I. Korinitha 12 - Ṉa Alaofua Falu 1923 1949

¹ Ma sui sulia si do tha Spirit ki, doora kera, nau ku lalakwa na muki dora ania maalutana.

² Mulu thaitoomana si maṉa ba na mulu Jenetaele ki, kera tole garo ani kamulua ana god eeta ba ki na fokode ato, ifei na kera thathamii tole kamulua uri iei.

³ Mania nau kwai faaroṉo kamulua muki thaitoomana, ne ai ta wane na kai bae ana Spirit tha God kai sorea Taa la kai to fafia tha Jesus; me ai ta wane si talaana sore lana, Tha Jesus kai Lord, talitoona bana atha Spirit Abu.

⁴ Ma si fale la tataka ki ka to bana, sui tee Spirit boo.

⁵ Ma si ra tataka ki ka to bana, sui tee Lord boo.

⁶ Ma si do tataka ki na kera ra ania, sui tee God boo, na ka ra asi do ki sui bana ana imole eki sui boo.

⁷ Ma ni tei na kera fatai nia tha Spirit ani nia, kera fatai nia fasi kai kwaiadomi ania.

⁸ Uria ana tee nonii wane kera falea atha Spirit si ṉata ana liotooa; ma ata wane lau si ṉata ana thaitoomana la, ana tee Spirit eri boo:

⁹ Ata wane lau fitooa, ana tee Spirit eri boo; ata wane lau kera falea si kula eri na nia kai faamarukia toa na kera matai ki, ana tee Spirit eri boo;

¹⁰ Ma ata wane lau ra la ana ra sukwai ki; ma ata wane lau ṉata la mala porofeta; ata wane lau thaitoomana lana maalutana spirit ki: ata wane lau kai ṉata ana ṉata la oro eeta ki; ata wane lau toolaṉai lana ṉata la ki:

¹¹ Ma si do eki sui bana tee Spirit eri boo ka ilia, kai toliṉia iakulua sulia si do ni nia kai thathamia.

¹² Uria na talafana seena imole tee do, ma si do ki na ana seena imole eri ka oro, ma si do ki sui boo na ana seena imole, ka oro mena, ka ofu ana tee see do; alafana lau boo tha Christ.

¹³ Uria ana tee Spirit kera babataesi kia sui ana tee see do, Ju ki mado toa i Girisi, toa na kera suuwanida keka tona ra mado toa na kera tonee to; ma kera ilia na kia sui boo kia kuu ana tee Spirit.

¹⁴ Uria na seena imole ana talitoona tee do e ai, si do oro ki kera ofu ania.

¹⁵ Mada sa aaena ka sorea, Sulaania nau abee imole e ai, nau do ana seena imole e ai; kai to mai i thara faisia see do maana si ṉata la eri?

¹⁶ Ma mada sa aliṉa ka sorea, Sulaania nau maana imole e ai, nau do na ana seena imole ka ai lau boo; kai to mai i thara faisia see do maana si ṉata la eri?

¹⁷ Mada sa seena imole ni sui talitoona maa, nifana maalutana fasi ka roṉoi? Mada sa do eri ni sui talitoona aliṉa, nifana maalutana fasi si do ki ka makwafi nia?

¹⁸ Ma si maṉa eri tha God e alua si do eki sui bana na ana seena imole, sulia si do ni nia e thathamia.

¹⁹ Ma mada sa si do eki sui kera tee si do na ana see do, nifana maalutana see do eri?

²⁰ Ma si maṉa eri si do ki na ana seena imole ka oro, ma ka ofu ana tee see do boo.

²¹ Me afetai sa maana ka soree isana abana, Nau e ai kwasi rofea ta si do noki ilia iaku: mado gwauna ka soree isana ro ae nia ki, Nau e ai kwasi rofea ta si do na moki ilia iaku.

²² E ai dodoloa kesi una eri, ma si do ki na ana seena imole na kera rikida na kesi sukwai, do eki na kera rofe faamau urida:

²³ Ma si do ki na ana seena imole, na kulu rikia na kera suka fare faekwa ania, do eki na kuka fare baita faamau ania; ma si do ki na riki lada si lea, keki falea si kula eri iada na kera lea ka tatha;

²⁴ Sulaania si do kulu na riki lada ka lea kesi rofe ada ta do: ma tha God e thauwai nia seena imole, ka faabaita faamau si do na kera fare faekwa ania;

²⁵ Fasi tafulu si lio ka ai si to ana seena imole; fasi si do ki na ana seena imole keki beta kwailiu suli kera.

²⁶ Ma si maṉa na tee si do na ana seedo eri ka to ana taa la, oretana si do ki sui kera to ana taa la lau boo bia; mado kera fare baita ana tee si do, si do eki sui kera seethathala bia.

²⁷ Ma ni kamulua na seena tha Christ, ma imole iamulua talifili nia si kula ana see do eri.

²⁸ Ma tha God e alua tei toa ana figua eri, etana aposela ki, ruana porofeta ki, ula toa ni kwaifamanatai, sui ra sukwai ki, sui faamaruki lana toa na kera matai ki, kwaiadomi la ki, tatha la inaoda, ṉata la ana ṉata la eeta ki.

²⁹ Ni kera sui boo kera aposela ki? ni kera sui boo kera porofeta ki? ni kera sui boo kera toa ni kwaifamanatai? ni kera sui boo kera ra asi ra sukwai ki?

³⁰ Ni kera sui boo kera faamarukia toa na kera matai ki? ni kera sui boo kera ṉata ana ṉata la eeta ki? ni kera sui boo kera toolaṉania si ṉata la eki?

³¹ Muki thathamia faamau si fale la baita ka tatha ki. Ma nau kwai fatai nia tala ne lelea ka tatha isamulua.