II. Timothi 4 - Ṉa Alaofua Falu 1923 1949

¹ Mania nau ku faaroṉo oe inaofatha God, ma inaofatha Lord Jesus Christ, na Wane ni Kotu ana toa maruki ma toa mae ki, bia ana maṉo lana mai ma tooa nia;

² Oko ṉata sulia si baea eri; oki fifarao uria asi maṉa na kera maakwalia, ma asi maṉa na kesi maakwalia lau boo: oki faaseenoni kera, oki soreda, oki ṉata isada, asi lio ni doanita tatha la ma ana kwaifamanataia.

³ Uria na si maṉa toto kai fula na kesi alamatania keki faaroṉoda asi kwaifamanataia taliṉei eri; ma aliṉada kai mamale, adedea keki ofua toa in kwaifamanatai iada sulia thathami la taa kera ki;

⁴ Ma keki akeletania aliṉada faisia mamana la eri, keki akele kekeo uria uunu ni lole la ki.

⁵ Ma ni oe oki inoto ana seemu asi do ki sui, oki susuu i la taa la, oki ra ana ra wane ni ṉata la sulia si faaroṉoa lea, oki ili teefau ana ra oe.

⁶ Uria si maṉa eri mena keki kiki nau ’uria waene na kera alua fafia do ni foa la, ma si maṉa na nau kwai lae nakua e fula naa.

⁷ Nau ku firu naa ana firua lea eri, nau ku fita sui naa, nau ku rau asi do eki na kulu fitoona:

⁸ Ita asi maṉa eri ka lae alaa, kera alua naa do ni eregwau la ana kokoto la maakwali nau, na ṉa Lord, na Wane ni Kotu kokoto, kai falea ifaku afa boṉi eri: ma talifili nau e ai, kai falea lau boo ifana toa eki sui boo na kera liothau ana maṉo lana mai.

⁹ Oki seemabe fasi oki lakwasia mai isaku:

¹⁰ Uria na tha Dimasi e akwasi nau, sulaania nia thathamia si do kada nei ki, e lae uri Thesalonika; tha Keresenasi uri Galesia, tha Taetasi uri Dalamesia.

¹¹ Talifilia tha Luke ne to isaku. Oki tolea tha Mako kai lae mai bi oe: uria ni nia e faraku ana ra la.

¹² Ma tha Tikikasi nau ku arasia uri Efesai.

¹³ Tooni ba na nau ku akwasia mai i Toroasi isatha Kapasi, oki ṉalia mai si maṉa noki lae mai, ma buka ba ki, ma ada oko lio dora asi uṉee do ba ki na kera kekeda iei.

¹⁴ Tha Alikisada, wane ba na kai ra ana thalo, e abula taa faamau iaku: ṉa Lord toto kai duua si ra nia ki ifana:

¹⁵ Wane noki beta lau boo suli oe faisia; uria ne maalimae faamau ana bae lamilia.

¹⁶ Asi maṉa totonao na nau ku ṉata suusi nau e ai ta wane si adomi nau, kera sui boo kera akwasi nau: kwasi thathamia keki alaṉi kera asi do eri.

¹⁷ Ma sui ṉa Lord e takwe isaku, ma ka faasukwai nau; fasi suli nau si ṉata eri keki faaroṉo teefau ania, ma fasi Jenetaele ki sui boo keki roṉoi: ma kera lau nau faisia fokona laeona.

¹⁸ Ma ṉa Lord kai beta nau faisia si ra taa ki sui bana, ma kai faamaruki nau kwa fula isana tooa nia i thalo mai: keki fare inoto ani nia toto si sui. Emeni.

¹⁹ Oki ṉata sani Pirisika bia tha Akwila, ma toa ni maafera tha Onesiforasi, ’uria sa ni nau ku ṉata.

²⁰ Tha Erasitasi e to mai i Korinitha: ma tha Tofimasi ku akwasia i Miletama e matai.

²¹ Oki lakwasia mai isaku si maṉa na unii gwagwaria e ai si fula u. Tha Iubulasi e thathamia kwai ṉata isamu ’uria sa ni nia kai ṉata, ma tha Pudenasi, ma tha Linasi, ma ni Kolodia, ma doorakulua ki sui boo.

²² Tha Lord Jesus Christ kai to bia spirit oe. Lea la kai to bi kamulua. Emeni.