I. Jone 1 - Ṉa Alaofua Falu 1923 1949

¹ Si do ne to bana ita ana thafali la mai, si do na mili roṉoa, si do na mili rikia ana maamilia, si do na mili lio sulaania, ma ro aba kamilia ki e suana, sulia ṉa Baea ana marukia

² (Uria na kera fatai nia ṉa marukia, ma mili rikia, ma mika faamamanea si do na mili thaitoomana sulia, ma mika faaroṉo kamulua ana ṉa marukia tatha, ne toto isana ṉa Maka, sui keka fatai nia isamilia);

³ Si do eri boo na mili rikia ma mili roṉoa mika faaroṉo kamulua ania, fasi ni kamulua lau boo muki to ni kwaimani lea la bi kamilia: iu, ma kwaimani lea la kamilia eri do bia ṉa Maka, ma bia Kaluwane nia na tha Jesus Christ:

⁴ Ma si do eki mika keda isamulua, fasi seethathala la kamulua kai too bonaa.

⁵ Ma si ṉata eri na mili roṉoa ani nia, ma mika faaroṉo kamulua ania nai nia, na tha God na ṉa lalaa la, ma ani nia e ai dodoloa ta maerodo.

⁶ Mada sa kuka sorea na kulu to ni kwaimani lea la bi nia, sui kuka lae i la rodo, kuka lole, ma kusi ilia si do ne mamana:

⁷ Ma mada sa kuki lae i la lalaa la, ’uria ni nia to i la lalaa la, kuki to ni kwaimani lea la ofu bi nia, ma abuna tha Jesus Christ Kaluwane nia kai faafalu kulu faisia abula taa la ka sui bana.

⁸ Mada sa kuka sorea e ai akulua ta abula taa la, kuki lole kulu i talaakulua, ma mamana la eri e ai si to ani kulu.

⁹ Mada sa kuka faaroṉo lalaa ana abula taa la kulu ki, nia e mamana ma kokoto fasi kai manata lube kulu ana abula taa la kulu ki, ma kai faafalu kulu faisia si abula la ni sui bana ne ai si kokoto.

¹⁰ Mada sa kuka sorea ne ai kusi abula taa, kuki alaṉi nia ana lole la, ma bae lana ka ai naa faisi kulu.