toa mae ki? ma see do ta na toto keki lae mai ania?

³⁶ Oe wane o oewanea, si do na ni oe o fasia e ai si maruki, si maṉa ne ai si mae u:

³⁷ Ma si do no fasia, osi fasia see do na toto kai tae mai, foee do ni bana, foana uiti too, mado ta foee do eeta mena;

³⁸ Ma tha God ana kai falea see iana talafana si do nia thathamia, ata fo seena i talaana, ma ata fo eeta lau seena i talaana.

³⁹ Ana si do maruki ki sui bana seeda na kesi totoo: ana imole ki seeda i talaada, ma ana do ana fai ae ki seeda ne eeta, ma ana gwa ia ki seede eeta lau bana, ma ana thaaro ki ta do lau nana.

⁴⁰ Ma tei see do ana tha lolo, ma tei do lau bana ana fanua nei iano: sui inotoa see do eki ana thalo lo ka eeta, ma inotoa see do eki ana fanua nei iano ka eeta lau boo.

⁴¹ Ana ṉa thato inotoa nia i talaana, ma ana ṉa madami inotoa nia e eeta, ma ana fa bubulu ki inotoa kera e eeta lau bana; uria na tee fa bubulu e eeta lau bana faisia ta fo ana inotoa nia.

⁴² Alafana lau boo tatae lana toa mae ki. Kera fasia see do na toto kai fufuraa; keki tataea see do na toto si fufuraa:

⁴³ Kera fasia ana fare faekwa la; keki tataea ana inotoa: kera fasia ana makethoa; keki tataea ana sukwaia:

⁴⁴ Kera fasia see do mala fanua nei iano; keki tataea see do atha Spirit. Mada sa see do mala fanua nei iano kai to bana, do tha Spirit kai to lau boo.

⁴⁵ ’Uria lau boo na kera keda, Tha Adam totolenao na ṉa do maruki. Tha Adam, Wane buri, na ṉa Spirit na kai kwaifaamaruki.

⁴⁶ Ma do totonao ṉa do tha Spirit e ai, do fanua nei iano bana; sui do tha Spirit.

⁴⁷ Wane totonao ita mai i theegano, do ana gano nania: Wane iburi na ṉa Lord ne ita mai ana ṉa thalo.

⁴⁸ Talafana wane eri ana gano, alafana lau boo toa ana gano: ma talafana Wane eri i thalo mai, alafana lau boo toa i thalo mai.

⁴⁹ Ma talafana kulu toto sulia nuna wane ana gano, alafana lau boo toto kuki to sulia nuna Wane i thalo.

⁵⁰ Ma si do nau ku sorea neri, doora kera, na mariko ma abu e ai si talaana fulatoona lana tooa tha God; ma do na toto kai fufuraa ka ai si fulatoona si do na kai toto ka ai si fufuraa.

⁵¹ Rikia fasi, kwai fatai nia do ne toto thaufuni isamulua: Kulu sui boo sa kuka biṉa e ai, ma kulu sui boo kuki tatala,

⁵² Ata kasi maṉa seseka, si maṉa na kera maaru, ana buṉu iisi: uria na keki ufia buṉu, ma keki tataea toa mae ki ana see do na kai toto ka ai si taa, ma kuki tatala.

⁵³ Uria na imole nei na toto kai fufuraa kai tooni nia, e ai si ei boo, asi do na kai toto ka ai si fufuraa, ma imole nei na toto kai mae kai tooni nia, e ai si ei boo, asi do na kai toto ka ai si mae.

⁵⁴ Ma si maṉa na imole nei na toto kai fufuraa kai tooni nia asi do na kai toto ka ai si fufuraa, ma imole nei na toto kai mae kai tooni nia asi do na kai toto ka ai si mae, si maṉa eri si ṉata eri kai mamana na kera keda na ba, Ṉa maea kera thuthumai nia asi do na si nia kai tatha ania.

⁵⁵ Maea ae, nifei nia fi lamu? Maea ae, ka ufita fasi si oe kai tatha?

⁵⁶ Fi lana maea na abula taa la; ma sukwaia abula taa la na ṉa lo:

⁵⁷ Ma sore lea kai ifatha God, na kai falea si kula eri ifakulua na si kulu kai tatha ania ana Lord kulu tha Jesus Christ.

⁵⁸ Mania, doora liliothaua nau ki, muki takwe ṉado, kesi idu kamulua, muki seemabe ṉado faamau ana ra ṉa Lord, sulaania mulu thaitoomana na ra na mulu ulafu ania ta tonee do e ai ana ṉa Lord.