I. Korinitha 1 - Ṉa Alaofua Falu 1923 1949

¹ Tha Polo, wane na kera aili nau ku aposela tha Jesus Christ asi do na tha God e thathamia, ma doorakulua na tha Sothenisi,

² Isana figua tha God nai Korinitha, toa na kera faaabu kamulua atha Christ Jesus, na kera aili kamulua muki toa abu, bia toa eki sui boo i fanua ni sui bana na kera ’ai thatana tha Jesus Christ, ne Lord kera ma Lord kulu lau boo:

³ Lea la iamulua ma enenoa ita atha God na Maka kulu ma atha Lord Jesus Christ

⁴ Ku sore lea ṉado ana God nau uri kamulua, uria lea la tha God na kera falea iamulua atha Jesus Christ;

⁵ Uria na kera ilia na mulu rikii do ani nia asi do ki sui, asi baea oro ki ma ana thaitoomana lana si do ki sui bana;

⁶ ’Uria lau boo kera faaṉadoa ani kamulua si do na kera faamamanea sulia tha Christ:

⁷ Fasi e ai ta do na kera tona falea si ei faisi kamulua; maakwalia fatai lana na Lord kulu tha Jesus Christ;

⁸ Na kai faaṉado kamulua lau boo ka fula ana susui la, muki dodoloa afa boṉi eri na Lord kulu tha Jesus Christ.

⁹ Tha God e mamana, na kera aili kamulua mai ani nia muki kwaimani lea bia Kaluwane nia tha Jesus Christ na Lord kulu.

¹⁰ Sui nau ku ṉata kwaitakoi isamulua, doora kera, ku soree isamulua ana thatana Lord kulu tha Jesus Christ, kamulua sui muki ṉata asi ṉata la ne totoo, musi to ana tafulu si lio; ma keki oolo kamulua muki to ofu ana tee si lio ma ana tee si manata la.

¹¹ Sulaania toa ni Kiloe kera faaroṉo nau mai ani kamulua, doora kera, na firu la ki ni maalutamulua.

¹² Ma si do na nau ku ṉata sulia neri, na mulu sorea, too tee wane iamulua, Nau wane tha Polo; ma Ni nau wane tha Apolosi; ma Nau wane tha Kifasi; ma Ni nau wane tha Christ.

¹³ Kera toliṉia tha Christ? kera fota fafia tha Polo ana ’ai rarafolo ba uri kamulua? mado kera babataesi kamulua ana thatana tha Polo?

¹⁴ Nau ku sore lea atha God ni nau e ai kwasi babataesia ta wane lau iamulua, talitoona bana tha Kiripasi ma tha Gaiasi;

¹⁵ Ada ta wane ka sorea na nau ku babataesi kamulua ana thataku i talaaku.

¹⁶ Ma nau ku babataesia lau boo toa ni maafera tha Sitefanasi: ma nau kwasi thaitoomana sa mado e ai ku babataesia ta imole lau.

¹⁷ Uria na tha Christ e ai si arasi nau mai kwai babataesi, kwai ṉata bakua sulia si faaroṉoa lea eri: ana ṉata laku mala wane na lione too e ai, ada mado e ai keka faaaia ’ai rarafolo tha Christ.

¹⁸ Uria si baea sulia ’ai rarafolo eri ifana toa na kera to sula tala ana maea ka oewanea la; ma fani kulu na kulu to sula tala ana marukia ṉa sukwaia tha God.

¹⁹ Uria na kera keda, Nau kwai labatania liotooa toa na liode too ki, Ma manata kali lana toa na kera manata kali nau kwai tofe faisia.

²⁰ Nifenia wane na lione too? nifenia wane ni kekeda la? nifenia wane ni oli susuua mala kada nei? ta na sa tha God e malawela liotooa fanua nei iano, mado?

²¹ Uria na sulaania ana liotooa tha God fanua nei iano ana liotooa nia i talaana e dora ania tha God, tha God e thathamia ana oewanea la si do na kera ṉata sulia kai faamarukia toa na kera fitoo.

²² Sulaania Ju ki kera gania bala si do ki, ma toa i Girisi keki rofe uria liotooa:

²³ Ma ni kamilia mili ṉata sulia tha Christ na kera fota fafi nia ana ’ai rarafolo, isana Ju ki do na kera taofai kera ania, ma isana toa i Girisi ki oewanea la;

²⁴ Ma isana toa eki na kera ailida mai, ana Ju ki ma ana toa i Girisi lau boo, tha Christ na ṉa sukwaia tha God, ma ṉa liotooa tha God.

²⁵ Uria na oewanea la tha God si nia ka tatha ana liotooa imole ki; ma makethoa tha God ka sukwai ka tatha ana imole ki.

²⁶ Uria na muki rikia aili la na kera aili kamulua mania, doora kera, na toa na liode too ki ana seeda i talaada kesi oro, ma toa sukwai kesi oro, ma toa inoto kesi oro isamulua:

²⁷ Ma tha God e filia si do oewanea i fanua nei iano ki, fasi ka faaseenonia si do na liode too ki; ma tha God e filia si do maketho i fanua nei iano ki, fasi ka faaseenonia si do na kera sukwai;

²⁸ Ma si do kelawanea i fanua nei iano ki, ma si do na kera fare faekwa iada, tha God e filia, ma si do ne ai ta do si ni anida, fasi nia kai faaaia si do na kera to bada:

²⁹ Fasi e ai ta imole si faabaita nia i talaana inaofana.

³⁰ Ma ni kamulua mulu ita mai ani nia atha Christ Jesus, na kera alu nia kai liotooa ifakulua ita mai atha God, ma kokoto la ma faaabu la, ma tae la faisikulu:

³¹ Fasi, ’uria si do na kera keda na ba, Wane na kai faabaita nia, kai faabaita nia atha Lord.