II. Pita 1 - Ṉa Alaofua Falu 1923 1949

¹ Saimona Pita, wane ni ra tha Jesus Christ ma aposela nia, isana toa eki na kera fulatoona fitooa ne ’uria fitooa inoto kamilia eri na ni ana kokoto la God kulu ne faamaruki kulu, tha Jesus Christ:

² Lea la iamulua ma enenoa kai baita alaa ana thaitoomana lana tha God ma tha Jesus na Lord kulu;

³ Uria na sukwaia nia, na ṉa sukwaia tha God, e alamatania si do ki sui bana ifakulua ana marukia ma asi lio ni fare baita la atha God, ana thaitoomana lana ni nia ne aili kulu mai ana inotoa ma kokoto la;

⁴ Ma ana sukwaia eri e alamatania alaṉaia inoto nia ki ne baita ka tatha ifakulua; fasi ana alaṉaia eki muki ṉalia ta si ana liona tha God, uria na mulu thaka naa faisia si do na toto kai fufuraa na ni fanua nei iano sulia si thathami la taa ki.

⁵ Iu, ma sulia si do eri boo ni kamulua muki safua si ra nia ana seemabea baita, ma ana fitooa kamulua muki alua lau boo kokoto la; ma ana kokoto la thaitoomana la;

⁶ Ma ana thaitoomana la inoto la ana seemulua; ma ana inoto la ana seemulua si lio ni susuu la; ma asi lio eri si lio ni fare baita la atha God;

⁷ Ma asi lio ni fare baita la atha God liothau la ana baree wai doorana eki; ma ana liothau la ana baree wai doorana eki ṉa liothau la.

⁸ Sulaania mada sa si do eki ni isamulua ma ka oro, kai adea na musi seedadaola ma musi ’uria ’ai ne ai si fuṉu, uria thaitoomana lana Lord kulu tha Jesus Christ.

⁹ Uria na wane na si do eki ka ai faisi nia maane rodo, talitoona bana si do ne i karaṉi nia ki na kai rikia, lione dora naa ana faafalu la eri faisia abula taa la nia nai nao ki.

¹⁰ Mania, doora kera, muki seemabe ka tatha fasi muki adea aili lamulua la eri ma fili lamulua la kai mamana: sulaania mada sa muki ilia si do eki, sa muka taofai kamulua ana ta si maṉa e ai:

¹¹ Uria asi kula eri keki ifinia maa ka baita uri kamulua muki kotho ana tooa na kai to tatha, tooa Lord kulu ne faamaruki kulu tha Jesus Christ.

¹² Mania nau kwai fifarao ṉado uria faaroṉo lamulua la lau asi do eki fasi muki onotoona, boro sa muka thaitoomana mena naa, ma kera faaṉado sui naa ani kamulua ana mamana la eri na ka to isamulua.

¹³ Iu, manataku ne kokoto, si maṉa nau kwai to ana ooba nei, nau kwai tharasi kamulua ana faaroṉo lamulua la lau fasi muki onotoona;

¹⁴ Uria nau ku thaitoomana si maṉa ana tatha la faisia ooba nau eri kai fula lakwalakwa mai, alafana Lord kulu tha Jesus Christ e faaroṉo nau mania.

¹⁵ Iu, nau kwai seemabe fasi, lalae ku lae nakua, muki thaitoomana onotoona lana si do eki ta si maṉa si ei.

¹⁶ Sulaania e ai misi roo sulia uunu ni lole la ki na liotooa na imole e boa, si maṉa mili faaroṉo kamulua ana sukwaia Lord kulu tha Jesus Christ ma fula lana, mili tala rikia inotoa nia ana maamilia.

¹⁷ Uria ne ṉalia atha God na Maka fare baita la ma inotoa, si maṉa na liṉana ṉata la e sifo mai i inotoa baita ka tatha, ne una eri, Kaluwane liliothaua nau fu nia, e lea iaku uri nia:

¹⁸ Ma liṉana ṉata la eri mili roṉoa ne sifo mai i thalo, si maṉa na mili toto isana i la gwa tolo be abu.

¹⁹ Ma si ṉata ana porofeta ba ki na kera faaṉadoa ka tatha kai to bana ifakulua; na muki abula lea si maṉa na muki lio uria, talafana uria ta laafa na ka laa asi kula ne rorodoa, maakwalia fanua kai dani, ma kwakwali‐dani kai tae mai i ruruumulua:

²⁰ Uria na mulu thaitoomana totonao si do eri, ne ai ta tona si ṉata na ta porofeta e keda ana kekeda la abu eki kesi inifita tee kera i talaada.

²¹ Uria ne ai ta tona si ṉata na ta porofeta e keda si fula ana ta si maṉa asi do na wane e tala thathamia: wane abu tha God ki kera ṉata mai, uria na tha Spirit Abu e faaṉata kera.