II. Pita 3 - Ṉa Alaofua Falu 1923 1949

¹ Ruana leta nania, toa liliothaua nau ki, na nau ku keda kau isamulua; ma ana ro si do eki, ana faaroṉo lamulua la lau asi do ki, ku tharasia manatamulua ne thathaulia;

² Fasi muka onotoona si baea ba ki na porofeta abu eki kera ṉata sulia dini u mai inao, ma si ṉata fifi ṉa Lord na Wane ni Kwaifaamaruki ana aposela kamulua ki:

³ Uria na mulu thaitoomana totonao si do eri, afa boṉi iisi ki toa ni onioṉa la keki lae mai fafia onioṉa la kera, ma keki abula sulia si thathami la taa kera ki,

⁴ Ma keki una eri, Nifenia alaṉaia ba sulia fula lana mai? uria na, ita asi maṉa na maka ba inao ki kera biṉa, si do ki sui bana ka to ṉado sulia to lana ita mai ana thauwai lana fanua nei iano.

⁵ Sulaania kera lalakwee onotoona si do eri, na thalo lo ki e to mai dini u mai inao, ma fanua nei iano na kera thauwai nia ka to boo i thara ma i la kafo, sulia bae lana tha God;

⁶ Ma asi baea eri, uria kafo ne fuṉu fafia, toa na fanua totonao ka sui:

⁷ Ma thalo lo ki ne to si maṉa eri, ma fanua nei iano, kera alua asi baea eri boo maakwalia era, uria na kera tooa kai maakwalia fa boṉi eri ana kotu baita ma labatai lana wane eki na kera fare faekwa atha God.

⁸ Ma ni kamulua, toa liliothaua nau ki, musi liliodora ana tee si do eri, atha Lord tee fa boṉi e ’uria tee tooni fa ṉali, ma tee tooni fa ṉali e ’uria lau boo tee fa boṉi.

⁹ Tha Lord e ai si lalakwee ili fofoa asi do ne alaṉai nia, ’uria si do na tei imole keki sorea; nia doanita iakulua ka tau, e ai si thathamia ta imole kai sui, e thathamia kera sui boo keki akeletania manatada.

¹⁰ Ma fa boṉi tha Lord kai fula bomai ’uria wane na ka bili la rodo; fa boṉi na thalo lo ki kai sui naa ana alifeo la baita, ma si do totonao ki ne ofu asi do ki kai thaka kwailiu uria era ne aako faamau, ma fanua nei iano ma si ra nai iei ki kai akofi teefau ania.

¹¹ Mania uria na kera to’oa si do eki sui boo kai thaka kwailiu una eri, nifana maalutana to la ne kokoto muki to ania ana abula lamulua ne abu ma asi lio ni fare baita la atha God,

¹² Uria na muka maakwalia ma muka thathamia faamau fula lana fa boṉi tha God, na kai adea thalo lo ki kai tharu ma kai thaka kwailiu, ma si do totonao ki ne ofu asi do ki kai ’uria kafo uria era ne aako faamau?

¹³ Sui, sulia alaṉaia nia, kulu maakwalia thalo lo ki kai falu lau ma fanua nei iano kai falu lau, si kula na kokoto la kai to mai iei.

¹⁴ Mania, toa liliothaua nau ki, uria na mulu maakwalia si do eki, muki seemabe fasi keki fulatoomulua ana enenoa, muki dodoloa ma maana si rikia ta si do taa ani kamulua.

¹⁵ Ma manatamulua na si lio na Lord kulu ni doanita tatha la na ṉa marukia; alafana lau boo doora liliothaua kulu tha Polo, sulia liotooa eri na kera falea ifana, e keda isamulua;

¹⁶ ’Uria lau boo ana leta nia ki sui bana, e ṉata sulia si do eki lala; ma ana leta eki tei do ne afetai ana thaitoomana lana maalutana, na toa na kesi thaitoomana ma kesi takwe ṉado kera bulasi garo ania, ’uria lau boo kera bulasi garo ana kekeda la abu eki sui boo, keka tala labatai kera i talaada.

¹⁷ Mania ni kamulua, toa liliothaua nau ki, uria na mulu thaitoomana si do eki totonao, muki fia ada mado e ai keki tole garo ani kamulua ana ade garo la toa taa eki, ma muki asi kamulua faisia si lio ni takwe ṉado la kamulua.

¹⁸ Ma muki sukwai alaa ana lea la ma thaitoomana lana Lord kulu ne faamaruki kulu, tha Jesus Christ. Keki fare inoto ani nia si maṉa eri ma toto si sui. Emeni.