I. Korinitha 10 - Ṉa Alaofua Falu 1923 1949

¹ Ma sui nau ku lalakwa, doora kera, sa muki dora ana maalutana si do nei, na maka kamilia ki sui boo kera toto ifara si datha eri, ma kera sui boo kera tatha i maalutana amali;

² Ma kera babataesida sui atha Mosesi lala si datha eri ma i la amali;

³ Ma kera sui kera ania ta si ana tee faṉa tha Spirit;

⁴ Ma kera sui kera ku’u ana tee kafo tha Spirit: uria na kera kukuu ana gwa fau tha Spirit ne lae iburiada: ma gwa fau eri na tha Christ.

⁵ Una ena mena, baita lada tha God e ai si ala fafida: uria na kera thauṉida i la fanua kwasi.

⁶ Ma asi do eki kera thau ani kulu, fasi e ai kusi thathamia si do taa ki, ’uria lau boo ni kera kera thathamia.

⁷ Ma ni kamulua musi foa ana god eeta ki, ’uria lau boo tei toa iada; ’uria si do na kera keda, Toa eki kera ono bada fasi keka faṉa ma keka kuu, sui kera tatae fasi keki kakale ada.

⁸ Bia kusi oe, ’uria lau boo tei toa iada kera oe bada, ma ro molee wane ma ulu tooni wane iada kera funu ana tee fa boṉi.

⁹ Bia kusi ilitoona tha Christ, ’uria lau boo tei toa iada kera ilitoona, ma wa aala ba ki ka thauṉida keka mae.

¹⁰ Bia musi uuubulu taa, ’uria lau boo tei toa iada kera uubulu taa, ma nia ne kwaithauṉi e thauṉida keka sui.

¹¹ Ma si do eki sui boo e fulatooda fasi ka thau ani kulu; ma kera keda sulia si do eki uria faamanatai lakulua la, ni kulu na gwauna si maṉa eki e fula naa fafi kulu.

¹² Mania nia na ka manataia i talaana na nia takwe ṉado, wane eri kai beta suli nia ada kai asi nia iano.

¹³ E ai kesi bae aliṉamulua ana bae aliṉa la na imole e ai si talaana tofe la faisia: ma tha God e mamana, kei ei si alamatanida keki bae aliṉamulua ka tatha asi do na muki sukwai ania; ma bia bae aliṉa la eri kai fatai nia lau boo tala na muki thaka ania, fasi muki tofe faisia.

¹⁴ Mania, toa liliothaua nau ki, muki thaka faisia foa la ana god eeta ki.

¹⁵ Nau ku ṉata mala isana wane na liode too ki; muki ilitoona si do nau ku sorea.

¹⁶ Titiu ba ana lea la na kuka alua lea la kai to fafia, kwaimani lea la ana abuna tha Christ e ai bana nania? Berede ba na kulu nia, kwaimani lea la ana seena tha Christ e ai bana nania?

¹⁷ Uria na ni kulu, na kulu oro mena, kulu tee fa berede, tee seedo: uria na kulu sui boo kuka ania ta si ana tee fa berede eri.

¹⁸ Rikia fasi Isirela mala fanua nei iano: ta na sa toa eki na kera ania do ni foa la ki keki to ana kwaimani lea la bia fulii era ni foa la eri, mado?

¹⁹ Sui si ta na nau ku sorea? na god eeta na ṉa do mamana, mado do ni foa la na kera falea ana god eeta ki ṉa do mamana?

²⁰ Nau ku sorea na do ni foa la eki na Jenetaele ki kera falea, kera falea ana spirit taa ki, atha God e ai: ma nau ku lalakwa na muka to ana kwaimani lea la bia spirit taa ki.

²¹ Muki dora ania kuufi lana titiu ṉa Lord, ma ṉa titiu spirit taa ki: muki dora ania ṉali lana ta si ana tatafe ṉa Lord, ma ana ṉa tatafe spirit taa ki.

²² Mado kulu faaelua ṉa Lord kai fako? kulu sukwai ka tatha ani nia?

²³ Kera alamatania si do ki sui ifaku; ma do eki sui boo sa ka kwaiadomi e ai. Kera alamatania si do ki sui ifaku; ma do eki sui boo sa ka faasukwaia imole e ai.

²⁴ Ta wane si rofea si do na kai faalea nia i talaana, kai rofea si do na kai faalea doorana.

²⁵ Atona bana ta si do na kera usi ania i maana usia, oki ania boo, osi soetoona maalutana uria liomu fasi kai lea;

²⁶ Uria na fanua nei iano na ṉa do tha Lord, ma si do eki sui bana ne fuṉu ania lau boo.

²⁷ Mada sa ta wane ana toa na kera fitala kai laefi kamulua muki lae isana fafaṉa, ma muki thathamii lae; atona bana ta si do na kera alua inaofamulua, muki ania, musi soetoona maalutana uria liomulua fasi kai lea.

²⁸ Ma mada sa ta wane kai soree isamulua. Do na kera falea naa ana foa la ana god eeta ki nai nia, musi aania, uria wane eri ne fatai nia isamulua, ma uria liona imole fasi kai lea: uria na fanua nei iano na ṉa do tha Lord, ma do eki sui bana ne fuṉu ania lau boo:

²⁹ Liomu i talaamu e ai, uria liona wane eri; sulaania uria ta na liona ta wane lau kai ṉata mala wane ni kotu suli nau na ku tonee to bakua?

³⁰ Uria mada sa nau ku ania ta si asi sore lea la, uria ta na kera ṉata taa suli nau fafia si do nau ku sore lea uria?

³¹ Mania mada sa muki faṉa, mado muki kuu, mado atona bana ta si do na muki ilia, muki ilia bamulua ifana inotoa tha God.

³² Musi lukatania si maṉa na muki faataofai nia Ju ki, mado toa i Girisi ki, mado figua tha God:

³³ Talafana ni nau lau boo ku faalea wane ki sui boo asi do ki sui bana, kwasi rofe uria si do na kai adomi nau i talaaku e ai, si do na kai adomia toa oro eki, fasi keki faamarukida.