II. Timothi 3 - Ṉa Alaofua Falu 1923 1949

¹ Sui oko thaitoomana si do nai, na asi maṉa na ni ki u unii taa la kai fula.

² Uria na wane ki keki liothau ani kera i talaada, keki liothau ana malefo, keki uunaoda, keki fafakao kera, keki ṉata ni faretoliṉi lana imole, keki ade faisia ṉata lana maka kera ki ma thainada, kesi sore lea, keki taa,

³ Kesi thathamia ina lada kera, kesi to kwaimani, keki lole fafia imole, seeda kai inoto ani kera, keki rakeiri kwasi, kesi liothau asi do ne lea,

⁴ Toa ni faaalamai la, seeraraa, keki tala faabaita kera i talaada, keki liothau ana nau‐ni‐lea la, kesi liothau boo atha God;

⁵ Keki rau ana fatai lana si lio ni fare baita la atha God, sui kera tofea sukwaia asi lio eri: oki akele faisia toa una eki.

⁶ Uria na toa una eki kera maladala mai i maafera ki, keki gafoa kini oeaia ki na abula taa la ki ka kulua fafi kera, na kera tole garo anida ana thathami la taa oro ki,

⁷ Na kera tooa ṉado si do ki isada, sui kesi talaana thaitoomana lana mamana la eri.

⁸ Ma talafana lau boo tha Janesi ma tha Jabaresi kera maalimae tha Mosesi, alafana lau boo wane eki keki maalimae ana mamana la eri; wane liode taa ki, na kesi ala fafida sulia si do eki na kulu fitoona.

⁹ Me ai kesi lae tatha: uria na oewanea la kera kai to fatai isana toa ni sui, ’uria lau boo ni keroa.

¹⁰ Ma ni oe o lae buriaku ana kwaifamanataia nau, ana abula laku, asi do nau ku thathamii ilia, ana fitooa nau, asi lio nau ni doanita tatha la, ana liothau la nau, asi lio ni susuu,

¹¹ Ana ila la na kera tona ilamatai nau ania, ana taa la nau ku to ania; asi do ba ne uri nau i Adioko, ma i Ikoniama, ma i Lisitara; ana ila la ba ki ku susuu ania: ma faisia si do eki sui boo ṉa Lord e faamaruki nau.

¹² Iu, ma toa eki sui boo na keki thathamii to asi lio ni fare baita la atha God atha Christ Jesus, keki fulatoona tona ilamatai lada la.

¹³ Ma wane taa ki ma toa ni lole la keki taa ka lae tatha, keki lole ma kera loleda lau boo.

¹⁴ Ma ni oe oki to ṉado asi do ba ki na kera tooa isamu mo thaitoomana e mamana, uria no thaitoomana toa ba ki na kera tooa do eki isamu;

¹⁵ Ma ita i faekwa lamu o thaitoomana kekeda la abu ba ki ne sukwai uria ade lana liomu kai too ana marukia sulia fitooa ne ni atha Christ Jesus.

¹⁶ Kekeda la abu eki sui boo tha God e alua maṉona iei, ma ka lea uria kwaifamanataia, uria faaseenoni la, urea faaoolo la, uria to’o lana si do kokoto ki:

¹⁷ Fasi wane tha God ta si do si ei faisi nia, do oro ki ni isana maakwalia si ra lea ki sui.