I. Korinitha 11 - Ṉa Alaofua Falu 1923 1949

¹ Muki ade ’uria si ade la na mulu rikia ani nau, ’uria lau boo ni nau ku ade ’uria si do na nau ku rikia atha Christ.

² Sui nau ku tano kamulua, doora kera, uria na mulu onotooku asi do ki sui, ma mulu rau ṉado asi kwaifamanataia ba ki, ’uria lau boo nau ku faaroṉo, kamulua ania.

³ Ma nau ku thathamia muki thaitoomana, na gwauna wane ki sui boo na tha Christ; ma gwauna ṉa kini na ṉa wane; ma gwauna tha Christ na tha God.

⁴ Ni tei ana wane ki na ka foa mado ka ṉata mala porofeta, ana gwauna ne thu fafia, kai fare faekwa ana gwauna.

⁵ Ma ni tei ana kini ki na ka foa mado ka ṉata mala porofeta, ana gwauna ne ai si thu fafia, kai fare faekwa ana gwauna: uria na do eri kai ’uria sa kera sufia gwauna.

⁶ Uria na mada sa kesi thu fafia gwauna ta kini, lea na keki sufia gwauna lau boo: sui mada sa do ne faaseenonia ta kini na keka iria ifuna mado keka sufia gwauna, lea na keki thu fafia lau boo.

⁷ Uria na wane, e ai si lea na keki thu fafia gwauna, sulaania nia nuna tha God ma do na ka faainoto nia: sui ṉa kini na ṉa do na ka faainotoa ṉa wane.

⁸ Uria na ṉa wane e ai si ita mai ana ṉa kini; ṉa kini bana ne ita mai ana ṉa wane:

⁹ Sulaania e ai kesi thauwai nia ṉa wane ifana ṉa kini; ṉa kini ana kera thauwai nia ifana ṉa wane:

¹⁰ Mania e kokoto na ṉa kini kai alua si do na kai thau ana inotoa kai to fafia gwauna, uria aini angel eki.

¹¹ Ma sui ṉa wane sa ka to tee nia ana ṉa Lord, ṉa kini e ai faisi nia, e ai, ma ṉa kini sa ka to tee nia, ṉa wane e ai faisi nia, ka ai lau boo.

¹² Uria na talafana ṉa kini e ita mai ana ṉa wane, alafana lau boo ṉa wane ka futa mai ana ṉa kini; ma si do ki sui bana ka ita mai atha God.

¹³ Muki sorea i talaamulua: do oolo mado e ai na kini kai foa atha God si maṉa na kesi thu fafia gwauna?

¹⁴ Imole e ai si tala thaitoomana bana, na, mada sa ta wane ana ifuna ne tekwa, do eri kai faaseenoni nia?

¹⁵ Ma mada sa ta kini ana ifuna ne tekwa, do eri kai faainoto nia: uria na kera falea ifuna ifana fasi kai thu fafi nia.

¹⁶ Ma mada sa ta wane thathamii oli susuu fafia si do eri, biraṉamilia e ai dodoloa, ma biraṉana figua tha God ki ka ai lau boo.

¹⁷ Sui si maṉa nau ku faaroṉo kamulua una eri, nau e ai kwasi taṉo kamulua uria si do nei, na mulu figu mai ma figua eri e ai si adomi kamulua, ka faataali kamulua bana.

¹⁸ Uria na si do totonao, si maṉa na mulu figu mai ana figua eri, nau ku roṉoa na mulu to ana tafulu si lio; ma si do nau ku suka faamamanea neri.

¹⁹ Uria na kwaifamanataia eeta ki kai fula e ai si ei boo i maalutamulua, fasi toa na kera ala fafida keki to fatai i maalutamulua.

²⁰ Mania si maṉa na mulu figu mai, e afetai naa sa muka ania fafaṉa i thaulafia ṉa Lord:

²¹ Sulaania ana faṉa lamulua kamulua sui mulu ania inaofana toa eki, ta wane si faṉa nia, ma ta wane si faṉa nia; ma tee nonii wane ka faṉa kwasi, ma ta wane lau ka kukuu ka bula nia.

²² Ma ṉa ta neri? e ai amulua tai maafera fasi muka faṉa ma muka kuu iei? mado mulu fare faekwa ana figua tha God, ma muka faaseenoni ana toa na kesi rikii do? Ta si ta na kwai soree isamulua? kwai taṉo kamulua maana si do eri? E ai kwasi taṉo kamulua ania.

²³ Uria ni nau ku ṉalia ana ṉa Lord si do na nau ku faaroṉo kamulua lau boo ania, na tha Lord Jesus afa rodo eri na kera faaalamai nia e ṉalia berede;

²⁴ Ma buriana ne sore lea ania, ka nia, ka sorea, Muki ṉalia, muki ania: seeku nai nia, na kai to ifamulua: muki ilia si do nei ana manatai laku la.

²⁵ Talafana lau boo ṉa titiu, si maṉa na kera faṉa sui naa, me una eri, Titiu nei na ṉa alaofua falu ana abuku: muki ilia ṉado si do nei, si maṉa na muki kuufia, ana manatai laku la.

²⁶ Sulaania asi maṉa ni sui bana na toto muki ania si berede nei, ma muki kuufia ṉa titiu, muki fatai nia mae la ṉa Lord maakwali nia kai fula.

²⁷ Mania ni tei bana na kai ania berede nei mado kai kuufia titiu ṉa Lord nei ana abula lana ne ai si farana, kai abula taa ana seena ma abuna ṉa Lord.

²⁸ Ma wane kai lio uri nia i talaana, sui kai bii ania ta si ana ṉa berede, ma kai kuufia ta si ana ṉa titiu.

²⁹ Uria wane na ka ania ma ka kuu ana abula lana ne ai si farana, kai ania ma kai kuu ana kwae lana i talaana, mada sa nia e ai si thaitoomana maalutana seena ṉa Lord.

³⁰ Sulia si kula eri toa oro i maalutamulua kera feda ma keka matai, ma toa oro kera biṉa.

³¹ Uria mada sa kulu lio uri kulu i talaakulua, wane ni kotu sa ka ṉata suli kulu e ai.

³² Sui si maṉa na wane ni kotu ka ṉata suli kulu, ṉa Lord ana ka kwae kulu uria faaoolo lakulua, ada keka sorea kwae lakulua bia toa na fanua nei iano.

³³ Mania, doora kera, si maṉa na muki figu mai uria faṉa la, muki maakwali kamulua kwailiu.

³⁴ Ma mada sa ta wane e thaofa, kai faṉa ana i maafera nia, fasi kwae la e ai si fulatoomulua maana figu lamulua. Ma oretana do eki kwai kokotoa atona bana ta si maṉa na toto kwai fula isamulua.