I. Jone 5 - Ṉa Alaofua Falu 1923 1949

¹ Ni tei bana na ka fitoo na tha Jesus na ṉa Christ e futa atha God: ma ni tei na ka liothau ana ṉa Maka kai liothau ana wela nia lau boo.

² Asi kula eri kulu thaitoomana na kulu liothau ana baree wela tha God, si maṉa na kulu liothau atha God, ma kulu ade sulia si ṉata fifi nia ki.

³ Sulaania liothau la uria tha God neri, na kuka ade sulia si ṉata fifi nia ki: ma si ṉata fifi nia ki do kulua e ai.

⁴ Uria atona bana ta do ne futa atha God si nia kai tatha ana fanua nei iano: ma si do na si nia kai tatha ana fanua nei iano, na fitooa kulu.

⁵ Ni tei na si nia kai tatha ana fanua nei iano, mada sa wane eri e ai na ka fitoo na tha Jesus na ṉa Kaluwane tha God?

⁶ Nia boo neri ne lae mai ana kafo ma ’abu, tha Jesus Christ; ana talitoona bana kafo eri e ai, ana kafo eri ma ana ṉa ’abu. Ma tha Spirit neri na ka faamamanea si do nia thaitoomana, uria na tha Spirit na ṉa mamana la.

⁷ Sulaania toa na kera faamamanea si do kera thaitoomana i thalo kera ulu Ei, ṉa Maka, ma ṉa Baea, ma tha Spirit Abu: ma ulu Ei eki tee God boo.

⁸ Ma ni kera na kera faamamanea si do na kera thaitoomana i fanua nei iano kera ulu do, tha Spirit, ma ṉa kafo, ma ṉa ’abu: ma ulu do eki ṉata lada ka totoo.

⁹ Mada sa kulu fitoona si do na imole ki kera faamamanea sulia si do kera thaitoomana, si do na tha God e faamamanea sulia si do nia thaitoomana e baita ka tatha: uria na faamamane la tha God neri, ne faamamanea si do nia thaitoomana sulia Kaluwane nia.

¹⁰ Wane na ka fitoona Kaluwane tha God faamamane la eri e to ani nia: wane ne ai si fitoona tha God e alaṉi nia ana lole la; uria ne ai si fitoona faamamane la na tha God e faamamanea sulia Kaluwane nia.

¹¹ Ma faamamane la eri neri, na tha God e falea marukia tatha ifakulua, ma marukia eri ni ana Kaluwane nia.

¹² Wane ana ṉa Kaluwane ana ṉa marukia; wane ṉa Kaluwane tha God ka ai faisi nia ṉa marukia ka ai faisi nia.

¹³ Si do eki ku keda kau isamulua, fasi muki thaitoomana amulua marukia tatha, ni kamulua na mulu fitoona thatana Kaluwane tha God.

¹⁴ Ma seeraa la na ni iakulua uri nia neri, na, mada sa kuka gania atona bana ta si do sulia si do nia thathamia, nia roṉoa ṉata lakulua:

¹⁵ Ma mada sa kulu thaitoomana na nia roṉoa ṉata lakulua atona bana ta si do na kuka gania, kulu thaitoomana si do eki ifakulua na kulu gania ani nia.

¹⁶ Mada sa ta wane rikia doorana kai abula taa ana abula taa la na kesi maelia, wane eri kai gani, ma tha God kai falea marukia iana ifana toa na kesi abula taa ana abula taa la na keki maelia. Abula taa la na keki maelia ka to bana: sulia si do eri e ai na nau ku sorea nia kai gani.

¹⁷ Abula la ni sui bana ne ai si kokoto na ṉa abula taa la: ma abula taa la na kesi maelia ka to bana.

¹⁸ Kulu thaitoomana ni tei bana ne futa atha God e ai si abubula taa lau; ma wane eri ne futa atha God kai beta suli nia, ma tha Taa e ai si sua nia.

¹⁹ Kulu thaitoomana kulu do tha God ki, ma fanua nei iano sui boo ka teo atha Taa.

²⁰ Ma kulu thaitoomana na Kaluwane tha God e fula naa, me falea manata lea la ifakulua, fasi kuka thaitoomana ni nia ne mamana, ma kulu to ani nia ne mamana, ana Kaluwane nia tha Jesus Christ. Ṉa God mamana neri, ma marukia tatha.

²¹ Kala wela ki, beta suli kamulua faisia god eeta ki. Emeni.