II. Timothi 2 - Ṉa Alaofua Falu 1923 1949

¹ Mania, wela nau, oki sukwai ana lea la na ni atha Christ Jesus.

² Ma si do ba ki no roṉoa ani nau i maalutana toa oro na kera roṉoa, si do eki oki takofalea ana wane mamana ki, na kera talaana kwaifamanatai la lau isana tai toa lau boo.

³ Mania oki to ana taa la bi nau, mala wane ana firua lea tha Christ Jesus.

⁴ E ai ta wane na kai firu si katu asi ra fanua nei iano ki; fasi kai faalea wane eri ne alu nia ka wane ana firua.

⁵ Ma sui lau boo mada sa ta wane susuu fasi si nia kai tatha i la lalaba la ki fasi kai ṉalido, kesi erea gwauna, mada sa nia e ai si ili kokoto ania.

⁶ Wane ni ra ana oolee do, nia na kai ani totonao ana foee do eki.

⁷ Oki lalomatoona si do nau ku sorea; uria na ṉa Lord kai falea manata lea la iamu asi do ki sui.

⁸ Oki manatatoona tha Jesus Christ, Wane ana kwalafa tha Defeta na kera tataea faisia toa mae ki, sulia si faaroṉoa lea nau:

⁹ Si do eri na nau ku to ana taa la uria ka fula ana kani la, ’uria ta wane ne abula taa; sui bae lana tha God kesi kani fafia.

¹⁰ Mania nau ku susuu asi do ki sui bana ifana toa na tha God e filida, fasi ni kera lau boo keki fulatoona marukia eri na ni atha Christ Jesus bia inotoa na kai to tatha.

¹¹ Si ṉata eri e mamana: Sulaania mada sa kulu mae naa bi nia, toto kuki maruki lau boo bi nia:

¹² Mada sa kuka susuu, toto kuki inoto lau boo bi nia: mada sa kuka sorea kulu dora bakulua iana, nia toto kai sorea e dora lau bana iakulua:

¹³ Mada sa ni kulu kuka fitala, ni nia kai mamana kai to bana; uria nia sa ka sorea e dora bana ani nia i talaana e ai.

¹⁴ Oki faaroṉo kera lau asi do eki fasi keka onotoona, oki faaroṉoda inaofana ṉa Lord, kesi firu bi kera i talaada sulia si baea ki, firu la ne ai si kwaiadomi, kai faataofai nia toa na kera roṉoa.

¹⁵ Oki aṉasi fasi oki fatai oe isatha God wane na nia kai ala fafi oe, wane ni ra na maamu si asia uria ra oe, noki ukali lea asi baea mamana eri.

¹⁶ Oki keto faisia ṉata la ne fakoka ne eeta faisia tha God: uria na si do eri kai lae tatha asi lio ni fare faekwa la atha God,

¹⁷ Ma bae lada kai furi mala mamae: na ro wane iada na tha Haemeniasi ma tha Filetasi;

¹⁸ Ro nonii wane na kero tala faisia mamana la eri, kera sorea na tatae la faisia maea e mamana sui naa, kera tole garo ana tei wane faisia fitooa.

¹⁹ Ma sui gwa fau sukwai totonao tha God ki ka takwe ṉado, kera safua ana do ni faaṉado la nania, Tha Lord e thaitoomana toa nia ki: ma, Ni tei na ka ’ai ana thatana tha Christ kai ekwa asi abula la ne ai si kokoto.

²⁰ Sui i lala biu inoto talitoona boo kwadee do eki na kera thauwai nia ana goloda ma silifa na ka ni iei e ai, do ana si ’ei ma gano ni lau boo; ma tei do ana fare baita la ania, ma tei do ana fare faekwa la ania.

²¹ Mania mada sa ta wane ka faafalu nia faisia si do eki, nia kwadee do ana fare baita la ania, keki faaabu nia, kai farana ra ana wane inoto, kai thathai maakwalia si ra lea ki sui bana.

²² Oko thaka lau boo faisia si thathami la taa toa bii baita ki, ma oki tari buriana kokoto la, fitooa, liothau la, enenoa, bia toa na keka ’ai ana thatana ṉa Lord ana ruruuda ne thathaulia.

²³ Ma oli susuua toa na kera ṉata oewanea ma keka dora asi do na kera ṉata sulia, oko keto faisia, uria no thaitoomana kai futaṉai nia firua ki.

²⁴ Ma ṉa wane ni ra ṉa Lord kera lufia si firu boo, ma kai abula thathaore uria imole ni sui, liona kai too uria kwaifamanatai la, kai to seeeno si maṉa do faarakeiri ki kai fula,

²⁵ Kai abula marabibi si maṉa na kai faakokotoa toa na kera maalimae ani nia; fasi mado e ai tha God kai falea manata akele la ifada uria thaitoomana lana mamana la eri,

²⁶ Bia fasi keki manata lau bada faisia aikwai tha devil, si maṉa ni nia kai rau anida uria si do ne thathamia.