II. Timothi 1 - Ṉa Alaofua Falu 1923 1949

¹ Polo, aposela tha Jesus Christ asi do na tha God e thathamia, ana alaṉaia eri na ṉa marukia na ni atha Christ Jesus,

² Isatha Timothi, wela liliothaua nau: Lea la, tatakomia, enenoa, ita atha God na Maka ma tha Christ Jesus na Lord kulu.

³ Ku sore lea atha God, na nau ku ra ifana ita ana maka maka nau ki inao asi lio ne thathaulia, na nau ku onotoomu ta si maṉa si ei ana ṉata fifi la ki isatha God, afa rodo ma afa thato

⁴ Ku thathamia faamau kwai riki oe, ku manatatoona kafona maamu fasi kwai fuṉu ana seethathala la;

⁵ Si maṉa nau ku onotoona fitooa ba na kesi lole ania na ni ani oe; ne to totonao ana kokoo oe ni Loisa, ma ana thainamu ni Iunisi; ma nau ku thaitoomana boo, ne ni ani oe lau boo.

⁶ Ma sulia si kula eri kwai faaroṉo oe lau fasi oko onotoona oki ladea si do na tha God e tona falea, ne to ani oe sulia alu lana ro aba nau ki fafi oe.

⁷ Uria na tha God e ai si falea spirit ana mau la iakulua; Spirit ana sukwaia ni ana ma liothau la ma inotoa fafia seekulua.

⁸ Mania osi seenoni asi do na kera faamamanea sulia ṉa Lord kulu, mado ani nau, wane nia na kera suusi nau i la lokafu: ni oe lau boo oki to ana taa la ifana si faaroṉoa lea ana sukwaia tha God;

⁹ Ne faamaruki kulu, me aili kulu mai ana aili la ne abu, sulaania ra kulu ki e ai, sulaania si do ni nia e tala thathamii ilia ma uria lea la nia, na kera falea naa iakulua atha Christ Jesus to u asia mai inao ne ai si sui,

¹⁰ Sui kera fatai nia si maṉa eri ana maṉo lana mai Wane ne faamaruki kulu na tha Jesus Christ, ne faaaia ṉa maea, me fatai lalaa ana ṉa marukia bia si do na toto si fufuraa asi faaroṉoa lea eri,

¹¹ Na kera alu nau nau wane ni ṉata la sulia, ma aposela, ma wane ni kwaifamanatai ifana Jenetaele ki.

¹² Ma sulia si do eri lau boo ku to ana taa la eki: sui e ai kwasi seenoni; uria nau ku thaitoomana ni nia na nau ku fitoona sui, ma nau ku thaitoomana boo na nia e sukwai fasi kai beta si do nau ku takofale nia ania maakwalia fa boṉi eri.

¹³ Oki rau asi baea taliṉei ba ki ne dodoloa fasi keki lio uria, si do no roṉoa ani nau, ana fitooa ma liothau la na ni atha Christ Jesus.

¹⁴ Do lea ba na kera takofale oe ania oki beta atha Spirit Abu na ni ani kulu.

¹⁵ Si do eri o thaitoomana, na toa ba sui na kera ni Asia kera akele buri faisi nau; na ro wane iada na tha Faejelasi ma tha Hamojenesi.

¹⁶ Ku thathamia ṉa Lord kai tatakomia toa ni maafera tha Onesiforasi: uria si maṉa oro nia adomi nau kwa to lea lau, me ai si seenoni ana nailii thalo nau;

¹⁷ Ma si maṉa ne toto i Roma, e rofe faamau uri nau, me rofetooku

¹⁸ (Ku thathamia ṉa Lord kai falea si kula eri ifana na nia kai rofetoona tatakomia ṉa Lord afa boni eri); ma fita si do nia e ra ania ifaku i Efesasi, o thaitoomana lea.