II. Pita 2 - Ṉa Alaofua Falu 1923 1949

¹ Ma porofeta na kesi mamana ki kera tae lau bomai i maalutana toa eri, ’uria lau boo i maalutamulua toa ni kwaifamanatai na kesi mamana ki toto keki fula, na keki ṉali thaufuni mai ana kwaifamanataia taa ki na ka labatania imole, ka fula boo ana sore lana kera dora bada ana Wane Inoto ne usi kera, ma keki ṉalia mai si do na kai labatai fofoa ani kera i talaada.

² Ma toa oro keki roo sulia abula lada ana daidei la; ma sulia toa eki keki ṉata taa sulia ṉa tala ana mamana la.

³ Ma ana thathami lana si do kamulua ki ana bae lada ne ai si mamana keki rofea si do na keki toda ani kamulua: ma kwae lada na kera sorea dini u mai inao kai fula fofoa mai, ma si do na kai labatanida e ai si biṉa mai sula tale.

⁴ Sulaania mada sa tha God e ai si suusia taa la faisia angel ki si maṉa na kera abula taa, me naṉa anida keka sifo i hell, ma ka aluda i la malau rorodoa ki, keki to maakwalia kwae lada;

⁵ Ma mada sa nia e ai si suusia taa la faisia fanua nei iano dini u mai inao, me faamarukia tha Noa, wane ne ṉata sulia kokoto la, bia fiu imole ki lau, si maṉa be falea mai igwa baita fafia toa na fanua na kera fare faekwa atha God;

⁶ Ma ka naarea toaa susu ba i Sodomo ma i Gomora ki, foa ni bana ne teo iei, ma ka sorea oge lana toaa eki, uria ne aluda fasi toa na abula lada kai fare faekwa atha God keka lio uria;

⁷ Me faamarukia wane kokoto eri tha Lota, ne taa faamau iana uria abula lana toa taa eki ana daidei la

⁸ (Sulaania wane kokoto eri, si maṉa ne toto i maalutada, asi do ne rikia me roṉoa, ka to fifi sulia boṉi ana ruruuna ne kokoto, uria abula lana toa eki na kilu ilia si do kera lufia):

⁹ Toa na kera fare baita atha God, tha Lord e thaitoomana rau la iada ana bae aliṉa la, ma ka suusia toa na kesi kokoto ki la lokafu ana kwae la maakwalia fa boṉi ana kotu baita;

¹⁰ Ma imole eki u boo na kera abula sulia seena imole asi thathami la ne faataali kera, ma keka fare faekwa ana toa gwauwai ki. Kera seeraraa, keka naunibaita, kesi leleba si maṉa na keki ṉata taa i seena toa inoto faamau ki:

¹¹ Ma angel ki, boro sa sukwaia ma inotoa kera ka baita ka tatha mena, kesi ṉata taa i seena toa eki inaofatha Lord.

¹² Ma imole eki, ’uria do ne ai si manata, ’uria sa talitoona do kwasi ki ne maruki, ne to bana uria ṉali lada ma thauṉi lada la, kera ṉata taa sulia si do eki na kesi thaitoomana maalutana, ma toto keki fufuraa, keki labatai teefau bonaa ani kera,

¹³ Keki to ana taa la na foli lana abula lada ne ai si kokoto; sa manatada do na sa kai faalea kera bonaa na malasaole la afa thato, ’uria see do ne lea sui ka karua ma ka boboloa, kera malasaole ana fafaṉa kera ki ana liothau la si maṉa na kera ania fafaṉa eki bi kamulua;

¹⁴ Maada ka lio ni oea, ma abula taa lada e ai si sui; keki gafoa imole ruruuda si ṉado ki; manatada ka thaitoomana lea gafogafoa; baree wela na taa la kai to fafida;

¹⁵ Kera akwasia tala kokoto eri, keka lae garo, uria na kera sulea lae lana tha Balama kaluwane tha Beo, ne thathamia foli lana abula la ne ai si kokoto;

¹⁶ Wane na kera sore nia fafia ade garo la nia eri: ṉa ase, do fokone ato, e bae mala wane, ka faamanataia porofeta eri faisia oewanea la nia.

¹⁷ Toa eki e ’uria ruka na kafo ka ai faisia, ma ’uria si datha‐liliu na kuburu kai taria; ma ifana toa eki kera alua rorodoa la baita na kai maakwalida.

¹⁸ Sulaania, ana bae lada roṉo lana ka baita faamau me fakoka, uria si do na seena imole e thathamidaki, ma ana daidei la, kera gafoa imole eki na keki thaka na mai faisia toa ana ade garo la;

¹⁹ Kera alaṉai nia tonee to la iada, si maṉa ni kera keka toa ni ra ki asi do ne fufuraa; sulaania wane na si nia kai tatha ata wane, wane eri kai suuwai nia kai tona ra ifana.

²⁰ Uria na mada sa, ana thaitoomana lana tha Lord Jesus Christ na Wane ni Kwaifaamaruki, kera thaka naa faisia si do ana fanua nei iano ki na kai faataali kia, ma sui kera katu lau ania iburi ma do eki si nia ka tatha ani kera, to lada iburi kai taa ka tatha ana to lada totonao.

²¹ Uria na e lea ka tatha iada mada sa kesi thaitoomana tala ana kokoto la, e ai si lea na, buriana na kera thaitoomana naa, keki akele buri faisia si ṉata fifi abu eri na kera falea ifada.

²² Si do ne fulatooda e talafana si ṉata mamana ba, Koito e oli buri uria momoana, ma botho ne sisiu uria kakano la i la mamako.