I. Jone 2 - Ṉa Alaofua Falu 1923 1949

¹ Kala wela nau ki, si do eki ku keda kau isamulua, fasi e ai musi abula taa. Ma mada sa ta wane kai abula taa, akulua Wane na kai ṉata ifakulua isana ṉa Maka, tha Jesus Christ, Wane kokoto:

² Ma nia Wane na ka dianalio faisi kulu uria abula taa la kulu ki; ma talitoona abula taa la kulu ki e ai, abula taa la toa na fanua nei iano ka sui bana.

³ Ma asi kula eri kuki thaitoomana suli kulu na kuki thaitoomana ni nia, mada sa kuki ade sulia si ṉata fifi nia ki.

⁴ Wane na ka sorea, Ni nau ku thaitoomana, ma ka ai si ade sulia si ṉata fifi nia ki, wane ni lole neri, ma mamana la eri e ai si to ani nia:

⁵ Ma ni tei bana na kai ade sulia bae lana, ana wane eri kera faasukwaia mamana boo liothau la tha God. Asi kula eri mili thaitoomana na mili to ani nia:

⁶ Wane na ka sorea ne to ani nia, lea na wane eri kai abula lau boo sulia abula lana.

⁷ Doora kera, si ṉata fifi falu e ai na nau ku keda kau isamulua, si ṉata fifi u inao ne to isamulua ita i thafali la mai: si ṉata fifi u inao eri na si baea na mulu roṉoa naa.

⁸ Ma sui lau boo, si ṉata fifi falu neri na nau ku keda kau isamulua, do ne mamana ani nia ma ani kamulua: sulaania maerodo ka tatha, ma ṉa lalaa la mamana ka laa si maṉa eri mena.

⁹ Wane na ka sorea nia to ana ṉa lalaa la, ma ka rikia doorana ka taa, wane eri e to i la maerodo ka fula asi maṉa eri.

¹⁰ Wane ne liothau ana doorana ka to i la lalaa la, me ai ana ta do na ka kwaitaofai.

¹¹ Ma wane na ka rikia doorana ka taa ka to i la maerodo, ma ka lae i la rodo, ma ka dora ana ifei na ka lae uria, sulaania maerodo eri e faarorodoa maana.

¹² Kwai kekeda kau isamulua, kala wela ki, sulaania abula taa la kamulua ki kera manata lubea ana thatana.

¹³ Kwai kekeda kau isamulua, wane na mulu welaa ki, sulaania mulu thaitoomana ni nia na ka to bana ita i thafali la mai. Kwai kekeda kau isamulua, kala wane ki, sulaania kamulua si kamulua e tatha atha Taa. Kwai kekeda kau isamulua, kala wela ki, sulaania mulu thaitoomana ṉa Maka.

¹⁴ Ku kekeda sui naa isamulua, wane na mulu welaa ki, sulaania mulu thaitoomana ni nia na ka to bana ita i thafali la mai. Ku kekeda sui naa isamulua, kala wane ki, sulaania mulu sukwai, ma bae lana tha God ka to ani kamulua, ma si kamulua e tatha atha Taa.

¹⁵ Musi liothau ana fanua nei iano, ma si do nai fanua nei iano ki. Mada sa ta wane ka liothau ana fanua nei iano, liothau la ana ṉa Maka e ai si ni ani nia.

¹⁶ Uria na si do ki sui bana nai fanua nei iano, si do na seena imole ka thathamia, ma si do na maana imole ka thathamia, ma si lio ana faabaita lakulua la i talaakulua sulia to lana imole, si do ṉa Maka e ai, si do fanua nei iano ki bana.

¹⁷ Ma fanua nei iano kai tatha, ma thathami la nia lau boo: ma wane na kai ade sulia si do na tha God e thathamia kai toto si sui.

¹⁸ Kala wela ki, si kadee maṉa iisi neri: ma talafana na mulu roṉoa maalimae tha Christ na kai lae mai, si maṉa eri mena maalimae oro tha Christ ki kera tae mai; ma asi do eri kulu thaitoomana si kadee maṉa iisi ne fula.

¹⁹ Kera lae kau faisi kulu, sui do kulu ki e ai; sulaania mada sa kera do kulu ki, do keki to ṉado isakulua: sui kera lae kau, fasi keki to fatai na kera sui boo na do kulu ki e ai.

²⁰ Ma isamulua gwai eri na Wane Abu eri e kiki kamulua ania, ma mulu thaitoomana si do ki sui bana.

²¹ Nau e ai kwasi kekeda kau isamulua sulaania musi thaitoomana mamana la eri, sulaania mulu thaitoomana boo, ma sulaania lole la do ana mamana la eri e ai.

²² Wane ni lole eri ni tei, mada sa ni nia e ai ne tofea tha Jesus ne ai si Christ? Maalimae ba tha Christ neri, wane na ka sorea e dora bana ana ṉa Maka ma ṉa Kaluwane.

²³ Ni tei bana na ka sorea e dora bana ana ṉa Kaluwane, wane eri e ai ana ṉa Maka: wane na ka faamamanea ṉa Kaluwane ana ṉa Maka ni lau boo.

²⁴ Ma ni kamulua, do eri kai to ani kamulua na mulu roroṉoa ita i thafali la mai. Mada sa do eri na mulu roroṉoa ita i thafali la mai kai to ani kamulua, kamulua lau boo muki to ana ṉa Kaluwane, ma ana ṉa Maka.

²⁵ Ma alaṉaia eri ne alaṉai nia iakulua nai nia, ṉa marukia tatha.

²⁶ Si do eki ku keda kau isamulua sulia toa na keka tole garo ani kamulua.

²⁷ Ma ni kamulua, gwai eri na nia e kiki kamulua ania ka to ani kamulua, ma musi rofea ta wane na kai kwaifamanatai isamulua; ma ’uria lau boo do nia e kiki kamulua ania ka kwaifa manatai isamulua sulia si do ki sui boo, ma ka mamana, ma do ni lole la e ai, ma ’uria si do ne tooa isamulua, muki to ani nia.

²⁸ Ma si maṉa eri, kala wela ki, muki to ani nia; fasi, maṉa na toto keki fatai nia, kuki seeraa, maakulua si asia isana ana fula lana mai.

²⁹ Mada sa mulu thaitoomana na nia kokoto, muka thaitoomana ni tei lau boo na ka ilia kokoto la e futa ani nia.