I. Jone 3 - Ṉa Alaofua Falu 1923 1949

¹ Muki rikia fasi liothau la baita eri na ṉa Maka e liothau iakulua ania, na keki alaṉi kulu ana wela tha God ki: mania fanua nei iano ka ai si thaitoomakulua, uria ne ai si thaitoomana ni nia.

² Toa liliothaua nau ki, si maṉa eri kulu baree wela tha God, ma kesi fatai nia u si do na toto kuki fulatoona. Kulu thaitoomana na, maṉa na toto keki fatai nia, riki lakulua kai ’uri nia; uria na kuki rikia seena ana to lana i maṉa eri.

³ Ma ni tei na ka manatatoo ṉado uria si do eri ani nia kai faafalu nia i talaana, ’uria lau boo ni nia e falu.

⁴ Ni tei bana na ka abula taa ka ilia lau boo si do na kera lufia: sulaania abula taa la na ṉa ili lana si do na kera lufia.

⁵ Ma mulu thaitoomana na kera fatai nia fasi ka ṉalia abula taa la kulu ki; me ai ta abula taa la si ni ani nia.

⁶ Ni tei bana na ka to ani nia e ai si abubula taa lau: ni tei bana na kai abula taa ṉado lau e ai si riki nia, me ai si thaitoomana.

⁷ Kala wela ki, musi alamatania ta wane si tole garo ani kamulua: wane na ka ilia kokoto la e kokoto, ’uria lau boo ni nia e kokoto:

⁸ Wane na ka abula taa ṉado, do tha devil nania; uria na tha devil ka abula taa ṉado ita i thafali la mai. Sulia si kula eri kera fatai nia Kaluwane tha God, fasi nia kai labatania si ra tha devil ki.

⁹ Ni tei bana ne futa atha God e ai si abubula taa lau, sulaania si lio ana Maka nia e to ani nia: ma nia dora ania abula taa la, sulaania nia futa atha God.

¹⁰ Asi kula eri kera fatai nia baree wela tha God, ma baree wela tha devil: ni tei bana ne ai si ilia kokoto la do tha God e ai, ma ni tei ne ai si liothau ana doorana.

¹¹ Sulaania si ṉata na mulu roroṉoa ita i thafali la mai neri, ne kokoto na kuki liothau kwailiu ani kulu:

¹² ’Uria tha Kena na nia do tha Taa, me thauṉia doorana, e ai. Me thauṉi nia uria ta? Uria na si ra nia ki e taa, ma si ra doorana e kokoto.

¹³ Musi kwekwele, doora kera, mada sa fanua nei iano ka riki kamulua ka taa.

¹⁴ Kulu thaitoomana na kulu tatha naa faisia maea uria marukia asi kula eri, na kulu liothau ana baree wai doorana. Wane ne ai si liothau ana doorana e to bana ana maea.

¹⁵ Ni tei bana na ka rikia doorana ka taa na ṉa wane ne thauwane: ma mulu thaitoomana ne ai ta wane ne thauwane ana marukia tatha na ni ani nia.

¹⁶ Asi kula eri kulu thaitoomana liothau la, uria ni nia e falea maṉona uri kulu: me kokoto na ni kulu kuki falea maṉokulua uria baree wai doorana eki.

¹⁷ Ma ni tei bana ne rikii do asi do ana fanua nei iano ki, ma ka rikia doorana ka to ana rofe la, ma ka fonoa tatakomia nia faisia, nifana ade lana na liothau la tha God ka to ana wane eri?

¹⁸ Kala wela ki, kusi liothau ana toa ana bae lakulua, mado ana meakulua; ana abula lakulua bana ma ana mamana la.

¹⁹ Ma asi kula eri kuki thaitoomana ni kulu do ana mamana la, ma kuki faababatooa ruruukulua inaofana;

²⁰ Uria mada sa ruruukulua kai alaṉi kulu ana ta si do, tha God e baita ka tatha ana ruruukulua, ma nia thaitoomana si do ki sui bana.

²¹ Toa liliothaua nau ki, mada sa ruruukulua e ai si alaṉi kulu ana ta si do, kuki seeraa uria tha God;

²² Ma si do ki sui bana na kuki gania, kuki ṉalia ani nia, uria na kulu ade sulia si ṉata fifi nia ki, ma kuka ilia si do nia rikia ka lea ki.

²³ Ma si ṉata fifi nia nai nia, kuki fitoona thatana Kaluwane nia tha Jesus Christ, ma kuki liothau kwailiu ani kulu, ’uria lau boo e soree isakulua.

²⁴ Ma wane na ka ade sulia si ṉata fifi nia ki ka to ani nia, ma ni nia ka to ana wane eri. Ma asi kula eri kulu thaitoomana na nia to ani kulu, atha Spirit ne falea ifakulua.